പ്രസവശേഷം സ്ത്രീകള്‍ക്ക് ബുദ്ധികൂടും

Studies

oi-Siji KM

By Lakshmi

Published: Friday, October 22, 2010, 11:23 [IST]

പ്രസവത്തോടെ സ്ത്രീകളുടെ തലച്ചോറ് വികസിക്കുമെന്നും ഇതുമൂലം സ്ത്രീകളില്‍ ബുദ്ധികൂടനമെന്നും പഠനറിപ്പോര്‍ട്ട്. പ്രസവത്തിനോട് അനുബന്ധിച്ചുള്ള ദിവസങ്ങളില്‍് സ്ത്രീകളുടെ തലച്ചോറിലെ കോശങ്ങള്‍ വളരും. ഇതാണ് ബുദ്ധിവികാസത്തിന് സഹായിക്കുന്നത്.

പ്രസവത്തോടനുബന്ധിച്ചുണ്ടാകുന്ന ഹോര്‍മോണ്‍ വ്യതിയാനം തലച്ചോറിനെ ചാര്‍ജ് ചെയ്യുമെന്നാണ് പഠനങ്ങളില്‍ തെളിഞ്ഞിരിക്കുന്നത്. ഇത് മുന്നിലുള്ള വെല്ലുവിളികള്‍ കാര്യക്ഷമമായി നേരിടാന്‍ സ്ത്രീയെ സഹായിക്കുമെന്നും ഗവേഷകര്‍പറയുന്നു. മിക്കസ്ത്രീകളും പ്രസവശേഷം എല്ലാകാര്യങ്ങളും കാര്യക്ഷമമായി കൈകാര്യം ചെയ്യുന്നതിന് പിന്നിലെ കാരണം ഇതുതന്നെയാണെന്നും ഗവേഷകര്‍ പറയുന്നു.

എന്തായാലും ഈ കണ്ടെത്തലോടെ പ്രസവം സ്ത്രീ തലച്ചോറിനെ ദോഷകരമായി ബാധിക്കുമെന്ന വിശ്വാസമാണ് മാറ്റിയെഴുതപ്പെട്ടിരിക്കുന്നത്. പ്രസവത്തിന് ശേഷം ചില സ്ത്രീകളില്‍ ഓര്‍മ്മക്കുറവ് അനുഭവപ്പെടാറുണ്ട്. എന്നാല്‍ ഇത് ഉറക്കക്കുറവുകൊണ്ട് മാത്രം സംഭവിക്കുന്നതാണെന്നാണ് പഠനം ചൂണ്ടിക്കാട്ടുന്നു.

യേല്‍ യൂണിവേഴ്‌സിറ്റിയിലെ ഗവേഷകരാണ് ഇതുസംബന്ധിച്ച പഠനങ്ങള്‍ നടത്തിയത്. പുതുതായി അമ്മമാരായ സ്ത്രീകളുടെ തലച്ചോറ് സ്‌കാനിംഗിന് വിധേയമാക്കിക്കൊണ്ട് പഠനം നടത്തിയത്. പ്രസവത്തിന് മുമ്പുള്ള മൂന്നോ നാലോ മാസങ്ങളില്‍ തലച്ചോറിലെ ഗ്രേ മാറ്ററിന്റെ അളവില്‍ കാര്യമായ വര്‍ദ്ധനയുണ്ടായതായി ഗവേഷണത്തില്‍ കണ്ടെത്താനായി.

പ്രേരണ, യുക്തി, വിവേകം, വൈകാരികത, സംതൃപ്തി തുടങ്ങിയവ നിയന്ത്രിക്കപ്പെടുന്നത് തലച്ചോറിന്റെ ഈ ഭാഗത്താണ്. മാത്രമല്ല ഇവ അമ്മയും കുഞ്ഞും തമ്മിലുള്ള ബന്ധത്തില്‍ ഏറെ പ്രധാനമാണുതാനും. എന്തായാലും അമ്മമാര്‍ക്കും അമ്മയാകാന്‍ ഒരുങ്ങുന്നവര്‍ക്കും ഒരുപോലെ സന്തോഷം നല്‍കുന്നതാണ് പുതിയ കണ്ടെത്തലെന്നകാര്യത്തില്‍ തര്‍ക്കമില്ല.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.