വ്രതകാലത്തും മഴക്കാലത്തും ചർമ്മം തിളങ്ങണോ? ഈ ലളിതമായ കാര്യങ്ങൾ ശ്രദ്ധിച്ചാൽ മതി

ഇന്ന് മുതൽ സാവൻ മാസത്തിന് തുടക്കമായിരിക്കുകയാണ്. ഉത്തരേന്ത്യയിൽ വ്രതാനുഷ്ഠാനങ്ങളുടെ ശ്രാവണ മാസമായി ഇത് ആഘോഷിക്കുമ്പോൾ, കേരളത്തിൽ ഭക്തിസാന്ദ്രമായ കർക്കടക മാസത്തിന്റെ പുണ്യകാലമാണ്. കഠിനമായ വ്രതാനുഷ്ഠാനങ്ങളും ഒപ്പം ഈ മഴക്കാലത്തെ ഈർപ്പവും ചർമ്മത്തിന്റെ സ്വാഭാവിക തിളക്കം കുറയ്ക്കാൻ ഇടയാക്കാറുണ്ട്. എന്നാൽ കൃത്യമായി വെള്ളം കുടിക്കുകയും ചർമ്മം വൃത്തിയായി സൂക്ഷിക്കുകയും ചെയ്താൽ വ്രതകാലത്തും ആരോഗ്യകരമായ തിളക്കം നിലനിർത്താം.

ആത്മീയമായ കാരണങ്ങളാൽ പതിവ് ഭക്ഷണക്രമത്തിൽ മാറ്റം വരുത്തുമ്പോൾ ശരീരത്തിലെ ജലാംശം നിലനിർത്തുക എന്നത് വളരെ പ്രധാനമാണ്. ഇളനീർ, നന്നാറി സർബത്ത് എന്നിവ കുടിക്കുന്നത് ശരീരത്തിന് ആവശ്യമായ ഇലക്ട്രോലൈറ്റുകൾ കൃത്യമായി നൽകാൻ സഹായിക്കും. നിങ്ങളുടെ വ്രതരീതിയിൽ അനുവദനീയമാണെങ്കിൽ ഇഞ്ചി ചേർത്ത സംഭാരം കുടിക്കുന്നത് ദഹനം മെച്ചപ്പെടുത്താനും ചർമ്മത്തിന് ഉന്മേഷം നൽകാനും നല്ലതാണ്. ചായയുടെയും കാപ്പിയുടെയും അമിത ഉപയോഗം ഒഴിവാക്കുക, കാരണം ഇത് ശരീരത്തെ പെട്ടെന്ന് തളർത്തുകയും മുഖം വാടിയിരിക്കാൻ കാരണമാവുകയും ചെയ്യും.

സാവൻ വ്രതം: തിളക്കമുള്ള ചർമ്മത്തിനായി ഈ കാര്യങ്ങൾ ശ്രദ്ധിക്കാം

ഈർപ്പമുള്ള കാലാവസ്ഥയിൽ ക്ഷേത്രദർശനത്തിനും മറ്റും പോകുമ്പോൾ വിയർപ്പിൽ ഒലിച്ചുപോകാത്ത സൺസ്‌ക്രീൻ (SPF) ഉപയോഗിക്കാൻ മറക്കരുത്. സൂര്യപ്രകാശത്തിലെ ഹാനികരമായ അൾട്രാവയലറ്റ് കിരണങ്ങളിൽ നിന്ന് സംരക്ഷണം നൽകാൻ PA+++ ഉള്ള ഉൽപ്പന്നങ്ങൾ തിരഞ്ഞെടുക്കാം. ദീർഘനേരം ക്യൂവിൽ നിൽക്കേണ്ടി വരുന്ന സാഹചര്യമാണെങ്കിൽ ഓരോ മൂന്ന് മണിക്കൂർ കൂടുമ്പോഴും സൺസ്‌ക്രീൻ വീണ്ടും പുരട്ടാൻ ശ്രദ്ധിക്കുക. ഇത് ചർമ്മം കരിവാളിക്കുന്നത് തടയുകയും വെയിലിൽ നിന്ന് ചർമ്മത്തിന് സംരക്ഷണം നൽകുകയും ചെയ്യും.

