ഷുഗര്‍ ലെവല്‍ ഉയരുന്നത് പെട്ടെന്ന്‌; പ്രമേഹമുള്ളവര്‍ വെറും വയറ്റില്‍ കഴിക്കരുതാത്ത 6 ഭക്ഷണങ്ങള്‍

Diabetes Diet: പ്രഭാതഭക്ഷണം രാജാവിനെപ്പോലെയും ഉച്ചഭക്ഷണം രാജകുമാരനെപ്പോലെയും അത്താഴം യാചകനെപ്പോലെയും കഴിക്കണമെന്ന് പറയപ്പെടുന്നു. അതായത്, പ്രഭാതഭക്ഷണം എല്ലാ അവശ്യ പോഷകങ്ങളും ഉള്‍ക്കൊള്ളുന്ന തരത്തിലായിരിക്കണം എന്നര്‍ത്ഥം. ഒരു നല്ല പ്രഭാത ഭക്ഷണം കഴിച്ച ശേഷം ദിവസം മുഴുവന്‍ നിങ്ങള്‍ സജീവമായിരിക്കുകയും ആരോഗ്യവാനായിരിക്കുകയും ചെയ്യും. എന്നാല്‍ രാവിലെ പലരും അനാരോഗ്യകരമായ ഭക്ഷണങ്ങള്‍ വെറും വയറ്റില്‍ കഴിക്കുന്നു. ഇത് ദിവസം ആരംഭിക്കുന്നതിനുള്ള ശരിയായ മാര്‍ഗമല്ല. പ്രത്യേകിച്ചും പ്രമേഹ രോഗികള്‍ക്ക്.

രക്തത്തിലെ പഞ്ചസാര നിയന്ത്രണത്തിലാക്കാന്‍ പ്രമേഹ രോഗികള്‍ അവരുടെ പ്രഭാത ഭക്ഷണ ശീലങ്ങളില്‍ പൂര്‍ണ്ണമായും ശ്രദ്ധിക്കണം. നിങ്ങള്‍ ഒരു പ്രമേഹ രോഗിയാണെങ്കില്‍ രാവിലെ എഴുന്നേറ്റയുടന്‍ വെറും വയറ്റില്‍ കഴിക്കാന്‍ പാടില്ലാത്ത ചില ഭക്ഷണസാധനങ്ങളുണ്ട്. കാരണം അത്തരം ഭക്ഷണം നിങ്ങളുടെ രക്തത്തിലെ പഞ്ചസാരയുടെ അളവിനെ ദോഷകരമായി ബാധിക്കും. (Diabetes Food) ഷുഗര്‍ ലെവല്‍ നിയന്ത്രണവിധേയമാക്കാന്‍ പ്രമേഹ രോഗികള്‍ ഒഴിഞ്ഞ വയറ്റില്‍ കഴിക്കാന്‍ പാടില്ലാത്ത കാര്യങ്ങള്‍ എന്തൊക്കെയെന്ന് നമുക്ക് നോക്കാം.

മധുരപാനീയങ്ങള്‍

സോഡ, പഴച്ചാറുകള്‍, പഞ്ചസാര ഇട്ട ചായതുടങ്ങിയ പാനീയങ്ങള്‍ രക്തത്തിലെ പഞ്ചസാരയുടെ വര്‍ദ്ധനവിന്റെ കാര്യമായി ബാധിക്കുന്നു. പഞ്ചസാര ചേര്‍ത്തതും നാരുകളോ പ്രോട്ടീനുകളോ ഇല്ലാത്തതുമായ ഈ പാനീയങ്ങള്‍ രക്തത്തിലെ ഗ്ലൂക്കോസിന്റെ അളവ് അതിവേഗം വര്‍ദ്ധിപ്പിക്കും. രക്തത്തിലെ പഞ്ചസാരയുടെ അളവിനെ ബാധിക്കാതെ ജലാംശം നിലനിര്‍ത്താനുള്ള മികച്ച ഒന്നാണ് സാധാരണ വെള്ളം. പ്രമേഹമുള്ളവര്‍ ശുദ്ധജലമോ ഹെര്‍ബല്‍ ടീ അല്ലെങ്കില്‍ മധുരമില്ലാത്ത പാനീയങ്ങള്‍ പോലുള്ളവയോ കുടിക്കുന്നതാണ് നല്ലത്.

