ആര്‍ത്തവ ക്രമക്കേടുകള്‍, കാരണങ്ങള്‍

Wellness

oi-Saritha

By Veena

Published: Wednesday, May 2, 2012, 10:35 [IST]

ആര്‍ത്തവം തികച്ചും ഒരു ശാരീരിക പ്രക്രിയയാണ്. ഇതോടനുബന്ധിച്ച് സ്ത്രീകള്‍ക്ക് അസ്വസ്ഥതകളുണ്ടാകുന്നതും സ്വാഭാവികം.

ചിലപ്പോള്‍ സ്ത്രീകള്‍ക്ക് ആര്‍ത്തവ ക്രമക്കേടുകള്‍ അനുഭവപ്പെടുന്നതും സാധാരണം. പ്രധാനമായും ഇതിന് വഴിയൊരുക്കുന്ന കാര്യങ്ങളെ കുറിച്ച് അറിയൂ.

സാധാരണ 28 ദിവസമാണ് ആര്‍ത്തവചക്രം. ഇതില്‍ രണ്ടു മുതല്‍ ഏഴു ദിവസങ്ങള്‍ വരെ വ്യത്യാസങ്ങളുണ്ടാകുന്നതും സാധാരണം. 60-100 മില്ലി രക്തമാണ് ഈ സമയത്ത് ശരീരത്തില്‍ നിന്നും നഷ്ടപ്പെടുക. ഈ രണ്ടു കാര്യങ്ങളില്‍ അസ്വഭാവികതയുണ്ടാകുന്നത് ആര്‍ത്തവ ക്രമക്കേടായി കണക്കാക്കാം.

മറ്റു പ്രശ്‌നങ്ങളൊന്നുമില്ലെങ്കില്‍ ആര്‍ത്തവം വൈകുന്നതോ ഇല്ലാതിരിക്കുന്നതോ ആയ അവസ്ഥ പ്രധാനമായും ഗര്‍ഭധാരണത്തെയാണ് കാണിക്കുന്നത്. മെനോപോസ് അടുത്തവരിലും ഈ അവസ്ഥ കാണാറുണ്ട്. പ്രസവശേഷം കുട്ടിയെ മുലയൂട്ടുന്ന സമയത്തും മിക്കവാറും സ്ത്രീകളില്‍ ആര്‍ത്തവമുണ്ടാകാറില്ല.

മെന്‍സസ് ആകാനുള്ള ദിവസം കഴിഞ്ഞ് ഒന്നോ രണ്ടോ ആഴ്ചക്കു ശേഷം ബ്ലീഡിംഗ് ഉണ്ടാകുകയാണെങ്കില്‍ ഇത് അബോര്‍ഷന്‍ ലക്ഷണമായും കാണേണ്ടതുണ്ട്.

ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്നവരിലും ചിലപ്പോള്‍ ആര്‍ത്തവക്രമക്കേടുകള്‍ കാണാറുണ്ട്. പ്രത്യേകിച്ച് ഗര്‍ഭനിരോധന ഗുളികകള്‍ ഉപയോഗിക്കുന്നവരില്‍ ഗുളിക നിര്‍ത്തിയാല്‍ ചിലപ്പോള്‍ അല്‍പനാളത്തേക്ക് ആര്‍ത്തവം വരാത്ത അവസ്ഥയുണ്ടാകും. ഇത് ഗര്‍ഭധാരണവുമായി ബന്ധപ്പെടുത്താനാവില്ല.

ശരീരഭാരത്തിലുണ്ടാകുന്ന വ്യത്യാസങ്ങളും ചിലപ്പോള്‍ മെന്‍സസ് പ്രശ്‌നങ്ങളുണ്ടാക്കാം. പെട്ടെന്ന് ശരീരഭാരം കൂടുന്നതും കുറയുന്നതും ചിലപ്പോള്‍ ആര്‍ത്തവക്രമക്കേടുകളുണ്ടാക്കാം. ഇവരില്‍ ആര്‍ത്തവം വരാതെയുമിരിക്കാം.

പോളിസിസ്റ്റിക് ഓവറി പോലുള്ള പ്രശ്‌നങ്ങള്‍ ആര്‍ത്തവക്രമക്കേടുകള്‍ വരാനുള്ള മറ്റു ചില കാരണങ്ങളാണ്.

ടെന്‍ഷന്‍, സ്‌ട്രെസ് തുടങ്ങിയ കാരണങ്ങളും ചിലപ്പോള്‍ ആര്‍ത്തവക്രമക്കേടുകള്‍ക്ക് കാരണമായേക്കാം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.