മദ്യപിയ്‌ക്കൂ!! സന്ധിവാതമൊഴിവാക്കൂ

മദ്യപാന്‍മാര്‍ക്കായി ഒരു സന്തോഷ വാര്‍ത്ത. നിങ്ങള്‍ ഒരു സ്ഥിര മദ്യപാനിയാണെങ്കില്‍ സന്ധിവാതമുണ്ടാകാനുള്ള സാധ്യത തുലോം കുറവാണെന്ന്‌ പഠനം.

സ്വീഡനിലെ ഒരു സംഘം ഗവേഷകരാണ്‌ ഇത്‌ സംബന്ധിച്ചുള്ള പഠന റിപ്പോര്‍ട്ട്‌ പുറത്തു വിട്ടിരിയ്‌ക്കുന്നത്‌. കരോലിന്‍സ്‌ കാ ഇന്‍സ്‌റ്റിറ്റിയൂട്ടിലെ ഗവേഷകര്‍ 2750 പേരില്‍ നടത്തിയ പഠനങ്ങള്‍ പ്രകാരം ആഴ്‌ചയില്‍ അഞ്ച്‌ ഗ്ലാസ്‌ വൈനെങ്കിലും അകത്താക്കുന്നവര്‍ക്ക്‌ സന്ധിവാതമുണ്ടാകാനുള്ള സാധ്യത അമ്പത്‌ ശതമാനം കുറയുമെന്നാണ്‌ പറയപ്പെടുന്നത്‌.

എന്നാല്‍ ഇതിനുള്ള കാരണം ഇവര്‍ വ്യക്തമാക്കിയിട്ടില്ല. അതെ സമയം അമിത മദ്യപാനം മറ്റ്‌ ആരോഗ്യ പ്രശ്‌നങ്ങള്‍ കൂട്ടുമെന്ന്‌ ഡോക്ടര്‍മാര്‍ മുന്നറിയിപ്പ്‌ നല്‌കിയിട്ടുണ്ട്‌.

പ്രതിരോധ സംവിധാനത്തിലുണ്ടാകുന്ന തകരാറാണ്‌ സന്ധിവാതമുണ്ടാക്കുന്നത്‌. സന്ധികളില്‍ നീരുണ്ടാകുകയും ഇലാസ്‌തികത നഷ്ടമാകുകയും ചെയ്യുന്നതാണ്‌ രോഗത്തിന്റെ പ്രത്യേകത.

ജനിതക ഘടകങ്ങളും പാരിസ്ഥിതിക സാഹചര്യങ്ങളുമാണ്‌ സന്ധിവാതം പിടിപെടുന്നതിന്‌ ഇടയാക്കുന്നതെന്ന്‌ നേരത്തെ കണ്ടെത്തിയിരുന്നു. ബ്രിട്ടനില്‍ നാല്‌ ലക്ഷത്തോളം പേര്‍ ഈ അസുഖം മൂലം കഷ്ടപ്പെടുന്നുണ്ടെന്നാണ്‌ കണക്കാക്കപ്പെട്ടിരിയ്‌ക്കുന്നത്‌.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.