പ്രമേഹത്തിന്റെ പിടിയില്‍ നിന്ന് രക്ഷനേടാം; കത്തുന്ന ചൂടില്‍ ബ്ലഡ് ഷുഗര്‍ നിയന്ത്രിക്കാന്‍ 8 കാര്യം

Blood Sugar Management In Summer: പ്രമേഹ രോഗികള്‍ നേരിടുന്ന പ്രധാന പ്രശ്‌നമാണ് അവരുടെ രക്തത്തിലെ പഞ്ചസാരയുടെ അളവിലെ ഏറ്റക്കുറച്ചില്‍. ഓരോ സീസണ്‍ അനുസരിച്ചും ഇത് വഷളാകുന്നു. നിലവില്‍ പലയിടത്തും ഉഷ്ണ തരംഗത്തെക്കുറിച്ച് ഇന്ത്യന്‍ കാലാവസ്ഥാ വകുപ്പ് മുന്നറിയിപ്പ് പുറപ്പെടുവിച്ച സാഹചര്യത്തില്‍ പ്രമേഹമുള്ളവര്‍ വളരെ ശ്രദ്ധിക്കേണ്ടതായുണ്ട്. പ്രമേഹം നിയന്ത്രിക്കുന്നത് തന്നെ ബുദ്ധിമുട്ടുള്ള ഒരു വെല്ലുവിളിയാണ്, വേനല്‍ക്കാലത്ത് ഈ പ്രശ്‌നം കൂടുതല്‍ വര്‍ദ്ധിക്കുന്നു. മാറുന്ന കാലാവസ്ഥയില്‍ പ്രമേഹമുള്ളവര്‍ അതീവ ജാഗ്രത പാലിക്കണമെന്നാണ് ആരോഗ്യ വിദഗ്ധര്‍ പറയുന്നത്.

വേനല്‍ക്കാലത്ത് മിക്ക ആളുകളും ശീതളപാനീയങ്ങള്‍, സോഡ, പാക്കറ്റ് ജ്യൂസ്, കരിമ്പ് ജ്യൂസ് തുടങ്ങി പലതരം പാനീയങ്ങള്‍ കഴിക്കുന്നു. പ്രമേഹരോഗികളും ചൂടില്‍ നിന്ന് ആശ്വാസം ലഭിക്കാന്‍ ഇവയെല്ലാം കഴിക്കുന്നു. എന്നാല്‍ അങ്ങനെ ചെയ്യുന്നത് അത്യന്തം ദോഷകരമാണ്. ശീതള പാനീയങ്ങളിലും മറ്റ് മധുര പാനീയങ്ങളിലും അമിതമായ അളവില്‍ പഞ്ചസാര അടങ്ങിയിട്ടുണ്ട്, ഇത് പ്രമേഹ രോഗികളില്‍ പഞ്ചസാരയുടെ അളവ് അതിവേഗം വര്‍ദ്ധിപ്പിക്കും. ഇതുമൂലം പ്രമേഹ രോഗികളുടെ അവസ്ഥ കൂടുതല്‍ വഷളാകുകയും ചെയ്യും. അത്തരമൊരു സാഹചര്യത്തില്‍ വേനല്‍ക്കാലത്ത് പ്രമേഹ രോഗികള്‍ അവരുടെ രക്തത്തിലെ പഞ്ചസാരയിലെ ഏറ്റക്കുറച്ചില്‍ നിയന്ത്രിക്കാന്‍ ചില കാര്യങ്ങള്‍ ശ്രദ്ധിക്കേണ്ടതായുണ്ട്. വേനല്‍ക്കാലത്ത് രക്തത്തിലെ പഞ്ചസാരയുടെ അളവ് നിയന്ത്രിക്കാനും മൊത്തത്തിലുള്ള ആരോഗ്യം വര്‍ദ്ധിപ്പിക്കാനും സഹായിക്കുന്ന ചില വഴികള്‍ ഇതാ.

ജലാംശം നിലനിര്‍ത്തുക

വേനല്‍ക്കാലത്തെ ചൂടില്‍ നിന്ന് രക്ഷപ്പെടാനും നിര്‍ജ്ജലീകരണം തടയാനുമായി ധാരാളം വെള്ളം കുടിക്കുക. ഇത് രക്തത്തിലെ പഞ്ചസാരയുടെ അളവും ക്രമമാക്കി നിലനിര്‍ത്തും. മൂത്രത്തിലൂടെ അധിക പഞ്ചസാര പുറന്തള്ളാനും ഇത് സഹായിക്കുന്നു. അങ്ങനെ രക്തത്തിലെ പഞ്ചസാരയുടെ അളവ് നിയന്ത്രിച്ച് നിര്‍ത്താനും നിങ്ങള്‍ക്ക് സാധിക്കും.

കുറഞ്ഞ ഗ്ലൈസെമിക് ഉള്ള ഭക്ഷണങ്ങള്‍ കഴിക്കുക

കുറഞ്ഞ ഗ്ലൈസെമിക് ഇന്‍ഡക്‌സ് ഉള്ള ഭക്ഷണങ്ങളായ പച്ചക്കറികള്‍, ധാന്യങ്ങള്‍, ലീന്‍ പ്രോട്ടീനുകള്‍ എന്നിവ വളരെ സാവധാനത്തില്‍ ദഹിക്കുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് വര്‍ദ്ധിക്കുന്നത് തടയുന്നു. അങ്ങനെ ഇത് രക്തത്തിലെ പഞ്ചസാര നിയന്ത്രിച്ച് നിര്‍ത്താന്‍ സഹായിക്കുന്നു.

