വെള്ളക്കോളറിന് നടുവേദന!

വെള്ളക്കോളര്‍ ജോലിക്കാരെ ഏറ്റവും ആദ്യം പിടികൂടുന്ന രോഗം എന്തെന്ന്‌ ചോദിച്ചാല്‍ ഒട്ടും സംശയിക്കാതെ ഉത്തരം പറയാം നടുവേദന(ബാക്‌ പെയിന്‍).

ഈയിടെ ഇന്ത്യയിലെ എട്ട്‌ നഗരങ്ങളില്‍ നടത്തിയ പഠനത്തിലും ഇതുതന്നെയാണ്‌ കണ്ടെത്തിയിരിക്കുന്നത്‌. ഇന്ത്യയിലെ വെള്ളക്കോളര്‍ ജോലിക്കാരില്‍ 67ശതമാനവും നടുവേദന അനുഭവിയ്‌ക്കുന്നവരാണ്‌. പഠനത്തിനായി നടത്തിയ സര്‍വ്വേയില്‍ പങ്കെടുത്ത 25നും 40 നും ഇടയിലുള്ള 3,2000 പ്രൊഫഷണലുകളും നടുവേദന അനുഭവപ്പെടുന്നതായി വ്യക്തമാക്കിയിട്ടുണ്ട്‌.

തുടര്‍ച്ചയായി എട്ടുമണിക്കൂറോളം ഒരേപോലെ ഇരുന്ന്‌ ജോലിചെയ്യാന്‍ തുടങ്ങിയതിനെത്തുടര്‍ന്നാണ്‌ പലര്‍ക്കും നടുവേദന തുടങ്ങിയത്‌. ഹെല്‍ത്ത്‌ കെയര്‍ സൊസൈറ്റി എന്ന എന്‍ജിഒ ആണ്‌ ഇതുസംബന്ധിച്ച പഠനം നടത്തിയത്‌.

മുംബൈയിലാണ്‌ നടുവേദനക്കാരുടെ എണ്ണം ഏറ്റവും കൂടുതല്‍. ഇവിടെ 56ശതമാനം പേരും വേദന അനുഭവിക്കുന്നവരാണ്‌. ദില്ലിയില്‍ 51 ശതമാനം പേരാണ്‌ നടുവേദന അനുഭവപ്പെടുന്നതായി പറഞ്ഞത്‌. ഇവരില്‍ 34.5 ശതമാനം പേരും ട്രാന്‍സ്‌പോര്‍ട്ട്‌ ബസ്സുകളിലെ യാത്രയാണ്‌ നടുവേദനയ്‌ക്ക്‌ കാരണമായി പറഞ്ഞത്‌. ബിപിഒ, ഐടി മേഖല, മാധ്യമം എന്നീ മേഖലകളില്‍ പ്രവര്‍ത്തിക്കുന്നവരിലാണ്‌ നടുവേദന കൂടുതലായും കാണപ്പെടുന്നത്‌.

മുമ്പ്‌ നടുവേദനയെന്നാല്‍ പ്രായാധിക്യത്തെത്തുടര്‍ന്നുണ്ടാകുന്ന അസുഖമെന്നാണ്‌ കരുതിയിരുന്നത്‌. എന്നാല്‍ ഇന്ന്‌ ആളുകള്‍ക്കെല്ലാം ചെറിയ പ്രായത്തില്‍ത്തന്നെ ഈ അസുഖം പിടിപെടുകയാണെന്ന് ഹെല്‍ത്ത്‌ കെയര്‍ സൊസൈറ്റിയുടെ മേധാവി അനുപ്‌ സിംഗ്‌ ചൂണ്ടിക്കാട്ടുന്നു.

ജോലിയ്‌ക്കടിയില്‍ ശരിയായ രീതിയില്‍ ഇരിയ്‌ക്കാത്തതാണ്‌ മിക്കവര്‍ക്കും അസുഖം വരാന്‍ കാരണമെന്നാണ്‌ ഡോക്ടര്‍മാര്‍ പറയുന്നത്‌. നിവര്‍ന്നിരിക്കുകയെന്നത്‌ മാത്രമല്ല ജോലിയ്‌ക്കിടയില്‍ രണ്ടുമണിക്കൂര്‍ ഇടവിട്ട്‌ ഇടവേളകളെടുക്കുകയും എഴുന്നേറ്റു നടക്കുകയും വേണമെന്നും ഡോക്ടര്‍മാര്‍ മുന്നറിയിപ്പും തരുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.