മദ്യപരേ...... സന്തോഷവാര്‍ത്ത!

Studies

oi-Siji KM

By Lakshmi

Published: Thursday, May 20, 2010, 15:42 [IST]

മദ്യപന്മാര്‍ക്ക് ഒരു സന്തോഷവാര്‍ത്ത, എന്നാല്‍ മുഴുക്കുടിയന്മാര്‍ക്ക് സന്തോഷിക്കാന്‍ അവകാശമില്ല, ശരാശരി കുടിയന്മാര്‍ക്ക് മാത്രം സന്തോഷിയ്ക്കാം. ഇവര്‍ ആരോഗ്യവാന്മാരായിരിക്കുമെന്നാണ് പുതിയൊരു പഠനത്തില്‍ കണ്ടെത്തിയിരിക്കുന്നത്.

മുഴക്കുടിയന്മാരെയും തീരെ കുടിയ്ക്കാത്തവരെയും അപേക്ഷിയ്ക്ക് ശരാശരി കുടിയന്മാര്‍ക്കാണത്രേ ആരോഗ്യം കൂടുതല്‍. എന്നുവച്ച് ഇനി കുടിയ്ക്കാത്തവരും ആരോഗ്യമുണ്ടാകുമെന്ന് കരുതി കുടി തുടങ്ങരുതെന്ന് ഗവേഷകര്‍ അഭ്യര്‍ത്ഥിയ്ക്കുന്നുമുണ്ട്. അത് കണ്ടില്ലെന്ന് നടിയ്ക്കരുത്.

മദ്യപാനശീലത്തെ വളര്‍ത്താനോ മദ്യത്തിന്റെ പരസ്യത്തിനോ വേണ്ടി ഈ പഠനം ഉപയോഗിക്കരുതെന്നാണ് പാരിസിലെ പിറ്റിസാല്‍പെട്രിയറെ ആശുപത്രിയിലെ ഗവേഷണ സംഘത്തിന് നേതൃത്വം നല്‍കയി ഡോക്ടര്‍ ബോറിസ് ഹാന്‍സെല്‍ പറയുന്നത്.

ഇത്തരക്കാരുടെ ആരോഗ്യനില മെച്ചപ്പെടുന്നത് മദ്യപാനത്തിന്റെ നേരിട്ടുള്ള ഗുണം കൊണ്ടല്ലെന്നും പഠനത്തില്‍ പറയുന്നുണ്ട്. മാനസിക പിരിമുറുക്കം കുറയുന്നതും കൂടുതല്‍ ശാരീരികായാസമുള്ള ജോലികളില്‍ ഏര്‍പ്പെടുന്നതുമാണ് ഇതിനുള്ള ചില കാരണങ്ങള്‍.

ഹാന്‍സെലും സംഘവും ഒന്നര ലക്ഷം ആളുകളിലാണ് പഠനം നടത്തിയത്. ഇവരെ നാല് സംഘങ്ങളായി തരംതിരിച്ചാണ് നിരീക്ഷണം നടത്തിയത്. ഒരിക്കലും മദ്യപിക്കാത്തവര്‍, പത്ത് മില്ലി ഗ്രാമില്‍ കുറവ് മദ്യം അകത്താക്കുന്നവര്‍, പത്ത് മില്ലിഗ്രാമിനും മുപ്പത് മില്ലിഗ്രാമിനും ഇടയില്‍ മദ്യം അകത്താക്കുന്ന ഇടത്തരം മദ്യപാനികള്‍, മുപ്പത് മില്ലിഗ്രാമില്‍ കൂടുതല്‍ മദ്യം അകത്താക്കുന്ന അമിത മദ്യപാനികള്‍ എന്നിങ്ങനെയുള്ള നാല് സംഘങ്ങളായാണ് ആളുകളെ തരംതിരിച്ചത്.

ഇടത്തരം മദ്യപാനികള്‍, അമിത മദ്യപാനികളെക്കാളും മദ്യപിക്കാത്തവരെക്കാളും ആരോഗ്യമുള്ളവരാണെന്ന് പഠനത്തില്‍ തെളിഞ്ഞു. മദ്യപാനവും പൊതുവായ ആരോഗ്യസ്ഥിതിയും തമ്മിലുള്ള ബന്ധം വ്യക്തമാക്കുന്ന ഈ പഠനം യൂറോപ്യന്‍ ജേര്‍ണല്‍ ഓഫ് ക്ലിനിക്കല്‍ ന്യുട്രീഷനില്‍ പ്രസിദ്ധീകരിച്ചിട്ടുണ്ട്

അതേസമയം, അമിതമായ മദ്യപാനം കടുത്ത കരള്‍ രോഗം, പലതരം കാന്‍സര്‍, തുടങ്ങി രോഗങ്ങള്‍ക്ക് കാരണമാവുന്നു. മദ്യപാനം മൂലം ആഗോളതലത്തില്‍ വര്‍ഷം തോറും 2.3 ദശലക്ഷം പേര്‍ കൊല്ലപ്പെടുന്നു എന്ന് ലോകാരോഗ്യ സംഘടനയുടെ കണക്കുകളില്‍ പറയുന്നുണ്ട്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.