20വര്‍ഷം പഴക്കമുള്ള ഭ്രൂണത്തില്‍ നിന്നും കുഞ്ഞ്

News

oi-Siji KM

By Lakshmi

Published: Tuesday, October 12, 2010, 12:17 [IST]

ന്യൂയോര്‍ക്ക്: ഇരുപത് വര്‍ഷത്തോളം ശീതീകരിച്ച് സൂക്ഷിച്ച ഭ്രൂണത്തില്‍ നിന്നും കുഞ്ഞ് പിറന്നു. നാല്‍പ്പത്തിരണ്ടുകാരിയാണ് ഈ കുഞ്ഞിന് ജന്മം നല്‍കിയിരിക്കുന്നത്.

ശീതീകരിച്ച് സൂക്ഷിച്ച ഭ്രൂണം സ്ത്രീയുടെ ഗര്‍ഭപാത്രത്തില്‍ നിക്ഷേപിക്കുകയായിരുന്നു. വെര്‍ജിനിയയിലെ ഇസ്റ്റേണ്‍ വെര്‍ജീനിയ മെഡിക്കല്‍ സ്‌കൂളിലെ ജോണ്‍സ് ഇന്‍സ്റ്റിറ്റിയൂട്ട് ഫോര്‍ റീപ്രൊഡക്ടീവ് മെഡിസിനിലാണ് കുഞ്ഞ് ജനിച്ചത്.

ഇവിടെവച്ചുതന്നെയാണ് പരീക്ഷണാര്‍ത്ഥം ശീതീകരിച്ച ഭ്രൂണം സ്ത്രീയുടെ ഗര്‍ഭപാത്രത്തില്‍ നിക്ഷേപിയ്ക്കുകയും തുടര്‍ന്നുള്ള ചികിത്സകള്‍ നല്‍കുകയും ചെയ്തത്. പത്തുവര്‍ഷമായി ഈ സ്ത്രീ വന്ധ്യതാ നിവാരണത്തിനായി ചികിത്സ നടത്തി വരുകയായിരുന്നുവെന്ന് അവരെ ചികിത്സിച്ച ഡോക്ടര്‍ പറഞ്ഞു.

19 വര്‍ഷവും 7മാസവുമാണ് ഭ്രൂണം ശീതീകരിച്ച് സൂക്ഷിച്ചത്. മുമ്പ് വന്ധ്യതാനിവാരണ ചികിത്സയ്‌ക്കെത്തിയ പേരുവെളിപ്പെടുത്താത്ത ദമ്പതികളാണ് ചികിത്സ വിജയിച്ചപ്പോള്‍ ഒരു ഭ്രൂണം ജോണ്‍സ് ഇന്‍സ്റ്റിറ്റിയൂട്ടിന് നല്‍കിയത്.

ഇത്തരത്തില്‍ അഞ്ച് ഭ്രൂണങ്ങളായിരുന്നുവത്രേ ഇവിടെ ശീതീകരിച്ച് സൂക്ഷിച്ചിരുന്നത്. ഇതില്‍ കാലത്തെ അതിജീവിച്ചത് ഒന്നുമാത്രമാണ്. അതാണ് സ്ത്രീയുടെ ഗര്‍ഭപാത്രത്തില്‍ നിക്ഷേപിച്ചത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.