ബീജബാങ്ക് വഴി സൗന്ദര്യമുള്ള കുട്ടികള്‍

Living

oi-Siji KM

By Lakshmi

Published: Saturday, June 26, 2010, 16:33 [IST]

കണ്ടാല്‍ ഒന്നെടുത്ത് ഓമനിക്കാന്‍ ആര്‍ക്കും തോന്നുന്ന രീതിയില്‍ ക്യൂട്ട് ആയ കുട്ടികളെ കിട്ടണമെന്ന് ആഗ്രഹിക്കാത്ത ദമ്പതിമാരുണ്ടാകില്ല. എന്നാല്‍ എല്ലാവര്‍ക്കും ഇങ്ങനെ സൗന്ദര്യമുള്ള കുട്ടികളെ കിട്ടിക്കൊള്ളണമെന്നില്ല, ദമ്പതികളുടെ ജീനിന്റെ സ്വഭാവമായിരിക്കും കുട്ടികളുടെ രൂപത്തെയും സ്വഭാവത്തെയുമെല്ലാം നിര്‍ണയിക്കുന്നത്.

എന്നാല്‍ സൗന്ദര്യമുള്ള കുട്ടികള്‍ വേണമെന്ന് ആഗ്രഹിക്കുന്നവര്‍ക്ക് മറ്റൊരു വഴിയുണ്ട്, സുന്ദരന്മാരായ പുരുഷന്മാരുടെ ബീജം ഉപയോഗിക്കുക. ഇതെങ്ങനെ സാധിക്കുമെന്നല്ലേ. ഇതിനായി മാത്രമായി ഒരു ബീജബാങ്ക് തുറന്നിരിക്കുകയാണ് ബ്രിട്ടനില്‍. എതിര്‍പ്പുകള്‍ ഏറെയുണ്ടായെങ്കിലും ബാങ്കിന്റെ പ്രവര്‍ത്തനം മുന്നോട്ടുകൊണ്ടുപോകാനാണ് ഉടമകളുടെ തീരുമാനം.

ബ്യൂട്ടിഫുള്‍പീപ്പിള്‍ ഡോട്ട് കോം എന്ന സൈറ്റില്‍ കയറി ബീജം നല്‍കിയ സുന്ദരന്മാരുടെ ചിത്രങ്ങള്‍ കണ്ടെത്താം. ഇതില്‍ നിന്നും ഇഷ്്ടപ്പെട്ടയാളെ തിരഞ്ഞെടുക്കുക, അതിനുശേഷം ആവശ്യക്കാര്‍ ചോദിക്കുന്ന പണം നല്‍കിയാല്‍ ഇയാളുടെ ബീജം ലഭിയ്ക്കും. ഇത് കൃത്രിമ ബീജസങ്കലനത്തിലൂടെ ഗര്‍ഭപാത്രത്തിലെത്തിച്ചാല്‍ സുന്ദരനോ സുന്ദരിയോ ആയ കുട്ടിയ്ക്ക് ജന്മം നല്‍കാം.

കുട്ടികളില്ലാത്ത ദമ്പതിള്‍ക്കോ, കുട്ടികളെ ആവശ്യമുള്ള യുവതികള്‍ക്കോ ഈ വെബ്‌സൈറ്റ് സന്ദര്‍ശിക്കാവുന്നതാണ്. തുടക്കത്തില്‍ സൗന്ദര്യമുള്ളവരെ മാത്രമാണ് ബീജബാങ്കില്‍ അംഗങ്ങളാക്കിയിരുന്നത്. എന്നാല്‍ ഇപ്പോള്‍ ആര്‍ക്കും ബാങ്കില്‍ അംഗമാകാം.

വിരൂപരായവര്‍ പലപ്പോഴും ജന്മം നല്‍കുന്നത് സുന്ദരന്മാരും സുന്ദരിമാരുമായ കുട്ടികള്‍ക്കാണ്. അതുകൊണ്ട് വിരൂപരായവരെപ്പോലും ബീജബാങ്കില്‍ ഉള്‍പ്പെടുത്താന്‍ തീരുമാനിച്ചുവെന്നാണ് ് ബീജബാങ്കിന്റെ സ്ഥാപകനായ റോബര്‍ട്ട് ഹിന്റ്‌സെ പറയുന്നത്.

ബ്രിട്ടനിലെ മനുഷ്യാവകാശ സംഘടനയായ വാച്ച്‌ഡോഗ്' ബീജബാങ്കിനെതിരെ ശക്തമായി രംഗത്തിറങ്ങിയിട്ടുണ്ട്. വാച്ച് ഡോഗിന്റെ പേട്രണായ ഡോക്ടര്‍ ഡേവിഡ് കിങ് പറയുന്നതിങ്ങനെയാണ്-ഈ ബീജബാങ്ക് നമ്മുടെ സമൂഹത്തില്‍ വളരെ വിപരീതമായ പ്രത്യാഘാതങ്ങള്‍ സൃഷ്ടിക്കും.

ജനനത്തെയും ജനിക്കുന്ന കുട്ടിയുടെ സൗന്ദര്യത്തേയും നമുക്ക് നിയന്ത്രിക്കാനാവുമെന്ന തോന്നല്‍ മനുഷ്യനെ വളര്‍ത്തുകയല്ല, തളര്‍ത്തുകയേയുള്ളൂ. വേണ്ടതെല്ലാം വേണ്ടവിധത്തില്‍ ലഭിക്കുമെന്ന് അഹങ്കരിക്കാന്‍ ഇത് ഇടവരുത്തും.'

കാര്യമെന്തൊക്കെയായാലും 72,000 സുന്ദരപുരുഷന്മാര്‍ ഇപ്പോള്‍ത്തന്നെ ബ്യൂട്ടിഫുള്‍ പീപ്പിള്‍.കോമില്‍ രജിസ്റ്റര്‍ ചെയ്തുകഴിഞ്ഞു. വിവാദങ്ങളൊന്നും ബീജദാതാക്കളെ അലട്ടുന്നില്ലെന്നു ചുരുക്കം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.