എന്താണ് ടൈപ്പ് 5 പ്രമേഹം? യുവാക്കളില്‍ ഈ പ്രമേഹം എങ്ങനെയാണ് വരുന്നത്? ദോഷങ്ങള്‍ എന്തെല്ലാം?

Type 5 Diabetes: ഇന്ന് ലോകത്തില്‍ ഏറ്റവുമധികം ആളുകളില്‍ കണ്ടുവരുന്ന ജീവിതശൈലി രോഗങ്ങളില്‍ ഒന്നാണ് പ്രമേഹം. സാധാരണ രീതിയില്‍ ടൈപ്പ് 1, ടൈപ്പ് 2 പ്രമേഹങ്ങളാണ് കണ്ടുവന്നിരുന്നത്. എന്നാല്‍, ബാംഗ്‌കോകില്‍ നടന്ന വേള്‍ഡ് ഡയബെറ്റ്‌സ് കോണ്‍ഗ്രസ്സ് 2025-ല്‍ ഇന്റര്‍നാഷ്ണല്‍ ഡയബിറ്റീസ് ഫെഡറേഷന്‍ പ്രസിഡന്റ് Peter Scharz പോഷകക്കുറവ് മൂലം ഉണ്ടാകുന്ന ടൈപ്പ് 5 ഡയബെറ്റ്‌സിനെക്കുറിച്ച് അവതരിപ്പിക്കുകയുണ്ടായി.

Photo Credit: AI

ഈ ടൈപ്പ് 5 പ്രമേഹം എന്താണെന്നും ഇതു വരുന്നതിനു പിന്നിലെ പ്രധാന കാരണങ്ങള്‍ എന്തെല്ലാമെന്നും നോക്കാം.

എന്താണ് ടൈപ്പ് 5 പ്രമേഹം?

അധികം ശരീരഭാരം ഇല്ലാത്തവരില്‍ പോഷകക്കുറവ് മൂലം കണ്ടുവരുന്ന പ്രമേഹമാണ് ടൈപ്പ് 5 പ്രമേഹം എന്ന് അറിയപ്പെടുന്നത്. ഏഷ്യന്‍ അതുപോലെ, ആഫ്രിക്കന്‍ രാജ്യങ്ങളിലാണ് പ്രധാനമായും ടൈപ്പ് 5 പ്രമേഹം കണ്ടുവരുന്നത്. കണക്കുകള്‍ പ്രകാരം, 20 മുതല്‍ 25 മില്യണ്‍ ആളുകളില്‍ ടൈപ്പ് 5 പ്രമേഹം കണ്ടുവരുന്നതായി പറയുന്നു.

സിവിയര്‍ ഇന്‍സുലിന്‍ ഡെഫിഷ്യന്റ് ഡയബെറ്റ്‌സ് (SIDD) -നെയാണ് ടൈപ്പ് 5 ഡയബെറ്റ്‌സ് എന്ന് വിശേഷിപ്പിക്കുന്നത്. അതായത്, ശരീരത്തില്‍ ഇന്‍സുലിന്‍ കുറയുന്നതും, മെറ്റബോളിസം ശരിയായ വിധത്തില്‍ നിലനില്‍ക്കാത്തതുമെല്ലാം തന്നെ ടൈപ്പ് 5 പ്രമേഹത്തിലേയ്ക്ക് ഒരു വ്യക്തിയെ നയിക്കുന്നു. തുടര്‍ച്ചയായി ഒരു വ്യക്തിയില്‍ പോഷകക്കുറവ് അനുഭവപ്പെട്ടാല്‍ അവരില്‍ ടൈപ്പ് 5 പ്രമേഹം വരാനുള്ള സാധ്യത കൂടുതലാണ്. പ്രത്യേകിച്ച്, ചെറുപ്പത്തില്‍ അല്ലെങ്കില്‍ കൗമാരത്തില്‍ ഒരു വ്യക്തിയില്‍ ഉണ്ടാകുന്ന പോഷകക്കുറവ് ടൈപ്പ് 5 പ്രമേഹത്തിലേയ്ക്ക് നയിക്കുന്നു.