വൈറ്റ് ബ്രെഡും പേസ്ട്രികളും

വൈറ്റ് ബ്രെഡ്, പേസ്ട്രികള്‍, മധുരമുള്ള ധാന്യങ്ങള്‍ എന്നിവ പോലുള്ള ശുദ്ധീകരിച്ച ധാന്യങ്ങള്‍ ഉപയോഗിച്ച് നിര്‍മ്മിച്ച ഭക്ഷണങ്ങള്‍ ശരീരത്തില്‍ പെട്ടെന്ന് ഗ്ലൂക്കോസായി വിഘടിക്കുന്നു. കുറഞ്ഞ നാരുകളുള്ള ഇവ ഒഴിഞ്ഞ വയറ്റില്‍ കഴിക്കുമ്പോള്‍ രക്തത്തിലെ പഞ്ചസാരയുടെ അളവ് അതിവേഗം ഉയരാന്‍ കാരണമാകും. ഇത്തരം ഭക്ഷണങ്ങള്‍ക്ക് പകരം നിങ്ങള്‍ ഗോതമ്പ് ബ്രെഡ് അല്ലെങ്കില്‍ ഓട്സ് പോലുള്ളവ തിരഞ്ഞെടുക്കുക. ഇത് രക്തത്തിലെ പഞ്ചസാരയുടെ അളവ് സ്ഥിരപ്പെടുത്താന്‍ സഹായിക്കുന്ന ഫൈബര്‍ നല്‍കുന്നു.

മധുരം കൂടുതലുള്ള പഴങ്ങള്‍

പഴങ്ങള്‍ ആരോഗ്യകരമായ ഭക്ഷണങ്ങളില്‍ പെടുന്നതാണെങ്കിലും, ചില ഇനങ്ങളില്‍ മറ്റുള്ളവയേക്കാള്‍ പഞ്ചസാര കൂടുതലാണ്. തണ്ണിമത്തന്‍, പൈനാപ്പിള്‍, പഴുത്ത വാഴപ്പഴം തുടങ്ങിയ പഴങ്ങള്‍ക്ക് ഉയര്‍ന്ന ഗ്ലൈസെമിക് സൂചികയുണ്ട്, അതായത് അവ രക്തത്തിലെ പഞ്ചസാരയുടെ അളവ് അതിവേഗം വര്‍ദ്ധിപ്പിക്കും. സിട്രസ് പഴങ്ങള്‍, ആപ്പിള്‍ എന്നിവ പോലുള്ള കുറഞ്ഞ പഞ്ചസാര അടങ്ങിയ പഴങ്ങള്‍ തിരഞ്ഞെടുക്കുക. പ്രമേഹരോഗമുള്ളവര്‍ ഒരിക്കലും മധുരം കൂടുതലുള്ള പഴങ്ങളോ അധികം പഴുത്ത പഴങ്ങളോ കഴിക്കരുത്, പ്രത്യേകിച്ച് ഒഴിഞ്ഞ വയറ്റില്‍.

ഫ്രൈ ചെയ്ത ഭക്ഷണങ്ങള്‍

ഫ്രെഞ്ച് ഫ്രൈകള്‍, ഫ്രൈ ചെയ്ത ചിക്കന്‍, ഡോനട്ട്സ് തുടങ്ങിയ ഭക്ഷണങ്ങളില്‍ അനാരോഗ്യകരമായ കൊഴുപ്പുകള്‍ ധാരാളമുണ്ട്. ഇതില്‍ ശുദ്ധീകരിച്ച കാര്‍ബോഹൈഡ്രേറ്റുകളും അടങ്ങിയിട്ടുണ്ട്. ഒഴിഞ്ഞ വയറ്റില്‍ ഈ ഭക്ഷണങ്ങള്‍ കഴിക്കുന്നത് വീക്കം, ഇന്‍സുലിന്‍ പ്രതിരോധം എന്നിവയ്ക്ക് കാരണമാകും. ഇത് പ്രമേഹ രോഗികളില്‍ രക്തത്തിലെ പഞ്ചസാരയുടെ അളവ് പെട്ടെന്ന് കൂടാന്‍ ഇടയാക്കുന്നു. ബേക്കിംഗ്, ഗ്രില്ലിംഗ് അല്ലെങ്കില്‍ സ്റ്റീമിംഗ് പോലുള്ള ആരോഗ്യകരമായ പാചക രീതികളില്‍ തയാറാക്കിയ ഭക്ഷണങ്ങള്‍ കഴിക്കുക.

