മദ്യപിക്കുന്നവര്‍ക്കും വദനാര്‍ബുദം

Studies

oi-Siji KM

By Lakshmi

Published: Friday, June 18, 2010, 16:17 [IST]

പുകയിലയുടെ ഉപയോഗം വായില്‍ കാന്‍സറുണ്ടാക്കാന്‍ വഴിവയ്ക്കുമെന്ന കാര്യം നേരത്തേ കണ്ടെത്തിയിട്ടുണ്ട്. എന്നാലിപ്പോഴിതാ ഇക്കാര്യത്തില്‍ മദ്യവും പിന്നിലല്ലെന്ന് വ്യക്തമായിരിക്കുന്നു.

എന്നാല്‍ അമിതമായി മദ്യപിക്കുന്നവര്‍ക്കും വദനാര്‍ബൂദം വരുമെന്നാണ് പുതിയ പഠനങ്ങള്‍ നല്‍കുന്ന സൂചന. ഇന്ത്യയിലാകട്ടെ ഇത്തരം കാന്‍സര്‍ വ്യാപകമായി കണ്ടു വരുന്നുണ്ടെന്നും കണക്കുകള്‍സൂചിപ്പിക്കുന്നു.

ബ്രിട്ടണിലെ കാന്‍സര്‍ റിസര്‍ച്ച് യു.കെ എന്ന സ്ഥാപനം നടത്തിയ ഗവേഷണത്തിലാണ് ഇക്കാര്യം കണ്ടെത്തിയത്. പുകവലിയ്ക്കും മുറുക്കിനുമൊപ്പം മദ്യംകൂടി ശീലമാക്കിയവരില്‍ വദനാര്‍ബുദസാധ്യത വളരെകൂടുതലാണെന്ന് പഠനം മുന്നറിയിപ്പ് നല്‍കുന്നു.

ചുണ്ട്, തൊണ്ട, നാവ്, വായ എന്നിവിടങ്ങളില്‍ ഉണ്ടാകുന്ന അര്‍ബുദത്തെ പൊതുവെ വദനാര്‍ബുദം എന്ന ഗണത്തിലാണ് പെടുത്തിയിരിക്കുന്നത്. ഓരോ വര്‍ഷവും ഇംഗ്‌ളണ്ടില്‍ മാത്രം 1900 പേര്‍ ഇത് ബാധിച്ച് മരിക്കുന്നുണ്ടെന്നാണ് കണക്ക്.

നിരന്തര മദ്യപാനം മൂലം വായിലെയും തൊണ്ടയിലെയും നേര്‍ത്ത ആവരണം നശിക്കുന്നതാണ് ഇതിന് കാരണം. വായ്ക്കുള്ളിലെ പുണ്ണുകള്‍, മുറിവുകള്‍, പാടുകള്‍ എന്നിവയാണ് വദനാര്‍ബുദത്തിന്റെ പ്രാഥമിക ലക്ഷണങ്ങള്‍.

മദ്യപിക്കുന്നവരില്‍ 5000 പേര്‍ക്ക് പുതുതായി രോഗം കണ്ടെത്തിയിട്ടുമുണ്ട്. മദ്യപിക്കുന്നതില്‍ യാതൊരു നിയന്ത്രണവുമില്ലാത്ത ഇന്ത്യയില്‍ വദനാര്‍ബുദബാധിതരുണ്ടായാല്‍ അതില്‍ അത്ഭുതപ്പെടേണ്ടതില്ലെന്ന് ഗവേഷണത്തിന് നേതൃത്വം നല്‍കിയ പ്രൊഫസര്‍ അലന്‍ മാരിയോണ്‍ പറഞ്ഞു. മാത്രമല്ല പുകവലിയുടെ ഉപയോഗം ഇത്തരം രോഗങ്ങള്‍ക്ക് ആക്കം കൂട്ടുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.