10വര്‍ഷത്തേയ്ക്ക് ഗര്‍ഭധാരണം തടയാന്‍ ഗുളിക

News

oi-Siji KM

By Lakshmi

Published: Saturday, June 19, 2010, 12:58 [IST]

ഏറെക്കാലത്തേയ്ക്ക് കുട്ടികള്‍വേണ്ടെന്ന് ആഗ്രഹിക്കുന്നവര്‍ക്ക ഒരു സന്തോഷവാര്‍ത്ത, ബുദ്ധിമുട്ടേതുമില്ലാതെ ഒറ്റ ഡോസുകൊണ്ട് പത്തുവര്‍ഷത്തോളം ഗര്‍ഭധാരണം തടയാന്‍ ശേഷിയുള്ള ഗുളിക തയ്യാറാവുന്നു.

ഇന്ത്യന്‍ കൗണ്‍സില്‍ ഓഫ് മെഡിക്കല്‍ സയന്‍സിലെ ഗവേഷകരാണ് ഈ മരുന്ന് വികസിപ്പിച്ചെടുത്തതായി അവകാശപ്പെടുന്നത്.

ഒറ്റഡോസ് പത്തുവര്‍ഷത്തേയ്ക്ക് ഫലപ്രദമാണെന്നതാണ് ഈ മരുന്നിന്റെ പ്രത്യേകത. അതുകൊണ്ടുതന്നെ ദിവസവുമുള്ള ഉപയോഗം, അതുമറന്നുപോകുമ്പോഴുണ്ടാകുന്ന മാനസികപിരിമുറുക്കം എന്നിവയില്‍ നിന്നും ഒഴിവാകാം.

ബീജവാഹിനികുഴലില്‍ ഭാഗികമായി തടസ്സമുണ്ടാക്കിക്കൊണ്ടാണത്രേ ഈ മരുന്ന് പ്രവര്‍ത്തിക്കുക. ഇത് ഫലപ്രദമാണെന്ന് ഇന്ത്യന്‍ കൌണ്‍സില്‍ ഓഫ് മെഡിക്കല്‍ റിസര്‍ച്ചിന്റെ ഉപവിഭാഗമായ റിപ്രൊഡക്ടീവ് ഹെല്‍ത്ത് തലവന്‍ ഡോക്ടര്‍ആര്‍. എസ്. ശര്‍മ്മ പറഞ്ഞു.

ഗര്‍ഭനിരോധനത്തിന് നൂതനമാര്‍ഗങ്ങളെക്കുറിച്ച് ഗവേഷണങ്ങള്‍ പുരോഗമിക്കുന്ന ഇന്ത്യയില്‍ ഈ കണ്ടെത്തല്‍ വഴിത്തരിവാകുമെന്നാണ് പൊതുവേ വിലയിരുത്തപ്പെടുന്നത്.

മരുന്നിന്റെ സാങ്കേതിക ഫോര്‍മുലയ്ക്കായി പല വിദേശകമ്പനികളും മുന്നോട്ടുവന്നിട്ടുണ്ടെന്ന് ഗവേഷകര്‍ പറയുന്നു. മരുന്ന് വൈകാതെ വിപണിയിലെത്തിക്കാനുള്ള ഒരുക്കത്തിലാണ് ഇന്ത്യന്‍ കൌണ്‍സില്‍ ഓഫ് മെഡിക്കല്‍ റിസര്‍ച്ച്

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.