വ്യായാമം സ്‌തനാര്‍ബുദ സാധ്യത കുറയ്‌ക്കും

കൃത്യമായി വ്യായാമം ചെയ്‌താല്‍ സ്‌തനാര്‍ബുദ സാധ്യത കുറയ്‌ക്കാന്‍ കഴിയുമെന്ന്‌ പഠനറിപ്പോര്‍ട്ട്‌. കാഠിന്യമേറിയ വ്യായാമങ്ങള്‍ ചെയ്യാനാണ്‌ ഗവേഷകര്‍ നിര്‍ദ്ദേശിക്കുന്നത്‌.

മുമ്പായിരുന്നുവെങ്കില്‍ നിലം തുടയ്‌ക്കല്‍, അരയ്‌ക്കല്‍, ഇടിയ്‌ക്കല്‍, അലക്കല്‍ എന്നിങ്ങനെയുള്ള ഭാരമേറിയ വീട്ടു ജോലികള്‍തന്നെ ഈ വ്യായാമങ്ങളുടെ ഗുണം നല്‍കുമായിരുന്നു. എന്നാല്‍ ഇന്നത്തെ സാഹചര്യത്തില്‍ ഇക്കാര്യങ്ങള്‍ പ്രാവര്‍ത്തികമാക്കുകയെന്നത്‌ പലസ്‌ത്രീകളെയും സംബന്ധിച്ച്‌ ബുദ്ധിമുട്ടുള്ള കാര്യമാണ്‌.

ഇത്തരക്കാര്‍ക്ക്‌ ഓട്ടം പോലുള്ള വ്യായാമങ്ങള്‍ ചെയ്യുകയായിരിക്കും നല്ലത്‌. അമേരിക്കയിലെ ഒരു കൂട്ടം ഗവേഷകരാണ്‌ ഇതുസംബന്ധിച്ച പഠനം നടത്തിയത്‌. ആര്‍ത്തവവിരാമം ഉണ്ടായ 32,269 സ്‌ത്രീകളിലാണ്‌ ഇവര്‍ പഠനം നടത്തിയത്‌. മെലിഞ്ഞ പ്രകൃതക്കാരായ സ്‌ത്രീകളാണെങ്കില്‍ പോവും വ്യായാമം അത്യവശ്യമാണെന്നാണ്‌ ഇവര്‍ പറയുന്നത്‌.

ഇത്തരത്തില്‍ കഠിന വ്യായാമങ്ങള്‍ ചെയ്യുന്ന സ്‌ത്രീകളില്‍ രോഗ സാധ്യത കുറയുന്നതായാണ്‌ കണ്ടെത്തിയത്‌. ഏഴവര്‍ഷത്തോളമായിരുന്നു പഠനത്തിന്റെ കാലാവധി.

വീട്ടില്‍ ഭാരമേറിയ ജോലികള്‍ ചെയ്യാനില്ലാത്തവര്‍ ജിമ്മിലോ മറ്റോ പോയി വ്യായാമം ചെയ്യുന്നത്‌ പതിവാക്കണമെന്നും ഗവേഷകര്‍ നിര്‍ദ്ദേശിക്കുന്നു. ജേണല്‍ ഓഫ്‌ ബ്രസ്റ്റ്‌ കാന്‍സര്‍ റിസര്‍ച്ചിലാണ്‌ ഈ പഠന റിപ്പോര്‍ട്ട്‌ പ്രസിദ്ധീകരിച്ചിരിക്കുന്നത്‌.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.