വട്ടമുഖമാണോ? എങ്കില്‍ ചൂടന്‍ തന്നെ

ആളുകളെക്കണ്ടാല്‍ അവരുടെ സ്വഭാവം നമുക്ക്‌ എത്രത്തോളം മനസ്സിലാക്കാന്‍ കഴിയും. ചിലര്‍ കാഴ്‌ചയ്‌ക്ക്‌ പാവത്താന്മാരാണെങ്കിലും അവരുമായി ഇടപഴകിക്കഴിയുമ്പോള്‍ മാത്രമേ ഇവരുടെ ചൂടന്‍ സ്വഭാവം മനസ്സിലാക്കാന്‍ കഴിയുകയുള്ളു. ചിലരാവട്ടെ കാഴ്‌ചയ്‌ക്ക്‌ അഹങ്കാരികളും ധിക്കാരികളുമായി തോന്നിക്കുമെങ്കിലും പലപ്പോഴും പാവത്താന്‍മാരായിരിക്കും.

പുരുഷന്റെ മുഖം നോക്കി സ്വഭാവം പറയാന്‍ കഴിയുമെന്നാണ്‌ ഇക്കാര്യത്തെക്കുറിച്ച്‌ പഠനം നടത്തിയ ഗവേഷകര്‍ അവകാശപ്പെടുന്നത്‌. അതായത്‌ പെട്ടെന്ന്‌ ദേഷ്യം വരുകയും ദേഷ്യം നിയന്ത്രിക്കാന്‍ കഴിയാതെ വരുകയുമൊക്കെ ചെയ്യുന്നവരാണെങ്കില്‍ അവരുടെ മുഖത്തുതന്നെ അതിന്റെ സൂചനയുണ്ടാകുമത്രേ. ഇത്തരക്കാരുടെ മുഖം നല്ല വൃത്താകൃതിയിലാരിക്കുമെന്നാണ്‌ ഗവേഷകര്‍ പറയുന്നത്‌.

ഒന്റാറിയോയിലെ ബ്രോക്ക്‌ യൂണിവേഴ്‌സിറ്റിയിലെ ഷെറില്‍ മക്‌ കോര്‍മിക്‌, ജസിറ്റിന്‍ കരേ എന്നിവരാണ്‌ ഇതിനെത്തുറിച്ച്‌ പഠനം നടത്തിയത്‌. വട്ടമുഖമുള്ളവരില്‍ സെക്‌സ്‌ ഹോര്‍മോണായ ടെസ്‌റ്റാസ്‌റ്റെറോണിന്റെ അളവ്‌ കൂടുതലായിരിക്കുമത്രേ. അല്ലെങ്കില്‍ ടെസ്‌റ്റാസ്‌റ്റെറോണിന്റെ അളവാണ്‌ പുരുഷന്മാരുടെ മുഖത്തിന്റെ ആകൃതി നിര്‍ണ്ണയിക്കുന്നതെന്നും പറയാം. ടെസ്റ്റാസ്റ്ററോണ്‍ കൂടുതലുള്ളവര്‍ അഗ്രസ്സീവ്‌ അതായത്‌ പെട്ടെന്ന്‌ ദേഷ്യം വരുകയും ആക്രമണസ്വഭാവം കാണിക്കുകയും ചെയ്യുന്നവരായിരിക്കും.

അപ്പോള്‍ സ്വാഭാവികമായും വട്ടമുഖമുള്ളവര്‍ക്ക്‌ ഈ പ്രത്യേകതകള്‍ കാണും. 90 സ്‌പോര്‍ട്‌സ്‌ താരങ്ങളിലാണ്‌ ഗവേഷകര്‍ ഇതുസംബന്ധിച്ച പഠനം നടത്തിയത്‌. ഇവരില്‍ വട്ടമുഖമുള്ളവര്‍കളിക്കളത്തില്‍ കൂടുതല്‍ ആക്രമണോത്സുകതയും അസഹിഷ്‌ണുതയും കാണിക്കുന്നവരാണത്രേ.

എന്നാല്‍ സ്‌ത്രീകളുടെ കാര്യത്തില്‍ മുഖത്തിന്റെ ആകൃതിയും സ്വഭാവവും തമ്മില്‍ ബന്ധിപ്പിക്കാനാവില്ലെന്നും ഗവേഷകര്‍ പറയുന്നു. എന്നാല്‍ ഒരു പുരുഷന്‌ വട്ടമുഖമാണെങ്കില്‍ ഒട്ടുംസംശയിക്കേണ്ട ആശാന്റെ കയ്യിലിരിപ്പ്‌ അത്രനല്ലതല്ലെന്ന്‌ ഉറപ്പിച്ചോളൂ എന്നാണ്‌ അവര്‍ പറയുന്നത്‌.

ബന്ധപ്പെട്ട വാര്‍ത്തകള്‍

ഉയരം കുറഞ്ഞ പുരുഷന്മാര്‍ അസൂയാലുക്കള്‍

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.