ആണ്‍കുട്ടികള്‍ക്ക്‌ വേണ്ടത്‌ വനിതാ പരിശീലകര്‍

അധ്യാപകരേക്കാള്‍ ആണ്‍കുട്ടികള്‍ക്ക്‌ അനുയോജ്യം അധ്യാപികമാരാണെന്ന്‌ പഠനറിപ്പോര്‍ട്ട്‌. ആണ്‍കുട്ടികളുടെ പഠനനിലവാരത്തില്‍ കാതലായ പുരോഗതിയുണ്ടാക്കാന്‍ അധ്യാപികമാര്‍ക്ക്‌ സാധിയ്‌ക്കുമെന്നാണ്‌ പഠനത്തില്‍ കണ്ടെത്തിയിരിക്കുന്നത്‌.

യൂണിവേഴ്‌സിറ്റി ഓഫ്‌ ആള്‍ബര്‍ട്ടയിലെ വിദ്യാഭ്യാസ വിഭാഗം പ്രൊഫസര്‍ ഹെര്‍ബ്‌ കറ്റ്‌സ്‌ ആണ്‌ ആണ്‍കുട്ടികള്‍ക്കിടയില്‍ ഇത്തരത്തിലൊരു പഠനം നടത്തിയത്‌. മൂന്നും നാലും ക്ലാസ്സുകളിലുള്ള 175 ആണ്‍കുട്ടികളെയാണ്‌ കറ്റ്‌സ്‌ നിരീക്ഷണത്തിന്‌ വിധേയരാക്കിയത്‌.

ഇതില്‍ മിക്കവരും വായിക്കാന്‍ പോലും ബുദ്ധിമുട്ടുന്നവരായിരുന്നു. ഇവരെ രണ്ടുപേര്‍ വീതമുള്ള സംഘങ്ങളാക്കി ഒരു റിസര്‍ച്ച്‌ അസിസ്റ്റന്റിന്‌ കീഴില്‍ വായനക്ഷമത വര്‍ദ്ധിപ്പിക്കുന്നതിനുള്ള പരിശീലനം നല്‍കുന്നതിനായി വിട്ടു.

ആഴ്‌ചയില്‍ മുപ്പത്‌ മിനിറ്റ്‌ വച്ച്‌ പത്താഴ്‌ചയോളം പരിശീലനം നീണ്ടു. ഇതില്‍ സ്‌ത്രീകളുടെ കീഴില്‍ പരിശീലനം നേടിയവരെല്ലാം പത്താഴ്‌ചകൊണ്ട്‌ അത്ഭുതകരമായ രീതിയിലാണത്രേ വായിക്കാനുള്ള തങ്ങളുടെ കഴിവ്‌ വര്‍ദ്ധിപ്പിച്ചത്‌. എന്നാല്‍ പുരുഷന്മാര്‍ക്ക്‌ കീഴില്‍ പരിശീലനം നേടിയവരിലെ പുരോഗതി താരതമ്യേന കുറവായിരുന്നു.

ആണ്‍കുട്ടികള്‍ മാത്രം പഠിക്കുന്ന സ്‌കൂളുകളില്‍ അധ്യാപകന്‍മാരെ മാത്രം നിയമിക്കുന്ന രീതി പിന്തുടരുന്ന സ്കൂളുകളിലെല്ലാം ഇനി മാറിചിന്തിക്കാന്‍ തയ്യാറാകണമെന്ന്‌ തന്റെ പഠനഫലങ്ങള്‍ ചൂണ്ടിക്കാട്ടി കറ്റ്‌സ്‌ ആവശ്യപ്പെടുന്നു. വിവിധ രാജ്യങ്ങളിലെ പഠനരീതികളും സ്‌കൂള്‍ നിയമങ്ങളും ഇതിനായി പൊളിച്ചെഴുതേണ്ടതുണ്ടെന്നും അദ്ദേഹം പറയുന്നു.

ആണ്‍കുട്ടികളും പെണ്‍കുട്ടികളും ആദ്യമായി വിദ്യാലയങ്ങളിലെത്തുന്നത്‌ വളരെ ചെറിയ അറിവുമായാണ്‌. എന്നാല്‍ മൂന്നാം ക്ലാസ്‌ കഴിയുന്നതോടെ ആണ്‍കുട്ടികളെ അപേക്ഷിച്ച്‌ പെണ്‍കുട്ടികള്‍ പലപ്പോഴും വായനപോലുള്ള കാര്യങ്ങളില്‍ കൂടുതല്‍ പുരോഗതി പ്രാപിക്കുന്നു. എന്നാല്‍ ഇതിനുള്ള കാരണം എന്താണെന്ന്‌ ഇപ്പോഴും വ്യക്തമല്ല- കറ്റ്‌സ്‌ പറയുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.