ഗണേശ വിസർജനത്തിന് ശേഷം ചർമ്മവും മുടിയും സുരക്ഷിതമാക്കാം; അണുബാധയൊഴിവാക്കാൻ ഈ കാര്യങ്ങൾ ശ്രദ്ധിക്കൂ

സെപ്റ്റംബർ 25-ഓടെ ഗണേശ വിസർജന ചടങ്ങുകൾ പൂർത്തിയായെങ്കിലും, മുംബൈ, പൂനെ, സൂറത്ത് എന്നീ നഗരങ്ങളിൽ രാത്രി മുഴുവൻ നീണ്ട ഘോഷയാത്രകൾ ഇന്നും തുടരുകയാണ്. ഘാട്ടുകളിലും കടൽത്തീരങ്ങളിലും വലിയ തിരക്കാണ് അനുഭവപ്പെടുന്നത്. ഗതാഗത നിയന്ത്രണങ്ങളും പൊതുഗതാഗത സർവീസുകളുടെ സമയം നീട്ടിയതുമെല്ലാം യാത്രക്കാരെ ബാധിച്ചിട്ടുണ്ട്. വിസർജന വെള്ളത്തിൽ ഇറങ്ങുകയോ അല്ലെങ്കിൽ നിറങ്ങൾ നിറഞ്ഞ റൂട്ടുകളിലൂടെ യാത്ര ചെയ്യുകയോ ചെയ്തവരാണോ നിങ്ങൾ? എങ്കിൽ ചർമ്മത്തിലും തലയോട്ടിയിലും അലർജിയും അണുബാധയും ഉണ്ടാകാതിരിക്കാൻ ഉടനടി വൃത്തിയാക്കേണ്ടത് അത്യാവശ്യമാണ്. ചർമ്മത്തെ സംരക്ഷിക്കാൻ സഹായിക്കുന്ന ലളിതമായ ചില വഴികൾ ഇതാ.

10 മിനിറ്റ് നീളുന്ന ഒരു കുളിയിലൂടെ ഇത് സാധ്യമാക്കാം. ആദ്യം തലമുതൽ പാദം വരെ ശുദ്ധജലത്തിൽ നന്നായി കഴുകി ചളിയും നിറങ്ങളും കളയുക. മൃദുവായ സോപ്പോ ഫെയ്‌സ് വാഷോ ഉപയോഗിച്ച് കഴുകാം. തലയോട്ടിയിൽ ഷാംപൂ ഉപയോഗിച്ച് നന്നായി തേച്ചുപിടിപ്പിച്ച് കഴുകുക. കണ്ണുകളും മുഖവും ശരീരവും വൃത്തിയാക്കിയ ശേഷം, മടക്കുകളുള്ള ഭാഗങ്ങൾ ടവൽ ഉപയോഗിച്ച് തുടച്ച് ഉണക്കുക. ചെവിയിൽ വെള്ളം കയറിയിട്ടുണ്ടെങ്കിൽ തല വശങ്ങളിലേക്ക് ചരിപിടിച്ച് വെള്ളം കളഞ്ഞ് പുറംഭാഗം ഉണങ്ങിയ ടവൽ കൊണ്ട് തുടയ്ക്കാം. അതിനുശേഷം ഉടനടി ഈർപ്പമില്ലാത്ത അയഞ്ഞ വസ്ത്രങ്ങളിലേക്ക് മാറുക.

ഗണേശ വിസർജനം: ചർമ്മത്തിന്റെയും തലയോട്ടിയുടെയും ശുചിത്വം എങ്ങനെ പാലിക്കാം?

ഉഷ്ണവും വിയർപ്പും തിരക്കിൽപ്പെടുന്നതുമെല്ലാം ഹ്യുമിഡിറ്റിയുള്ള അന്തരീക്ഷത്തിൽ ഫംഗൽ അണുബാധകൾക്കും ഫോളികുലൈറ്റിസിനും (രോമകൂപങ്ങളിലെ അണുബാധ) കാരണമാകാം. അതിനാൽ തിരികെ വീട്ടിലെത്തിയാൽ ഉടൻ തന്നെ കുളിച്ച് വിയർത്ത വസ്ത്രങ്ങൾ മാറ്റുക. നിങ്ങൾക്ക് തേമസ് (tinea versicolor) അല്ലെങ്കിൽ തലയോട്ടിയിൽ താരൻ പോലുള്ള പ്രശ്നങ്ങൾ വരാൻ സാധ്യതയുണ്ടെങ്കിൽ, സെലിനിയം സൾഫൈഡ് അല്ലെങ്കിൽ കെറ്റോകൊനസോൾ അടങ്ങിയ ആൻ്റി-ഡാണ്ട്രഫ് ഷാംപൂ ബോഡി വാഷ് ആയി ഉപയോഗിക്കാം. കുളിച്ച ശേഷം ശരീരം നന്നായി തുടച്ച് ഈർപ്പമില്ലാതെ സൂക്ഷിക്കുക.

