20 വര്‍ഷത്തിനകം 21 കോടി ഇന്ത്യക്കാര്‍ രക്തസമ്മര്‍ദ രോഗികള്‍

2025 ആകുന്പോഴേയ്‌ക്കും ഇന്ത്യയിലെ 21.25 കോടി ജനങ്ങള്‍ ഉയര്‍ന്ന രക്തസമ്മര്‍ദ്ദം മൂലമുള്ള ആരോഗ്യ പ്രശ്‌നങ്ങള്‍ അഭിമുഖീകരിയ്‌ക്കേണ്ടി വരുമെന്ന്‌ പ്രമുഖ ഹൃദയാരോഗ്യ വിദഗ്‌ധനും കേരള ഹാര്‍ട്‌ കേര്‍ സൊസൈറ്റിയുടെ പ്രസിഡന്റുമായ ഡോ. കെ കു‍ഞ്ഞാലി.

2000ത്തില്‍ ഇന്ത്യയില്‍ 11.82 കോടി ജനങ്ങളിലാണ്‌ ഉയര്‍ന്ന രക്തസമ്മര്‍ദ്ദമുണ്ടെന്ന്‌ കണ്ടെത്തിയത്‌. ലോകത്താകമാനം നോക്കുകയാണെങ്കില്‍ 97.2 കോടി ജനങ്ങളിലാണ്‌ ഈ പ്രശ്‌നം കണ്ടിട്ടുള്ളത്‌. ഇത്‌ 2025 ആകുന്പോഴേയ്‌ക്കും 156 കോടിയാകുമെന്നാണ്‌ കണക്കാക്കപ്പെടുന്നത്‌.

ഹൃദയ സംബന്ധമായ രോഗങ്ങള്‍ക്ക്‌ വലിയൊരളവുവരെ കാരണമാകുന്നത്‌ അമിത രക്തസമ്മര്‍ദ്ദമാണ്‌. ഇന്ത്യയില്‍ 45 ശതമാനത്തില്‍ കുറവ്‌ ആളുകള്‍ക്ക്‌ മാത്രമേ ഈ രോഗത്തെക്കുറിച്ച്‌ വേണ്ടത്ര ധാരണയുള്ളു. ഇതില്‍ പകുതിയിലേറെപ്പേരും ചികിത്സയിലാണെന്നത്‌ മറ്റൊരു ഗൗരവതരമായ കാര്യമാണ്‌. നാഗരിക ജനങ്ങളില്‍ 25ശതമാനം പേരും അമിത രക്തസമ്മര്‍ദ്ദമുള്ളവരാണ്‌. ഗ്രാമീണ ജനതിയിലാകട്ടെ ഇത്‌ 10 ശതമാനം മാത്രമാണ്‌.

ഇതില്‍ നിന്നുതന്നെ വളരെ വേഗത്തില്‍ മാറിക്കൊണ്ടിരിയ്‌ക്കുന്ന ജീവിതരീതിയും ഭക്ഷണ സംസ്‌കാരവുമാണ്‌ അസുഖത്തിന്‍റെ പ്രധാനകാരണമെന്ന്‌ മനസ്സിലാക്കാവുന്നതാണ്‌. പെട്ടെന്ന് തിരിച്ചറിയപ്പെടാത്ത രീതിയാലാണ്‌ ഈ അവസ്ഥ ശരീരത്തിലുണ്ടാകുന്നത്‌. ശരീരത്തിന്‌ വേണ്ടത്ര അധ്വാനം നല്‍കുകയും ഭാരം കൂടാതെ സൂക്ഷിയ്‌ക്കകയുമാണ്‌ രോഗത്തെച്ചെറുക്കാന്‍ ആദ്യം ചെയ്യേണ്ടത്‌.

പഴങ്ങളും പച്ചക്കറികളും വേണ്ടത്ര ഭക്ഷണത്തില്‍ ഉള്‍പ്പെടുത്തുക. കൊഴുപ്പിന്റെയും സോഡിയത്തിന്റെയും അംശം നിയന്ത്രിയ്‌ക്കുക. പുകയില, മദ്യം എന്നിവ തീര്‍ത്തും വര്‍ജ്ജിയ്‌ക്കുക. മദ്യം ഒഴിച്ചുകൂടാന്‍ കഴിയാത്തതാണെങ്കില്‍ രണ്ട്‌ പെഗ്‌ എന്ന രീതിയില്‍ നിയന്ത്രിച്ച്‌ രക്ത സമ്മര്‍ദ്ദം പതിവായി പരിശോധിയ്‌ക്കുക ഇത്രയും കാര്യങ്ങള്‍ ചെയ്യുന്പോള്‍ തന്നെ രക്തസമ്മര്‍ദ്ദം നമ്മുടെ വരുതിയില്‍ കൊണ്ടുവരാന്‍ കഴിയും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.