ജോലിയോട്‌ ഭയമാണോ? ചികിത്സതേടാന്‍ മടിക്കണ്ട

ജോലിയോടു ഭയമുണ്ടാകുന്നത്‌ മടിയന്മാര്‍ക്കാണെന്നാണ്‌ പൊതുവെ വിശ്വസിച്ചുവരുന്നത്‌. ജോലിചെയ്യാന്‍ ഭയമുള്ളവരെ മടിയന്മാരെന്ന്‌ വിളിക്കാറുമുണ്ട്‌.

എന്നാല്‍ ഇത്‌ വെറും മടിമൂലമല്ലെന്നും യഥാര്‍ത്ഥത്തില്‍ ഈ ഭയം ഒരു രോഗാവസ്ഥയാണെന്നും പുതിയ പഠനങ്ങള്‍ സൂചിപ്പിക്കുന്നു. ഇതിന്‌ വളരെ സൂക്ഷിച്ചുള്ള ചികിത്സകള്‍ നല്‍കേണ്ടതുണ്ടെന്ന്‌ ഇതുസംബന്ധിച്ച്‌ പഠനം നടത്തിയ ഗവേഷകര്‍ മുന്നറിയിപ്പ്‌ തരുന്നു.

ജോലിസ്ഥലത്ത്‌ പ്രശ്‌നങ്ങളുണ്ടാകുമെന്ന ഭയത്തില്‍ നിന്നാണത്രേ ജോലിയോടുള്ള ഭയവും അകല്‍ച്ചയും ഉടലെടുക്കുന്നത്‌. ഇത്തരക്കാര്‍ ജോലിയില്‍ ഏര്‍പ്പെടാന്‍ മടികാണിയ്‌ക്കുന്നു. ജോലിയില്‍ ഉണ്ടാകുന്ന വര്‍ദ്ധിച്ച ഉത്‌കണ്‌ഠയോ ആകാംക്ഷയോ ആണ്‌ ഇതിന്‌ കാരണം.

പൊതുവായി മാനസിക പ്രശ്‌നങ്ങളൊന്നുമില്ലാത്തവരില്‍പ്പോലും ഈ രോഗാവസ്ഥരൂപപ്പെടാന്‍ സാധ്യതയുണ്ട്‌. ദീര്‍ഘമായ രോഗചികിത്സാവധിയില്‍ പ്രവേശിക്കുന്ന രണ്ടുജോലിക്കാരില്‍ ഒരാള്‍ക്കെന്ന നിലയില്‍ ഈ മാനസിക പ്രശ്‌നമുണ്ടെന്ന്‌ ഇതുസംബന്ധിച്ച്‌ പഠനം നടത്തിയ ബെര്‍ലിനിലെ ക്ലിനിക്കല്‍ സൈക്കോളജിസ്‌റ്റ്‌ പ്രൊഫസര്‍ മൈക്കല്‍ ലിന്‍ഡന്‍ പറയുന്നു.

വ്യക്തികളില്‍ പല വിഷയങ്ങളിലും ആകാംക്ഷയും ഉത്‌കണ്‌ഠയും കാണാറുണ്ടെങ്കിലും ജോലി സംബന്ധമായുണ്ടാകുന്ന ഈ വൈകാരികാവസ്ഥകള്‍ കൂടുതല്‍ അപകടകരമാണത്രേ. ജോലി ഭാരം, ജോലിയുയര്‍ത്തുന്ന സാമൂഹിക പ്രശ്‌നങ്ങള്‍ എന്നിവയാണ്‌ മിക്കവരിലും അമിതമായ മാനസിക സംഘര്‍ഷങ്ങളുണ്ടാക്കുന്നത്‌.

അമിതമായ ആകാംക്ഷ മാനസിക സന്തോഷത്തെ തകര്‍ക്കുന്നു. ഇതുതന്നെയാണ്‌ ദീര്‍ഘമായി നീളുന്ന രോഗചികിത്സാ അവധികള്‍ക്കും മനസ്സാന്നിദ്ധ്യമില്ലാതെ ജോലി ചെയ്യുന്നതിനും കാരണമാകുന്നത്‌.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.