മഴക്കാലത്തെ യാത്രാവേളകളിൽ തലയോട്ടിയും ചർമ്മവും സംരക്ഷിക്കാൻ

മഴക്കാലത്തെ ഈർപ്പമുള്ള അന്തരീക്ഷം തലയോട്ടിയിലും കാൽവിരലുകൾക്കിടയിലും ഫംഗസ് ബാധയുണ്ടാക്കാൻ കാരണമാകാറുണ്ട്. അതിനാൽ തല കുളിച്ചു കഴിഞ്ഞാൽ മുടി പൂർണ്ണമായും ഉണക്കാൻ ശ്രദ്ധിക്കണം. മഴവെള്ളത്തിലൂടെയോ കെട്ടിക്കിടക്കുന്ന വെള്ളത്തിലൂടെയോ നടന്നാൽ ഉടൻ തന്നെ മൈൽഡ് സോപ്പ് ഉപയോഗിച്ച് കാലുകൾ വൃത്തിയായി കഴുകുക. ചർമ്മം നനവില്ലാതെ ഇരിക്കാൻ ആന്റിഫംഗൽ പൗഡർ ഉപയോഗിക്കുന്നത് ചൊറിച്ചിലും റാഷുകളും ഒഴിവാക്കാൻ സഹായിക്കും.

തൈര്, തേൻ എന്നിവ ഉപയോഗിച്ചുള്ള ലളിതമായ ഫേസ് പാക്കുകൾ ചർമ്മത്തിലെ ക്ഷീണം മാറാൻ സഹായിക്കും. എന്നാൽ നാരങ്ങാനീര്, ബേക്കിംഗ് സോഡ തുടങ്ങിയവ നേരിട്ട് ചർമ്മത്തിൽ ഉപയോഗിക്കുന്നത് ഒഴിവാക്കണം, ഇത് അസ്വസ്ഥതകൾക്ക് കാരണമായേക്കാം. മുഖത്തുണ്ടാകുന്ന പാടുകൾക്കോ കുരുക്കൾക്കോ ഡോക്ടറുടെ നിർദേശമില്ലാതെ സ്റ്റിറോയിഡ് ക്രീമുകൾ ഉപയോഗിക്കരുത്. സെൻസിറ്റീവ് ചർമ്മമുള്ളവർ പുതിയ പരീക്ഷണങ്ങൾ ചെയ്യുന്നതിന് മുൻപ് ഒരു ചർമ്മരോഗ വിദഗ്ധന്റെ ഉപദേശം തേടുന്നത് ഉചിതമായിരിക്കും.

ആത്മീയമായ വ്രതാനുഷ്ഠാനങ്ങൾക്കൊപ്പം തന്നെ ശാരീരികമായ കരുതലും ഉറപ്പാക്കുന്നത് ഈ പുണ്യമാസത്തെ കൂടുതൽ സുഖകരമാക്കും. മഴക്കാലത്തെ വെല്ലുവിളികളെയും തിരക്കിട്ട യാത്രകളെയും നേരിടാൻ ഈ ലളിതമായ കാര്യങ്ങൾ പിന്തുടരാം. കൃത്യമായ ശുചിത്വം പാലിക്കുന്നത് ഈ സീസണിലുടനീളം നിങ്ങൾക്ക് ഉന്മേഷം നൽകും. മഴക്കാലത്തെ ചർമ്മ പ്രശ്നങ്ങളിൽ നിന്ന് സുരക്ഷിതമായി ഇരുന്നുകൊണ്ട് ഈ സാവൻ കാലം ആസ്വദിക്കൂ.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.