പ്രമേഹം നിയന്ത്രിച്ചുനിര്‍ത്താം, ആരോഗ്യത്തോടെ ജീവിക്കാം; ഈ ചായകളിലുണ്ട് ശക്തി

പ്രമേഹം ഒരു വിട്ടുമാറാത്ത രോഗമാണ്. കാരണം, ഈ രോഗത്തെ കൃത്യമായി നിയന്ത്രിച്ച് നിര്‍ത്തിയില്ലെങ്കില്‍, ഈ രോഗം നിങ്ങളുടെ ജീവിതത്തിലുടനീളം നിലനില്‍ക്കും. പ്രമേഹ രോഗികള്‍ രാവിലെ അവരുടെ ഭക്ഷണവും പാനീയവുമെല്ലാം വളരെ ആലോചിച്ച് തിരഞ്ഞെടുക്കണം. അങ്ങനെ പഞ്ചസാരയുടെ അളവ് നിലനിര്‍ത്താനാകും. അത്തരമൊരു സാഹചര്യത്തില്‍, പ്രമേഹ രോഗികള്‍ക്ക് ചായ കുടിക്കുന്നത് അല്‍പ്പം ബുദ്ധിമുട്ടായിരിക്കും, കാരണം പല ചായകളിലും മധുരവും പാലും ചേര്‍ക്കുന്നു, ഇത് രക്തത്തിലെ പഞ്ചസാരയുടെ അളവ് വര്‍ദ്ധിപ്പിക്കും.

എന്നിരുന്നാലും, പ്രമേഹമുള്ള ആളുകള്‍ക്ക് പോലും സുരക്ഷിതമായി കുടിക്കാന്‍ കഴിയുന്ന ചില ആരോഗ്യകരമായ ചായകളുണ്ട്. ഇന്‍സുലിന്‍ നിയന്ത്രിക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും സഹായിക്കുന്ന അത്തരം ചായകളെക്കുറിച്ചാണ് ഈ ലേഖനത്തില്‍ ഞങ്ങള്‍ നിങ്ങളോട് പറയുന്നത്. പ്രമേഹത്തിനെതിരെ പോരാടാന്‍ നിങ്ങളെ സഹായിക്കുന്ന ചില ഹെര്‍ബല്‍ ടീകള്‍ ഇതാ.

ജിന്‍സെംഗ് ചായ

പ്രതിരോധശേഷി വര്‍ദ്ധിപ്പിക്കുന്നതിനും രോഗങ്ങളെ ചെറുക്കുന്നതിനും പേരുകേട്ട ജിന്‍സെംഗ്, പ്രമേഹത്തിനും മികച്ചതാണെന്ന് തെളിയിച്ച നിരവധി പഠനങ്ങളുണ്ട്. ഗവേഷകരുടെ അഭിപ്രായത്തില്‍, ജിന്‍സെങ് കാര്‍ബോഹൈഡ്രേറ്റ് ആഗിരണം മന്ദഗതിയിലാക്കുന്നു. ഗ്ലൂക്കോസ് ഉപയോഗിക്കാനുള്ള സെല്ലിന്റെ കഴിവ് വര്‍ദ്ധിപ്പിക്കുന്നു. കൂടാതെ പാന്‍ക്രിയാസില്‍ നിന്നുള്ള ഇന്‍സുലിന്‍ സ്രവണവും ഇത് വര്‍ദ്ധിപ്പിക്കും. രക്തത്തിലെ ഗ്ലൂക്കോസിന്റെ അളവ് നിയന്ത്രിക്കാന്‍ നിങ്ങള്‍ക്ക് രാവിലെ ജിന്‍സെംഗ് ചായ കഴിക്കാം.

കറ്റാര്‍ വാഴ ചായ

ടൈപ്പ്-2 പ്രമേഹമുള്ളവരില്‍ എച്ച്ബിഎ1സി ലെവല്‍ മെച്ചപ്പെടുത്താനും പ്രീ ഡയബറ്റിക്സ് ഉള്ളവരില്‍ ഫാസ്റ്റിംഗ് പ്ലാസ്മ ഗ്ലൂക്കോസിന്റെ അളവ് കുറയ്ക്കാനും കറ്റാര്‍ വാഴ സഹായിക്കും. ഒട്ടുമിക്ക ആരോഗ്യപ്രശ്‌നങ്ങളെയും ചികിത്സിക്കുന്നതിനും നിയന്ത്രിക്കുന്നതിനും പണ്ടുമുതല്‍ക്കേ കറ്റാര്‍ വാഴ ഉപയോഗിക്കുന്നു. ഇത് അസംസ്‌കൃത രൂപത്തില്‍ ഉപയോഗിക്കുന്നു. കറ്റാര്‍ വാഴ ഉണക്കി അത് ചൂടുവെള്ളത്തില്‍ കലര്‍ത്തി ചായയാക്കി കഴിക്കുക.

ഗ്രീന്‍ ടീ

പ്രമേഹരോഗികള്‍ക്ക് നിരവധി ആരോഗ്യ ആനുകൂല്യങ്ങള്‍ വാഗ്ദാനം ചെയ്യുന്ന ഒന്നാണ് ഗ്രീന്‍ ടീ. സ്ഥിരമായി ഗ്രീന്‍ ടീ കുടിക്കുന്നത് കോശങ്ങളുടെ കേടുപാടുകള്‍ കുറയ്ക്കുകയും വീക്കം കുറയ്ക്കുകയും രക്തത്തിലെ പഞ്ചസാര നിയന്ത്രിക്കുകയും ചെയ്യുന്നു. ഗ്രീന്‍ ടീയിലെ ബയോആക്ടീവ് സംയുക്തങ്ങള്‍ പേശി കോശങ്ങളിലേക്ക് ആഗിരണം ചെയ്യാന്‍ പ്രേരിപ്പിക്കുന്നതായി തെളിയിക്കപ്പെട്ടിട്ടുണ്ട്. ഗ്രീന്‍ ടീ കുടിക്കുന്നത് രക്തത്തിലെ പഞ്ചസാരയുടെ അളവ് ഗണ്യമായി കുറയ്ക്കുന്നു. മികച്ച ഗുണങ്ങള്‍ക്കായി പ്രതിദിനം 2-3 കപ്പ് ഗ്രീന്‍ ടീ കുടിക്കുന്നത് നല്ലതാണ്.

