ധനവാനെങ്കില്‍ പൊണ്ണത്തടി

Living

oi-Siji KM

By Lakshmi

Published: Tuesday, May 18, 2010, 14:13 [IST]

കുടവയറുള്ളവര്‍ പണക്കാരായിരിക്കുമെന്ന് നമ്മുടെ നാട്ടില്‍ കളിയാക്കിപ്പറയാറുണ്ട്, ശാസ്ത്രീയാടിസ്ഥാനമൊന്നുമില്ലാതെയാണ് ഇങ്ങനെ പറയുന്നതെങ്കിലും ഇതൊരു സത്യമാണെന്നാണ് കാനഡയില്‍ നടന്ന ഒരു പഠനത്തില്‍ കണ്ടെത്തിയിരിക്കുന്നത്.

ധനികരായ പുരുഷന്മാര്‍ക്ക് തടികൂടുതലായിരിക്കുമത്രേ, എന്നാല്‍ ധനാഢ്യരായ സ്ത്രീകള്‍ വണ്ണംകുറഞ്ഞുമിരിക്കും. കാനഡയിലെ യൂണിവേഴ്‌സിറ്റി ഓപ് മോണ്‍ട്രിയലിലെ സോഷ്യോളജി വകുപ്പാണ് ഇതുസംബന്ധിച്ച് പഠനം നടത്തിയത്.

പഠനം അതീവരസകരമായിരുന്നുവെന്നാണ് ഇതിന് നേതൃത്വം നല്‍കിയ പ്രൊഫസര്‍ നതാലി ഡ്യൂമസ് പറയുന്നത്. ധനികരായ പുരുഷന്മാര്‍ തടിച്ചുരുണ്ടവരാകുമ്പോള്‍ സ്ത്രീകള്‍ പൊതുവേ മെലിഞ്ഞ് സുന്ദരികളായിരിക്കുന്നു. എന്നാല്‍ സ്ത്രീകളുടെ കാര്യത്തില്‍ താഴ്ന്ന വരുമാനമുള്ളവര്‍ തടിവയ്ക്കുകയാണ് ചെയ്യുന്നത്- പഠന റിപ്പോര്‍ട്ടില്‍ പറയുന്നു.

ലോകമെമ്പാടുമുള്ള 7000 പേരെ പങ്കെടുപ്പിച്ചാണ് സര്‍വ്വേ നടത്തിയത്. 25 മതുല്‍ 65വരെ വയസ്സുള്ളവരെയാണ് ഇതില്‍ ഉള്‍പ്പെടുത്തിയത്. ധനികരായ പുരുഷന്മാര്‍ എന്തുകൊണ്ട് ഇങ്ങനെ തടിവയ്ക്കുന്നുവെന്ന ചോദ്യത്തിന് ഗവേഷക സംഘത്തിന്റെ കയ്യില്‍ ഉത്തരമുണ്ട്.

കയ്യില്‍ ധാരാളം പണമുള്ളവര്‍ അധികവും ഹോട്ടലുകളില്‍ നിന്നും ഭക്ഷണം കഴിയ്ക്കുന്നുണ്ടാവണം. പാര്‍ട്ടികളിലും മറ്റും പങ്കെടുക്കുമ്പോള്‍ എത്രത്തോളം ഭക്ഷണം കഴിയ്്ക്കുന്നുവെന്ന് അവര്‍ക്ക് തന്നെ ബോധ്യമുണ്ടാകില്ല, ഇതിനൊപ്പം മദ്യപാനവും ആവോളമുണ്ടാകും.

ഇത്തരത്തില്‍ കലോറി കൂടിയ ഭക്ഷണവും മദ്യവുമാണ് ധനികരായ പുരുഷന്മാരെ പൊണ്ണത്തടിയന്മാരാക്കുന്നത്. എന്നാല്‍ പണക്കാരികളായ സ്ത്രീകള്‍ എന്തുകൊണ്ടാണ് വണ്ണംവയ്ക്കാത്തത് എന്ന് പഠനത്തിന് കണ്ടെത്താന്‍ കഴിഞ്ഞിട്ടില്ല.

ലോകത്തില്‍ ഏറ്റവുമധികം തടിയന്മാരായ പുരുഷന്മാരുള്ളത് കാനഡയിലും കൊറിയയിലുമാണെന്ന് പഠനം പറയുന്നു. തടിയന്മാരായ ധനവാന്മാരുടെ എണ്ണവും ഈ രാജ്യങ്ങളില്‍ കൂടുതലാണ്. 2030 ആകുമ്പോള്‍ ലോകത്തില്‍ 23 ദശലക്ഷം പേര്‍ അമിതവണ്ണക്കാരായി മാറുമെന്നാണ് ലോകാരോഗ്യ സംഘടനയുടെ മുന്നറിയിപ്പ്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.