ദന്തരോഗം? ഗര്‍ഭധാരണം വൈകും

ദന്താരോഗ്യസ്ഥിതി മോശമാണെങ്കില്‍ പ്രത്യുല്‍പാദനശേഷിയില്‍ അത് പൊണ്ണത്തടിയുണ്ടാക്കുന്ന അതേ പ്രശ്‌നങ്ങളുണ്ടാക്കുമെന്നാണ് ഗവേഷകര്‍ പറയുന്നത്. ദന്താരോഗ്യം മോശമായ സ്്ത്രീകളില്‍ ഗര്‍ഭിണികളാകാനുള്ള സാധ്യത കുറയുമത്രേ.

3737 ഗര്‍ഭിണികളിലാണ് ഗവേഷകര്‍ ഇതുസംബന്ധിച്ച് പഠനം നടത്തിയത്. പല്ലിന കേട്, മോണ പഴുപ്പ് തുടങ്ങിയ അസുഖങ്ങളാണ് വില്ലന്മാരാകുന്നത്. ഇക്കാര്യം സംബന്ധിച്ച് ഏറെക്കാലം മുമ്പുതന്നെ പലവിശ്വാസങ്ങളും നിലവിലുണ്ടെങ്കിലും ശാസ്ത്രീയമായ രീതിയില്‍ പഠനം നടത്തി ഇത് കണ്ടെത്തുന്നത് ആദ്യമായിട്ടാണെന്ന് ഗവേഷകര്‍ പറയുന്നു.

പഠനവിധേയരാക്കിയ സ്ത്രീകളില്‍ ദന്തക്ഷയവും മറ്റുമുള്ളവരില്‍ ഗര്‍ഭധാരണം അവര്‍ പ്ലാന്‍ ചെയ്തതിലും ഏഴ് മാസത്തോളം വൈകിയെന്നാണ് കണ്ടെത്തിയത്ത്. അല്ലാത്തവരാകട്ടെ അഞ്ചാംമാസത്തിനുള്ളില്‍ ഗര്‍ഭം ധരിയ്ക്കുകയും ചെയ്തിട്ടുണ്ട്.

വന്ധ്യതയും അതുസംബന്ധിച്ചുള്ള പ്രശ്‌നങ്ങളും ഒഴിവാക്കാന്‍ ഒരു പരിധിവരെ മികച്ച ദന്തസംരക്ഷണം സഹായിക്കുമെന്നാണ് ഗവേഷകര്‍ പറയുന്നത്. അതുകൊണ്ടുതന്നെ സ്ത്രീകള്‍ രണ്ടുനേരവും പല്ലുതേയ്ക്കുന്നത് ശീലമാക്കണമെന്നും ഇടക്കിടെ ദന്തരോഗവിദഗ്ധനെക്കണ്ട് പരിശോധന നടത്തണമെന്നും ഗവേഷകര്‍ പറയുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.