സാരിയുടുത്താല്‍ ക്യാന്‍സര്‍

ഇന്ത്യന്‍ മെഡിക്കല്‍ അസോസിയേഷന്‍ ജേര്‍ണലില്‍ പ്രസിദ്ധീകരിച്ച ഒരു ലേഖനത്തിലാണ് ഇത് സംബന്ധിച്ച പരാമര്‍ശമുള്ളത്. മുംബൈയിലെ ഗ്രാന്റ് മെഡിക്കല്‍ കോളേജിലെ ഡോക്ടര്‍മാരാണ് ഇക്കാര്യം വെളിപ്പെടുത്തിയതെന്ന് ലേഖനത്തില്‍ പറയുന്നു. സാരിയുടുക്കുന്നത് കാരണം ക്യാന്‍സര്‍ ബാധിച്ച മൂന്നു സ്ത്രീകളെ ചികിത്സിച്ചിട്ടുണ്ടെന്നായിരുന്നു അവരുടെ വെളിപ്പെടുത്തല്‍.

അരക്കെട്ടിലാണ് ഇത്തരം ക്യാന്‍സര്‍ കണ്ടത്. ദിവസവും ഒരേ സ്ഥലത്ത് സാരിയും അതിനായുള്ള പാവാടയും മുറുക്കി കെട്ടുന്നതാണ് ഇതിന് കാരണമായി പറയുന്നത്. ഇത് ചര്‍മത്തില്‍ അലര്‍ജിയും ചൊറിച്ചിലും ഉണ്ടാക്കുന്നു. ഭാവിയില്‍ ഇത് ക്യാന്‍സറിലേക്കു തിരിയുകയും ചെയ്യും. എന്നാല്‍ ഭൂരിഭാഗം ആളുകളും ഇത് ശ്രദ്ധിക്കാറില്ല.

എന്നാല്‍ പാന്റ്‌സും അതുപോലുള്ള മറ്റ് ഇറുകിയ വസ്ത്രങ്ങളും ഈ പ്രശ്‌നങ്ങളുണ്ടാക്കുന്നില്ല. ഇവയുടെ മര്‍ദം ശരീരത്തിന്റെ എല്ലാ ഭാഗത്തേക്കും വ്യാപിക്കുന്നതിനാലാണ് ഇത്. പാവാട ധരിക്കുമ്പോഴാകട്ടെ ഇതിന്റെ നാട മുറുക്കിക്കെടുന്നതും അതിനു മുകളില്‍ സാരി കുത്തുന്നതും ഒരേ ഭാഗത്തു തന്നെ കൂടുതല്‍ മര്‍ദമേല്‍പിക്കുകയാണ് ചെയ്യുന്നത്.

തുടക്കത്തിലേ കണ്ടെത്തിയിരുന്നെങ്കില്‍ ചികിത്സിച്ചു മാറ്റാമായിരുന്ന ഈ ക്യാന്‍സര്‍ സ്ത്രീകളില്‍ ലിംഫിലേക്കു വ്യാപിച്ചിരുന്നു. ഇത് മുഴകളായി രൂപാന്തരപ്പെട്ടതിനാല്‍ ശസ്ത്രക്രിയയിലൂടെ ഇവ നീക്കം ചെയ്യുകയായിരുന്നു.

സാരി ഉടുക്കുമ്പോള്‍ അധികം മുറുക്കി ഉടുക്കാതിരിക്കുക, പാവാടയുടെ നാട ഒരേ സ്ഥലത്തു തന്നെ ദിവസവും കെട്ടാതിരിക്കുക എന്നിവയാണ് സാരി കൊണ്ടുണ്ടാവുന്ന ക്യാന്‍സര്‍ പ്രതിവിധിയായി ഡോക്ടര്‍മാര്‍ പറയുന്നത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.