മഴക്കാല ഈര്‍പ്പം സന്ധികള്‍ക്ക് ആപത്ത്; വേദനയില്‍ നിന്ന് രക്ഷനേടാന്‍ സഹായിക്കുന്ന ഭക്ഷണങ്ങള്‍

Health Tips: മഴക്കാലമെത്തുന്നതോടെ കനത്ത ചൂടിന് ആശ്വാസം ഉണ്ടെങ്കിലും അതോടൊപ്പം തന്നെ പല തരത്തിലുള്ള ആരോഗ്യ പ്രശ്നങ്ങളും ആരംഭിക്കുന്നു. അതില്‍ ഒന്നാണ് സന്ധി വേദന. മണ്‍സൂണ്‍ കാലത്തെ കാലാവസ്ഥാ വ്യതിയാനം മൂലം സന്ധികളില്‍ അസ്വസ്ഥതയും കാഠിന്യവും വര്‍ദ്ധിക്കുന്നു. മഴക്കാലത്ത് ഈര്‍പ്പം വളരെ ഉയര്‍ന്നതാണ്. കാലാവസ്ഥയിലെ പെട്ടെന്നുള്ള ഇടിവും പരിസ്ഥിതിയിലെ ഈര്‍പ്പവും നിങ്ങളുടെ പേശികളിലും സന്ധികളിലും കാഠിന്യത്തിന് കാരണമാകും.

അത്തരമൊരു സാഹചര്യത്തില്‍, സന്ധിവേദനയുടെ കാരണങ്ങള്‍ മനസിലാക്കുകയും ജീവിതശൈലി മാറ്റങ്ങള്‍ വരുത്തുകയും ചെയ്യേണ്ടത് വളരെ പ്രധാനമാണ്. ഇത് സന്ധി വേദന കൈകാര്യം ചെയ്യുന്നതിന് നിങ്ങളെ സഹായിക്കും. മഴക്കാലത്ത് സന്ധി വേദനയില്‍ നിന്ന് മോചനം നേടാനുള്ള ചില ഭക്ഷണശീലങ്ങളും വഴികളും ഇതാ.(joint pain in monsoon)

സന്ധിവേദന കുറയ്ക്കാന്‍ മഴക്കാലത്ത് കഴിക്കേണ്ട ഭക്ഷണങ്ങള്‍

ഒമേഗ -3 ഫാറ്റി ആസിഡുകള്‍ അടങ്ങിയ ഭക്ഷണങ്ങള്‍

ഒമേഗ -3 ഫാറ്റി ആസിഡുകളുടെ ആന്റി ഇന്‍ഫ്‌ളമേറ്ററി ഗുണങ്ങള്‍ കാരണം മണ്‍സൂണ്‍ സമയത്ത് സന്ധികളിലെ വേദനയും വീക്കവും കുറയ്ക്കാന്‍ സഹായിക്കുന്നു. ചണവിത്തുകള്‍, വാല്‍നട്ട്, ചിയ വിത്തുകള്‍, സോയാബീന്‍, ബ്രൊക്കോളി തുടങ്ങിയ ഭക്ഷണങ്ങളില്‍ ഒമേഗ-3 ഫാറ്റി ആസിഡുകള്‍ ധാരാളമായി അടങ്ങിയിട്ടുണ്ട്.

മഞ്ഞള്‍

സന്ധി വേദന, കാഠിന്യം അല്ലെങ്കില്‍ നീര്‍വീക്കം തുടങ്ങിയ സന്ധി സംബന്ധമായ പ്രശ്‌നങ്ങള്‍ കുറയ്ക്കുന്നതില്‍ മഞ്ഞള്‍ മികച്ച രീതിയില്‍ പ്രവര്‍ത്തിക്കുന്നു. സന്ധി വേദന കുറയ്ക്കാന്‍ സഹായിക്കുന്ന ആന്റി-ഇന്‍ഫ്‌ലമേറ്ററി ഗുണങ്ങളുള്ള കുര്‍ക്കുമിന്‍ മഞ്ഞളില്‍ അടങ്ങിയിട്ടുണ്ട്. സന്ധിവേദനയുള്ള വ്യക്തികള്‍ അവരുടെ ദൈനംദിന ഭക്ഷണത്തില്‍ പതിവായി മഞ്ഞള്‍ ഉള്‍പ്പെടുത്തുന്നത് നല്ലതാണ്.

മഴക്കാലത്ത് ഒഴിവാക്കേണ്ട ഭക്ഷണം

പാക്കേജുചെയ്തതും പ്രോസസ് ചെയ്തതുമായ ഭക്ഷണങ്ങള്‍

ചിപ്‌സ്, നൂഡില്‍സ് എന്നിവ പോലെയുള്ള പാക്കേജുചെയ്തതോ പ്രോസസ് ചെയ്തതോ ആയ ഭക്ഷണങ്ങള്‍ സന്ധി വേദന ഉള്‍പ്പെടെയുള്ള നിങ്ങളുടെ മൊത്തത്തിലുള്ള ആരോഗ്യത്തില്‍ വലിയ സ്വാധീനം ചെലുത്തുന്നു. ഇത്തരം പായ്ക്ക് ചെയ്ത ഭക്ഷണങ്ങളില്‍ പഞ്ചസാര, പ്രിസര്‍വേറ്റീവുകള്‍ എന്നിവ അടങ്ങിയിട്ടുണ്ട്. ഈ ഘടകങ്ങള്‍ നിങ്ങളുടെ സന്ധികളെ ദോഷകരമായി ബാധിക്കുകയും വീക്കം, സന്ധി വേദന എന്നിവ ഉണ്ടാക്കുകയും ചെയ്യും. മഴക്കാലത്ത് നിങ്ങളുടെ സന്ധികളുടെ ആരോഗ്യം നിലനിര്‍ത്താന്‍ ജങ്ക് ഫുഡുകളോ പാക്കേജുചെയ്ത ഭക്ഷണങ്ങളോ കഴിക്കുന്നത് ഒഴിവാക്കുക.