ചരിത്രം

ഇരുപതാം നൂറ്റാണ്ടിന്റെ മധ്യത്തിലാണ് ടൈപ്പ് 5 പ്രമേഹം ചര്‍ച്ചാ വിഷയമാകുന്നത്. അന്നുകാലത്ത് ഇന്‍സുലിന്‍ റെസിസ്റ്റന്‍സ് മൂലം ഉണ്ടാകുന്ന ഒരു പ്രമേഹം മാത്രമായാണ് ടൈപ്പ് 5 പ്രമേഹത്തെ കണ്ടിരുന്നത്. എന്നാല്‍, പിന്നീട്, ഡോ. ഹോക്കിന്‍സിന്റെ നേതൃത്വത്തില്‍ നടത്തിയ ഗവേഷണത്തിലൂടെയാണ് ടൈപ്പ് പ്രമേഹം മറ്റു പ്രമേഹങ്ങളില്‍ നിന്നും വ്യത്യസ്തമാണെന്നും, മെറ്റബോളിസവുമായി ബന്ധപ്പെട്ട മറ്റൊരു രോഗാവസ്ഥയാണെന്നും കണ്ടെത്തിയത്.

ഈ രോഗാവസ്ഥ ആദ്യമായി റിപ്പോര്‍ട്ട് ചെയ്യുന്നത് 1955-ല്‍ ജമൈക്കയിലാണ്. പിന്നീട് 1985-ല്‍ ലോകാരോഗ്യ സംഘടന ഇതിനെ പോഷകക്കുറവ് മൂലം ഉണ്ടാകുന്ന രോഗമായി പ്രഖ്യാപിച്ചിരുന്നു. പിന്നീട് 1999-ല്‍ മതിയായ തെളിവുകള്‍ ഇല്ലാത്തതിനാല്‍ ഈ കാറ്റഗറി സാവധാനത്തില്‍ ഇല്ലാതാവുകയായിരുന്നു.

ലക്ഷണങ്ങള്‍

ടൈപ്പ് 5 പ്രമേഹം ഉള്ളവരില്‍ ഇന്‍സുലിന്‍ ഉല്‍പാദനം കുറയുന്നതാണ്. എന്നാല്‍, ഇത് ഇന്‍സുലിന്‍ റെസിസ്റ്റന്റുമായി ബന്ധമുള്ള രോഗമല്ല. സാധാരണ പ്രമേഹ രോഗികള്‍ ഇന്‍സുലിന്‍ കുത്തിവെയ്ക്കാറുണ്ട്. എന്നാല്‍ ടൈപ്പ് 5 പ്രമേഹം ഉള്ളവര്‍ക്ക് മരുന്നിലൂടെ രോഗത്തെ നിയന്ത്രിച്ച് നിര്‍ത്താന്‍ സാധിക്കുന്നതാണ്. നിങ്ങൾക്ക് പ്രമേഹം ഉണ്ടെങ്കിൽ ഏത് പ്രമേഹമാണെന്ന് ശരിയായി കണ്ടെത്തി, അതിനനുസരിച്ച് ചികിത്സിക്കുക.

Disclaimer : ഇവിടെ നല്‍കിയിരിക്കുന്ന വിവരങ്ങള്‍ ഇന്റര്‍നെറ്റില്‍ നിന്ന് ലഭിച്ച പൊതുവായ അനുമാനങ്ങളുടെയും വിവരങ്ങളുടെയും അടിസ്ഥാനത്തിലാണ്. മലയാളം ബോള്‍ഡ്സ്‌കൈ ഇത് സ്ഥിരീകരിക്കുന്നില്ല. ഇത്തരം കാര്യങ്ങള്‍ ചെയ്യുന്നതിന് മുന്‍പ് വിദഗ്ധന്റെ ഉപദേശം സ്വീകരിക്കേണ്ടതാണ്

Source Credits:മേൽ നൽകിയിരിക്കുന്ന ലേഖനം International Diabetes federation, Medscape.com എന്നീ വെബ് സൈറ്റുകളിൽ നിന്നും വിരങ്ങൾ ശേഖരിച്ച് എഴുതിയിരിക്കുന്നതാണ്.