മദ്യം

മദ്യം രക്തത്തിലെ പഞ്ചസാരയുടെ അളവില്‍ കാര്യമായ സ്വാധീനം ചെലുത്തും. പ്രത്യേകിച്ച് ഒഴിഞ്ഞ വയറ്റില്‍ കഴിക്കുമ്പോള്‍ അത് കൂടുതല്‍ പ്രശ്‌നമാകും. മദ്യം പ്രമേഹ മരുന്നുകളുടെ ഫലപ്രാപ്തിയെയും തടസ്സപ്പെടുത്തും. മദ്യം ഒഴിഞ്ഞവയറ്റില്‍ കുടിക്കുന്നത് ഹൈപ്പോഗ്ലൈസീമിയയുടെ അപകടസാധ്യത വര്‍ദ്ധിപ്പിക്കും.

കഫീന്‍

മിതമായ അളവില്‍ കഫീന്‍ കഴിക്കുന്നത് നല്ലതാണ്. എന്നാല്‍ കഫീന്റെ അമിതമായ അളവ് രക്തത്തിലെ പഞ്ചസാരയുടെ അളവ് വര്‍ദ്ധിപ്പിക്കുന്നതിനും ഇന്‍സുലിന്‍ പ്രതിരോധത്തിനും ഇടയാക്കും. കാപ്പിയും എനര്‍ജി ഡ്രിങ്കുകളും, പ്രത്യേകിച്ച്, ഒഴിഞ്ഞ വയറ്റില്‍ കഴിക്കുമ്പോള്‍ അത് ദഹനസംബന്ധമായ അസ്വസ്ഥതകളും ഉണ്ടാക്കും. പ്രമേഹ രോഗികള്‍ ഒരിക്കലും ഒഴിഞ്ഞ വയറ്റില്‍ കാപ്പിയോ ചായയോ കുടിക്കരുത്. രക്തത്തിലെ പഞ്ചസാരയുടെ അളവ് കൂടാതിരിക്കാന്‍ ഇതിനോടൊപ്പം സമീകൃത ഭക്ഷണമോ ലഘുഭക്ഷണമോ കഴിക്കുക.

ശ്രദ്ധിക്കാന്‍

പ്രമേഹം അല്ലെങ്കില്‍ പ്രീ-ഡയബറ്റിസ് ഫലപ്രദമായി കൈകാര്യം ചെയ്യുന്നതിന് നിങ്ങള്‍ ഒഴിഞ്ഞ വയറ്റില്‍ കഴിക്കുന്ന ഭക്ഷണങ്ങളെക്കുറിച്ച് ശ്രദ്ധിക്കേണ്ടത് അത്യാവശ്യമാണ്. മധുര പാനീയങ്ങള്‍, ശുദ്ധീകരിച്ച ധാന്യങ്ങള്‍, അധികം മധുരമുള്ള പഴങ്ങള്‍, ഫ്രൈ ചെയ്ത ഭക്ഷണങ്ങള്‍, മദ്യം, അമിതമായ കഫീന്‍ എന്നിവ ഒഴിവാക്കുന്നത് രക്തത്തിലെ പഞ്ചസാരയുടെ അളവ് ക്രമപ്പെടുത്തി നിലനിര്‍ത്താന്‍ സഹായിക്കും. രക്തത്തിലെ പഞ്ചസാര നിയന്ത്രണവും മൊത്തത്തിലുള്ള ആരോഗ്യവും മെച്ചപ്പെടുത്തുന്നതിന് നാരുകള്‍, ലീന്‍ പ്രോട്ടീന്‍, ആരോഗ്യകരമായ കൊഴുപ്പുകള്‍ എന്നിവയാല്‍ സമ്പന്നമായ സമീകൃതാഹാരത്തില്‍ ശ്രദ്ധ കേന്ദ്രീകരിക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.