ഗര്‍ഭധാരണം തടയാന്‍ പുരുഷന് കുത്തിവെയ്പ്

News

oi-Siji KM

By Lakshmi

Published: Monday, February 7, 2011, 14:21 [IST]

ഗര്‍ഭധാരണം തടയലും കുടുംബാസൂത്രണവുമെല്ലാം പലപ്പോഴും വന്നുപെടാറുള്ളത് സ്ത്രീകളുടെ തലയിലാണ്. പുരുഷന്മാര്‍ പലരും ഇക്കാര്യത്തില്‍ അസലമനോഭാവം കാണിക്കുന്നവരാണ്.

അസമയത്ത് ഗര്‍ഭംധരിക്കുന്നതും വ്യക്തമായ പദ്ധതിയില്ലാതെ ഒരു കുഞ്ഞ് കുടുംബത്തിലേയ്ക്ക് വരുന്നത് തടയലുമെല്ലാം ഭാര്യയുടെ വകുപ്പില്‍പ്പെടുന്നകാര്യമെന്ന ഭാവമാണവര്‍ക്ക്. ഇതിനായി പലപ്പോഴും മരുന്ന് കഴിക്കേണ്ടിവരുന്നത് സ്ത്രീകള്‍ക്കുതന്നെ.

എന്നാല്‍ ഇപ്പോഴിതാ പുരുഷസൗഹൃദമായ ഒരു ഗര്‍ഭനിരോധന ഗുളിക കണ്ടെത്തിയിരിക്കുന്നു. എഡിന്‍ബര്‍ഗ് സര്‍വ്വകലാശാലയിലെ ഗവേഷകരാണ് സവിശേഷമായ ഈ ഗുളിക കണ്ടെത്തിയിരിക്കുന്നത്. ബീജത്തിന്റെ എണ്ണം കുറച്ചാണ് ഇത് പുരുഷന്മാരില്‍ പ്രവര്‍ത്തിക്കുക.

ലോകാരോഗ്യ സംഘടന ഈ മരുന്ന് 200 ദമ്പതികളില്‍ പരീക്ഷിച്ചത് വന്‍വിജയമാണെന്നാണ് റിപ്പോര്‍ട്ട്. രണ്ടുമാസത്തിലൊരിക്കലാണത്രേ പുരുഷന്മാര്‍ ഈ മരുന്ന് കുത്തിവയ്‌ക്കേണ്ടത്. ടെസ്റ്റാസ്റ്റിറോണ്‍, പ്രൊഗസ്റ്ററോണ്‍ എന്നീ ഹോര്‍മോണുകള്‍ അടങ്ങിയതാണ് മരുന്നത്.

ഈ മരുന്ന് കുത്തിവച്ചാല്‍ പുരുഷ ബീജത്തിന്റെ കൗണ്ട് ലിറ്ററിന് 2 കോടിയില്‍ നിന്ന് പൂജ്യമോ ഒന്നോ ആയി കുറയുമെന്നാണ് ഗവേഷകര്‍ പറയുന്നത്.

ഗര്‍ഭനിരോധന ഉറയേക്കാളും സ്ത്രീകള്‍ ഉപയോഗിക്കുന്ന ഗര്‍ഭ നിരോധന ഗുളികയെക്കാളും വിജയമാണ് കുത്തിവയ്‌പ്പെന്ന് ഗവേഷകനായ പ്രൊഫസര്‍ റിച്ചാര്‍ഡ് ആന്‍ഡേഴ്‌സണ്‍ അവകാശപ്പെടുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.