അമ്മ തടിച്ചിട്ടാണോ, എങ്കില്‍ മകന്‍റെ പ്രത്യുല്‍പാദശേഷി കുറയും

ലണ്ടന്‍: അമ്മയ്‌ക്ക്‌ പൊണ്ണത്തടിയുണ്ടോ? എങ്കില്‍ അവരുടെ ആണ്‍മക്കളുടെ ബീജം ശരാശരി അളവില്‍ കുറവായിരിക്കുമെന്ന്‌ റിപ്പോര്‍ട്ട്‌.

സ്‌ത്രീകളിലെ പൊണ്ണത്തടി അവരുടെ ഗര്‍ഭധാരണശേഷിയെ പ്രതികൂലമായി ബാധിക്കുമെന്ന്‌ പഠനറിപ്പോര്‍ട്ടുകള്‍ മുമ്പേ വെളിപ്പെടുത്തിയിരുന്നു. എന്നാല്‍ അമിതവണ്ണവും അടുത്ത തലമുറയുടെ പ്രത്യുല്‍പാദനശേഷിയും തമ്മില്‍ ബന്ധമുണ്ടെന്നാണ്‌ പുതിയ പഠനം കണ്ടെത്തിയിരിക്കുന്നത്‌.

ഡെന്‍മാര്‍ക്കിലെ ആര്‍ഹസ്‌ സര്‍വ്വകലാശാലയിലെ ഗവേഷകരാണ്‌ പുതിയ ഗവേഷണഫലം പുറത്തുവിട്ടത്‌. 300 സ്ത്രീകളെയും അവരുടെ ആണ്‍മക്കളെയുമാണ്‌ ഗവേഷകര്‍ പഠനവിധേയരാക്കിയത്‌.

ഇതില്‍ ഭൂരിഭാഗവും ഗര്‍ഭിണിയായിരിക്കേ ശരാശരി വണ്ണമുണ്ടായിരുന്നവരാണ്‌. എന്നാല്‍ 300ല്‍ 25 പേര്‍ ഗര്‍ഭിണിയായിരിക്കേ അമിതവണ്ണമോ പൊണ്ണത്തടിയോ ഉളളവരായിരുന്നു.

പഠനത്തില്‍ നിന്ന്‌ ഇവരുടെ ആണ്‍മക്കളുടെ ബീജസംഖ്യ മറ്റുളളവരെക്കാള്‍ കുറഞ്ഞ അളവിലാണെന്ന്‌ കണ്ടെത്തി. പൊണ്ണത്തടിയുമായി ബന്ധപ്പെട്ട ഇസ്‌ട്രജിന്‍ എന്ന ഹോര്‍മോണാവും ഇതിന്‌ കാരണമെന്ന നിഗമനത്തിലാണ്‌ ഗവേഷകര്‍.

പുരുഷ പ്രത്യുല്‍പാദന അവയവങ്ങളുടെ വികസനത്തിന്‌ ഈ ഹോര്‍മോണ്‍ പ്രതികൂല ഫലം ചെയ്യുമെന്നാണ്‌ പറയപ്പെടുന്നത്‌. എന്നാല്‍ ഇതേ കുറിച്ച്‌ കൂടുതല്‍ പഠനം നടത്തിയാലെ ഉറപ്പ്‌ പറയാനാവൂവെന്നും ഗവേഷകര്‍ അറിയിച്ചു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.