ബ്ലാക്ക് ടീ

ശക്തമായ ആന്റിഓക്‌സിഡന്റും ആന്റി-ഇന്‍ഫ്ളമേറ്ററിയും രക്തത്തിലെ പഞ്ചസാര കുറയ്ക്കുന്നതുമായ ഗുണങ്ങളുള്ളതാണ് ബ്ലാക്ക് ടീ. ഫ്ളാവിന്‍, തേറൂബിജിന്‍സ് തുടങ്ങിയ ഗുണകരമായ സസ്യ സംയുക്തങ്ങള്‍ ബ്ലാക്ക് ടീയിലുണ്ട്. ബ്ലാക്ക് ടീ കഴിക്കുന്നത് ഇന്‍സുലിന്‍ സ്രവണം പ്രോത്സാഹിപ്പിക്കുന്നതിനും രക്തത്തിലെ ഗ്ലൂക്കോസിന്റെ അളവ് നിയന്ത്രണത്തിലാക്കുന്നതിനും സഹായിക്കുമെന്ന് പഠനങ്ങള്‍ വെളിപ്പെടുത്തുന്നു. മികച്ച ഗുണങ്ങള്‍ നേടുന്നതിന് പ്രതിദിനം ഏകദേശം 3 കപ്പ് ബ്ലാക്ക് ടീ കുടിക്കുക.

ചെമ്പരത്തി ചായ

ചെമ്പരത്തി പൂവിന്റെ ഇതളുകള്‍ ഉപയോഗിച്ച് ഉണ്ടാക്കുന്ന ഊര്‍ജ്ജസ്വലമായ ചായയാണിത്. ഈ ചായയില്‍ വിലപിടിപ്പുള്ള നിരവധി പോളിഫെനോളുകള്‍, ഓര്‍ഗാനിക് ആസിഡുകള്‍, ആന്തോസയാനിനുകള്‍ തുടങ്ങിയ ആന്റിഓക്‌സിഡന്റുകള്‍ അടങ്ങിയിട്ടുണ്ട്. ചെമ്പരത്തി ചായ കുടിക്കുന്നത് രക്തസമ്മര്‍ദ്ദം നിയന്ത്രിക്കുകയും, വീക്കം കുറയ്ക്കുകയും, ഇന്‍സുലിന്‍ പ്രതിരോധം, രക്തത്തിലെ ഗ്ലൂക്കോസിന്റെ അളവ് നിയന്ത്രിക്കല്‍ എന്നിവയുള്‍പ്പെടെ നിരവധി ആരോഗ്യ ഗുണങ്ങള്‍ നല്‍കുകയും ചെയ്യുന്നു.

കറുവപ്പട്ട ചായ

ആകര്‍ഷകമായ ഈ സുഗന്ധവ്യഞ്ജനം ഭക്ഷണത്തെ മാത്രമല്ല, നിങ്ങളുടെ ആരോഗ്യത്തെയും മികച്ചതാക്കുന്നു. അത്ഭുതകരമായ രോഗശാന്തി ഗുണങ്ങളുള്ള ഒന്നാണ് കറുവപ്പട്ട. ശക്തമായ ആന്റി ഡയബറ്റിക് ഗുണങ്ങള്‍ ഇതിലുണ്ട്. കറുവപ്പട്ട ചായ പതിവായി കുടിക്കുന്നത് രക്തത്തിലെ പഞ്ചസാരയുടെ വര്‍ദ്ധനവ് ഗണ്യമായി കുറയ്ക്കും. ഇത് സെല്ലുലാര്‍ ഗ്ലൂക്കോസ് ആഗിരണം പ്രോത്സാഹിപ്പിക്കുകയും ഇന്‍സുലിന്‍ സംവേദനക്ഷമത മെച്ചപ്പെടുത്തുകയും ചെയ്യുന്നു.

ചമോമൈല്‍ ചായ

രക്തത്തിലെ പഞ്ചസാരയുടെ അളവ് നിയന്ത്രിക്കുന്നതുള്‍പ്പെടെ നിരവധി ആരോഗ്യ ആനുകൂല്യങ്ങള്‍ വാഗ്ദാനം ചെയ്യുന്ന ഒന്നാണ് ചമോമൈല്‍ ടീ. രക്തത്തിലെ പഞ്ചസാരയുടെ അളവ് നിയന്ത്രിക്കുകയും ഓക്സിഡേറ്റീവ് സമ്മര്‍ദ്ദം ഒഴിവാക്കുകയും ശരീരഭാരം കുറയ്ക്കാന്‍ സഹായിക്കുകയും ചെയ്യുന്ന ശക്തമായ രേതസ്, ആന്റി-ഇന്‍ഫ്ളമേറ്ററി, ആന്റിഓക്‌സിഡന്റ് ഗുണങ്ങള്‍ ഇതിലുണ്ട്. രക്തത്തിലെ പഞ്ചസാര നിയന്ത്രണത്തിനും ഉപാപചയം മെച്ചപ്പെടുത്തുന്നതിനും നിങ്ങള്‍ ചമോമൈല്‍ ചായ കുടിക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.