പഞ്ചസാര അധികം കഴിക്കാതിരിക്കുക

പഞ്ചസാര ശരീരത്തില്‍ വീക്കം ഉണ്ടാക്കും. ഇത് സന്ധിവാതം, കടുത്ത സന്ധി വേദന തുടങ്ങിയ ആരോഗ്യപ്രശ്‌നങ്ങളിലേക്ക് നയിക്കുന്നു. അതിനാല്‍ പഞ്ചസാര അധികം കഴിക്കാതിരിക്കുക. മഴക്കാലത്ത് സന്ധി വേദന കൈകാര്യം ചെയ്യുന്നതിനായി മിഠായി, പോപ്സിക്കിള്‍സ്, സോഡ തുടങ്ങിയ പഞ്ചസാര അടിസ്ഥാനമാക്കിയുള്ളവ കഴിക്കുന്നത് ഒഴിവാക്കുക. അമിതമായ പഞ്ചസാര കഴിക്കുന്നത് ഹൃദയ സംബന്ധമായ അസുഖങ്ങള്‍, പ്രമേഹം, പൊണ്ണത്തടി, ഉയര്‍ന്ന കൊളസ്‌ട്രോള്‍ എന്നിവയുള്‍പ്പെടെ നിരവധി ആരോഗ്യപ്രശ്‌നങ്ങളും ഇടയാക്കും.

മറ്റ് വഴികള്‍

വ്യായാമം

സന്ധി വേദന അകറ്റാന്‍ ഇന്‍ഡോര്‍ വ്യായാമങ്ങളും പ്രവര്‍ത്തനങ്ങളും ചെയ്യുക. യോഗ, പൈലേറ്റ്‌സ് അല്ലെങ്കില്‍ സ്റ്റെയര്‍ വ്യായാമങ്ങള്‍ പോലുള്ള ലഘുവായ വ്യായാമങ്ങള്‍ തിരഞ്ഞെടുക്കുക. ഇത് നിങ്ങളുടെ സന്ധികളില്‍ വഴക്കം നിലനിര്‍ത്താനും പേശികളെ ശക്തിപ്പെടുത്താനും സഹായിക്കും.

ശരീരഭാരം നിലനിര്‍ത്തുക

അധിക ഭാരം സന്ധികളില്‍ അധിക സമ്മര്‍ദ്ദം ചെലുത്തും. അത് നിങ്ങള്‍ക്ക് വേദനയും അസ്വസ്ഥതയും വര്‍ദ്ധിപ്പിക്കുന്നു. ആരോഗ്യകരമായ ശരീരഭാരം നിലനിര്‍ത്തുന്നതിലൂടെ നിങ്ങളുടെ സന്ധികളിലെ സമ്മര്‍ദ്ദം കുറയ്ക്കാനാകും. ധാരാളം പഴങ്ങള്‍, പച്ചക്കറികള്‍, ലീന്‍ പ്രോട്ടീനുകള്‍, ധാന്യങ്ങള്‍ എന്നിവ ഉള്‍പ്പെടുന്ന സമീകൃതാഹാരം പിന്തുടരുക.

ജലാംശം നിലനിര്‍ത്തുക

നിര്‍ജ്ജലീകരണം സന്ധി വേദന വര്‍ദ്ധിപ്പിക്കും. സന്ധികളില്‍ ലൂബ്രിക്കേഷനും വഴക്കവും നിലനിര്‍ത്താന്‍ ജലാംശം നിങ്ങളെ സഹായിക്കുന്നു. നിങ്ങളുടെ സന്ധികളില്‍ ജലാംശം നിലനിര്‍ത്താന്‍ ദിവസം മുഴുവന്‍ ധാരാളം വെള്ളം കുടിക്കുക.

തെറാപ്പി

വേദനയുള്ള സന്ധികളില്‍ ചൂടുള്ളതോ തണുത്തതോ ആയ പായ്ക്കുകള്‍ വയ്ക്കുന്നത് വേദനയില്‍ നിന്നും വീക്കത്തില്‍ നിന്നും താല്‍ക്കാലിക ആശ്വാസം നല്‍കും. പേശികളെ ശാന്തമാക്കാനും രക്തചംക്രമണം മെച്ചപ്പെടുത്താനും ഒരു ഹോട്ട് പാക്ക് ഉപയോഗിക്കുക. അല്ലെങ്കില്‍ ഒരു തൂവാലയില്‍ പൊതിഞ്ഞ ഐസ് പാക്ക് വയ്ക്കുന്നതും വേദന കുറയ്ക്കാന്‍ സഹായിക്കും.

ശരിയായ ചെരിപ്പ് ധരിക്കുക

പാദങ്ങള്‍ക്ക് മതിയായ പിന്തുണയും കുഷ്യനും നല്‍കുന്ന ചെരിപ്പ് ഉപയോഗിക്കുക. അത് നിങ്ങളുടെ ശരീരഭാരം ബാലന്‍സ് ചെയ്യാനും സന്ധികളിലെ സമ്മര്‍ദ്ദം കുറയ്ക്കാനും സഹായിക്കുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.