കാറോടിക്കുന്നവര്‍ സൂക്ഷിക്കുക

സൈക്കിള്‍, ബൈക്ക്‌ എന്നിവയിലെ സവാരിയും മൊബൈല്‍ ഫോണ്‍ അരയില്‍ സൂക്ഷിക്കുന്നതുമെല്ലാം വന്ധ്യതയ്‌ക്ക്‌ കാരണമായേയ്‌ക്കുമെന്ന വാര്‍ത്തകള്‍ക്ക്‌ പിന്നാലെ പുരുഷന്മാരുടെ ഉറക്കം കെടുത്തുന്ന മറ്റൊരു വാര്‍ത്തകൂടി.

ഇത്തവണ കാറാണ്‌ വില്ലനായിരിക്കുന്നത്‌. കാറിന്റെ സീറ്റിനുണ്ടാകുന്ന ചൂട്‌ ബീജോല്‍പാദനത്തെ ബാധിക്കുമെന്നാണ്‌ റിപ്പോര്‍ട്ട്‌. ജര്‍മ്മനിയിലെ ജിയസ്സണ്‍ യൂണിവേഴ്‌സിറ്റിയിലെ ആന്‍ഡ്രിയാസ്‌ ജങ്‌ ആണ്‌ ഇതുസംബന്ധിച്ച പഠനം നടത്തിയത്‌.

മുപ്പത്‌ ആരോഗ്യവാന്മാരായ പുരുഷന്മാരില്‍ നിരീക്ഷണം നടത്തിക്കൊണ്ടാണ്‌ ജങ്‌ പഠനം പൂര്‍ത്തിയാക്കിയത്‌. സാധാരണനിലയില്‍ ആരോഗ്യമുള്ള ബീജങ്ങള്‍ സൃഷ്ടിക്കപ്പെടാന്‍ 35മുതല്‍ 36 ഡിഗ്രി സെല്‍ഷ്യസ്‌ വരെ ചൂട്‌ ആവശ്യമാണ്‌. അതുകൊണ്ടുതന്നെയാണ്‌ വൃഷണങ്ങള്‍ ശരീരത്തിന്റെ പ്രധാനഭാഗത്തിന്‌ പുറത്തായി സ്ഥാപിക്കപ്പെട്ടതും.

എന്നാല്‍ ഈ പരിമിതമായ അളവില്‍ക്കൂടുതല്‍ ചൂട്‌ വൃഷണങ്ങളില്‍ ഏല്‍ക്കുമ്പോള്‍ ബീജോല്‍പാദനത്തില്‍ കുറവുണ്ടാകുമത്രേ. കാറ്‌ ഡ്രൈവ്‌ ചെയ്യുമ്പോഴാണ്‌ പ്രധാനമായും ഈ പ്രശ്‌നം ഉണ്ടാവുന്നത്‌. പ്രതിദിനം മൂന്നുമണിക്കൂറെങ്കിലും കാറോടിക്കുന്നയാളാണ്‌ ഭര്‍ത്താവെങ്കില്‍ ഭാര്യ ഗര്‍ഭം ധരിക്കാന്‍ കൂടതല്‍ കാലതാമസമുണ്ടാകുമെന്നാണ്‌ ജങ്‌ പറയുന്നത്‌.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.