ഗണേശ വിസർജനം: തിളക്കമുള്ള പൊടികളും ഗുലാലും സുരക്ഷിതമായി എങ്ങനെ നീക്കം ചെയ്യാം?

കൃത്രിമ ഗുലാലുകളിൽ വീര്യമേറിയ ഡൈകളും മൈക്കയും അടങ്ങിയിട്ടുള്ളതിനാൽ ഇത് ചർമ്മത്തിൽ മുറിവുകളും അലർജിയും ഉണ്ടാക്കാം. ചെറുചൂടുവെള്ളവും വീര്യം കുറഞ്ഞ ക്ലെൻസറും ഉപയോഗിച്ച് ചർമ്മം മെല്ലെ കഴുകുക. സ്ക്രബ്ബ്, മണ്ണെണ്ണ, ബ്ലീച്ച് തുടങ്ങിയവ ഉപയോ​ഗിച്ച് ഉരച്ച് കഴുകരുത്. ചർമ്മത്തിൽ ഒട്ടിപ്പിടിച്ച തിളക്കമുള്ള പൊടികളോ സ്റ്റിക്കർ പൊട്ടുകളോ ഗ്ലൂവോ കളയാൻ പെട്രോളിയം ജെല്ലിയോ മിനറൽ ഓയിലോ പുരട്ടി സോഫ്റ്റാക്കിയ ശേഷം തുടച്ചു മാറ്റുക. അടുത്ത തവണ ആഘോഷങ്ങളിൽ പങ്കെടുക്കുമ്പോൾ ഓർഗാനിക് അല്ലെങ്കിൽ ബയോഡീഗ്രേഡബിൾ നിറങ്ങൾ മാത്രം തിരഞ്ഞെടുക്കാൻ ശ്രദ്ധിക്കുക.

ഗണേശ വിസർജനം: കണ്ണ്, ചെവി, മുറിവുകൾ എന്നിവയിലെ ശ്രദ്ധ

കണ്ണിൽ നിറങ്ങൾ വീണാൽ ഉടൻ തന്നെ കുറച്ചു സമയത്തേക്ക് ശുദ്ധജലം ഒഴിച്ച് കഴുകുക. യാതൊരു കാരണവശാലും സ്വയം ഐ ഡ്രോപ്സുകൾ വാങ്ങി ഉപയോഗിക്കരുത്. കണ്ണിന് കടുത്ത വേദനയോ, വെളിച്ചത്തിലേക്ക് നോക്കാൻ ബുദ്ധിമുട്ടോ, കാഴ്ചമങ്ങലോ ഉണ്ടെങ്കിൽ ഉടൻ തന്നെ ഡോക്ടറെ കാണുക. കുളിച്ച ശേഷം ചെവി നന്നായി ഉണക്കി സൂക്ഷിക്കുന്നത് 'സ്വിമ്മേഴ്സ് ഇയർ' പോലുള്ള അണുബാധകൾ തടയും. ചെറിയ മുറിവുകളുണ്ടെങ്കിൽ വീര്യം കുറഞ്ഞ സോപ്പും വെള്ളവും ഉപയോഗിച്ച് കഴുകി പെട്രോളിയം ജെല്ലി പുരട്ടുക; ആവശ്യമെങ്കിൽ മുറിവ് വച്ചുകെട്ടാം. കുട്ടികളുടെയും മുതിർന്നവരുടെയും കാര്യത്തിൽ പ്രത്യേക ശ്രദ്ധ വേണം.

ഗണേശ വിസർജനം: ഈ ലക്ഷണങ്ങൾ കണ്ടാൽ ഉടൻ ഡോക്ടറെ കാണുക

മഴക്കാലത്ത് മുംബൈയിലെ വിസർജന വെള്ളവുമായുള്ള സമ്പർക്കത്തിന് ശേഷം പനി ഉണ്ടായാൽ ജാഗ്രത വേണം. പനിയോടൊപ്പം കടുത്ത കണങ്കാൽ വേദന, ചർമ്മത്തിൽ പടരുന്ന തിണർപ്പുകൾ, കണ്ണ് വേദന, ചെവിയിൽ നിന്ന് ദ്രാവകം വരിക, മുറിവുകളിൽ ചുവപ്പുനിറവും വീക്കവും കൂടുക എന്നിവ കണ്ടാൽ ഉടൻ ചികിത്സ തേടുക. പ്രത്യേകിച്ച് കുട്ടികൾ, മുതിർന്നവർ, പ്രമേഹ രോഗികൾ എന്നിവർ ഇക്കാര്യത്തിൽ ശ്രദ്ധിക്കണം. മലിനജലവുമായി സമ്പർക്കമുണ്ടായി 24 മുതൽ 72 മണിക്കൂറിനുള്ളിൽ തന്നെ ആവശ്യമെങ്കിൽ വൈദ്യപരിശോധന നടത്തണമെന്ന് ആരോഗ്യ മുന്നറിയിപ്പിൽ പറയുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.