ഭക്ഷണം മിതമാക്കൂ, വ്യായാമം ചെയ്യൂ, ആയുസ്സ്‌ കൂട്ടാം

കൂടുതല്‍ക്കാലം ജീവിക്കാനാഗ്രഹിക്കാത്തവരാരെങ്കിലുമുണ്ടോ എന്നാല്‍ ജീവന്‍ കൂടുതല്‍ക്കാലം നിലനില്‍ക്കമെന്നോര്‍ത്ത്‌ ഭക്ഷണക്കാര്യത്തിലും വ്യായാമത്തിലും ശ്രദ്ധചെലുത്തുന്നവര്‍ വളരെ കുറവുമാണ്‌.

ഇഷ്ടപ്പെട്ടത്‌ കണ്ടാല്‍ വാരിവലിച്ചു തിന്നുകയും പിന്നെ എവിടെയെങ്കിലും ചടഞ്ഞുകൂടുകയും ചെയ്യുന്നവരാണ്‌ കൂടുതലും. ഇവര്‍ക്ക്‌ കൂടുതല്‍ക്കാലം ജീവിക്കണമെന്ന്‌ ആഗ്രഹിക്കുകയല്ലാതെ അത്‌ സാധിക്കാന്‍ വഴിയില്ല.

പൊണ്ണത്തടിയാണ്‌ മിക്കവരിലും അസുഖങ്ങളും അസ്വസ്ഥതകളുമുണ്ടാക്കുന്നത്‌. ശരീരഭാരം മിതപ്പെടുത്തിയാല്‍ ആയുസ്സ്‌ വര്‍ദ്ധിപ്പിക്കാമെന്ന്‌ ഈയിടെ നടന്ന ഒരു പഠനത്തില്‍ തെളിഞ്ഞു കഴിഞ്ഞു.

അമേരിക്കന്‍ ഗവേഷകര്‍ നടത്തിയ പരീക്ഷണങ്ങളിലാണ്‌ ശരീരഭാരവും ആയുസ്സും തമ്മില്‍ കാര്യമായ ബന്ധമുണ്ടെന്ന്‌ കണ്ടെത്തിയത്‌. മിതമായ ഭക്ഷണക്രമവും ഒപ്പം വ്യായാമം ചെയ്യുന്നത്‌ ശീലമാക്കേണ്ടതിന്റെയും ആവശ്യകതയെക്കുറിച്ച്‌ ബോധ്യപ്പെടുത്തുന്നതാണ്‌ ഈ പഠനഫലം.

പൊണ്ണത്തടിയും കൂടിയ ശരീരഭാരവും പ്രമേഹം. രക്താതിസമ്മര്‍ദ്ദം, തുടങ്ങി ഒട്ടേറെ പ്രശ്‌നങ്ങള്‍ക്ക്‌ വഴിവെയ്‌ക്കുമെന്ന്‌ നേരത്തേതന്നെ പഠനങ്ങളില്‍ തെളിഞ്ഞതാണ്‌. ശരീര ഭാരം കുറയുമ്പോള്‍ മസ്‌തിഷ്‌കത്തിലേയ്‌ക്ക്‌ ഇന്‍സുലിന്‍ എത്തുന്നത്‌ പരിമിതപ്പെടും ഇതാണത്രേ ആയുസ്സ്‌ കൂട്ടാനിടയാക്കുന്നത്‌.

ശരീരത്തില്‍ രക്തത്തില്‍ പഞ്ചസാരയുടെ അളവ്‌ ക്രമീകരിക്കുന്ന ഹോര്‍മോണാണ്‌ ഇന്‍സുലിന്‍. ശരീരത്തില്‍ ഈ ഹോര്‍മോണിന്റെ പ്രവര്‍ത്തനം പരിമിതപ്പെടുത്തിയാല്‍ ആയുസ്സ്‌ കൂടുമെന്ന്‌ മുമ്പ്‌ മറ്റ്‌ ജീവികളില്‍ നടത്തിയ പഠനത്തിലും തെളിഞ്ഞിരുന്നു. ഇക്കാര്യത്തില്‍ കൂടുതല്‍ വ്യക്തത നല്‍കുന്ന പരീക്ഷണങ്ങളാണ്‌ ഹൊവാര്‍ഡ്‌ മെഡിക്കല്‍ ഇന്‍സ്റ്റിറ്റിയൂട്ടിലെ ഡോക്ടര്‍ മൊറിസ്‌ വൈറ്റിന്റെ നേതൃത്വത്തില്‍ നടന്നത്‌.

ഇതിനായി ഇന്‍സുലിന്‍ സൂചകങ്ങള്‍ മസ്‌തിഷ്‌കത്തിലെത്തിക്കുന്ന ഐആര്‍എസ്‌-2 എന്ന പ്രോട്ടീന്റെ പ്രവര്‍ത്തനം ഗവേഷകര്‍ സൂക്ഷ്‌മമായി പരിശോധിച്ചു. എലികളില്‍ നടത്തിയ പരീക്ഷണത്തില്‍ ഈ പ്രോട്ടീനിന്റെ അളവ്‌ പകുതിയായി കുറച്ചപ്പോള്‍ അവയുടെ ആയുസ്സ്‌ 18 ശതമാനം വര്‍ദ്ധിച്ചതായി കണ്ടെത്തി.

ഐആര്‍എസ്‌-2 പ്രോട്ടീനിന്റെ പ്രവര്‍ത്തനം പരിമിതപ്പെടുത്താന്‍ സഹായിക്കുന്ന ഔഷധങ്ങള്‍ രൂപപ്പെടുത്തുകവഴി പൊണ്ണത്തടിക്കാര്‍ക്കുപോലും ഭാവിയില്‍ ഈആയുസ്സ്‌ നീട്ടിക്കിട്ടാന്‍ ഈ ഗവേഷണം സഹായിക്കുമെന്നാണ്‌ കരുതപ്പെടുന്നത്‌. പൊണ്ണത്തടിയ്‌ക്കൊപ്പം ഇന്‍സുലിന്‍ തോത്‌ വര്‍ദ്ധിക്കുകയും ചെയ്‌താല്‍ അത്‌ പ്രജ്ഞാനാശം(ഡിമെന്‍ഷ്യ)യ്‌ക്ക്‌ കാരണമായേക്കുമെന്ന്‌ കണ്ടെത്തിയിട്ടുണ്ട്‌.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.