കാര്‍ബോഹൈഡ്രേറ്റ് കഴിക്കുന്നത് ശ്രദ്ധിക്കുക

രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിന് കാര്‍ബോഹൈഡ്രേറ്റ് കഴിക്കുന്നത് ശ്രദ്ധിക്കണം. ദ്രുതഗതിയിലുള്ള രക്തത്തിലെ പഞ്ചസാരയുടെ വര്‍ദ്ധനവിന് കാരണമാകാതെ സുസ്ഥിരമായ ഊര്‍ജ്ജം പ്രദാനം ചെയ്യുന്ന, ധാന്യങ്ങളും പയര്‍വര്‍ഗ്ഗങ്ങളും പോലുള്ള സങ്കീര്‍ണ്ണമായ കാര്‍ബോഹൈഡ്രേറ്റുകള്‍ കഴിക്കാന്‍ തിരഞ്ഞെടുക്കുക.

വ്യായാമം

ക്രമമായ ശാരീരിക പ്രവര്‍ത്തനങ്ങള്‍ നിങ്ങളുടെ ഇന്‍സുലിന്‍ സംവേദനക്ഷമത മെച്ചപ്പെടുത്താന്‍ സഹായിക്കുന്നു, രക്തപ്രവാഹത്തില്‍ നിന്ന് ഗ്ലൂക്കോസ് നന്നായി ആഗിരണം ചെയ്യാന്‍ ഇത് കോശങ്ങളെ സഹായിക്കുന്നു. രക്തത്തിലെ പഞ്ചസാരയുടെ അളവ് നിയന്ത്രിക്കാനും മൊത്തത്തിലുള്ള ആരോഗ്യം മെച്ചപ്പെടുത്താനുമായി ആഴ്ചയില്‍ എല്ലാ ദിവസവും കുറഞ്ഞത് 30 മിനിറ്റ് നേരമെങ്കിലും മിതമായ രീതിയില്‍ വ്യായാമം ചെയ്യുക.

ചര്‍മ്മസംരക്ഷണം

സൂര്യാഘാതം ശരീരത്തെ സമ്മര്‍ദ്ദത്തിലാക്കുകയും ഇന്‍സുലിന്‍ പ്രതിരോധത്തിലേക്ക് നയിക്കുകയും ചെയ്യും, ഇത് രക്തത്തിലെ പഞ്ചസാരയുടെ അളവ് വര്‍ദ്ധിപ്പിക്കും. സൂര്യതാപം തടയുന്നതിനും രക്തത്തിലെ പഞ്ചസാരയുടെ അളവ് ക്രമമായി നിലനിര്‍ത്തുന്നതിനും വേനല്‍ക്കാലത്ത് സണ്‍സ്‌ക്രീന്‍ ഉപയോഗിക്കുക. ശരീരം മുഴുവന്‍ സംരക്ഷിക്കുന്ന വസ്ത്രം ധരിക്കുക.

സമ്മര്‍ദ്ദം നിയന്ത്രിക്കുക

കോര്‍ട്ടിസോള്‍, അഡ്രിനാലിന്‍ തുടങ്ങിയ ഹോര്‍മോണുകളുടെ ഉത്തേജനത്തെ പ്രേരിപ്പിച്ചുകൊണ്ട് സമ്മര്‍ദ്ദം രക്തത്തിലെ പഞ്ചസാരയുടെ അളവ് വര്‍ദ്ധിപ്പിക്കും. രക്തത്തിലെ പഞ്ചസാരയുടെ അളവ് നിയന്ത്രിക്കാന്‍ സഹായിക്കുന്നതിന് ധ്യാനം, ആഴത്തിലുള്ള ശ്വസന വ്യായാമങ്ങള്‍ അല്ലെങ്കില്‍ യോഗ പോലുള്ള സമ്മര്‍ദ്ദം കുറയ്ക്കുന്ന പ്രവര്‍ത്തനങ്ങള്‍ പരിശീലിക്കുക.

രക്തത്തിലെ പഞ്ചസാരയുടെ അളവ് പതിവായി നിരീക്ഷിക്കുക

വ്യത്യസ്ത ഭക്ഷണങ്ങള്‍, ദൈനംദിന പ്രവര്‍ത്തനങ്ങള്‍, മരുന്നുകള്‍ എന്നിവയോട് നിങ്ങളുടെ ശരീരം എങ്ങനെ പ്രതികരിക്കുന്നുവെന്ന് തിരിച്ചറിയാന്‍ പരിശോധനകള്‍ നിങ്ങളെ സഹായിക്കും. ഇത് നിങ്ങളുടെ രക്തത്തിലെ പഞ്ചസാരയിലെ ഏറ്റക്കുറച്ചിലുകള്‍ നേരത്തെ തന്നെ കണ്ടെത്താനും സഹായിക്കുന്നു.

ഒരു പ്ലാനില്‍ ഉറച്ചുനില്‍ക്കുക

രക്തത്തിലെ പഞ്ചസാരയുടെ അളവ് നിയന്ത്രിക്കുന്നതില്‍ സ്ഥിരത പ്രധാനമാണ്. മരുന്ന്, ഇന്‍സുലിന്‍, ഭക്ഷണക്രമം, വ്യായാമം എന്നിവ സംബന്ധിച്ച് ഒരു കൃത്യത പാലിക്കുക. രക്തത്തിലെ പഞ്ചസാരയുടെ അളവ് സ്ഥിരമായി നിലനിര്‍ത്താനും മൊത്തത്തിലുള്ള ആരോഗ്യം നിലനിര്‍ത്താനും നിങ്ങളുടെ ഡോക്ടറുടെ നിര്‍ദ്ദേശങ്ങള്‍ പാലിക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.