വെളുക്കാൻ പാകിസ്താൻ ക്രീം തേക്കുന്നവരാണോ? അപകടകരമായ മെർക്കുറി; ഈ ലക്ഷണങ്ങൾ കണ്ടാൽ ഉടൻ നിർത്തൂ

പൂനെക്ക് സമീപമുള്ള പിംപ്രി ചിഞ്ച്‌വഡിൽ നിന്ന് പാകിസ്താൻ നിർമ്മിത 'ഗോറി' (Goree) വൈറ്റനിംഗ് ക്രീമുകൾ പോലീസ് പിടിച്ചെടുത്തു (സെപ്റ്റംബർ 25). ആവശ്യമായ ഇറക്കുമതി ലൈസൻസില്ലാതെ വൻതോതിൽ മെർക്കുറി അടങ്ങിയ ഫെയർനസ് ക്രീമുകൾ വിൽക്കുന്നതിനെതിരെ കേന്ദ്ര റെഗുലേറ്ററി അതോറിറ്റി ജാഗ്രതാ നിർദ്ദേശം നൽകിയിരുന്നു. ഇതിന് പിന്നാലെയാണ് പോലീസ് പരിശോധന ശക്തമാക്കിയത്. കടകളിൽ നിന്ന് ക്രീമുകൾ കസ്റ്റഡിയിലെടുത്ത പോലീസ്, ഇതിന്റെ വിതരണ ശൃംഖലയെക്കുറിച്ച് അന്വേഷണം ആരംഭിച്ചിട്ടുണ്ട്. ഉത്സവ സീസൺ ആരംഭിച്ച പശ്ചാത്തലത്തിൽ, വിഷമയമായ ഹെവി മെറ്റലുകൾ അടങ്ങിയ ഇത്തരത്തിലുള്ള വ്യാജ ക്രീമുകൾ വാങ്ങരുതെന്ന് അധികൃതർ ഉപഭോക്താക്കൾക്ക് മുന്നറിയിപ്പ് നൽകി.

പിംപ്രിയിലെ ഒരു കടയിൽ നിന്ന് 12,650 രൂപ വിലമതിക്കുന്ന 23 പാക്കറ്റ് ക്രീമുകളാണ് പോലീസ് പിടിച്ചെടുത്തത്. സംഭവത്തിൽ കടയുടമയെ കസ്റ്റഡിയിലെടുത്തിട്ടുണ്ട്. "ഈ വ്യാജ ഉൽപ്പന്നങ്ങൾ ഇന്ത്യയിലാണോ അതോ വിദേശത്താണോ നിർമ്മിക്കുന്നതെന്ന് കണ്ടെത്താൻ വിശദമായ അന്വേഷണം നടക്കുകയാണ്," ഇൻസ്പെക്ടർ വി. ഡി. റാവത്ത് പറഞ്ഞു. സെപ്റ്റംബർ 8-ന് കേന്ദ്ര ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷൻ (CDSCO) പുറപ്പെടുവിച്ച നിർദ്ദേശത്തിൽ 'ഗോറി', 'ചാന്ദ്നി' എന്നീ ക്രീമുകൾക്ക് അനുമതിയില്ലെന്ന് വ്യക്തമാക്കിയിരുന്നു. മുൻപ് മഹാരാഷ്ട്ര എഫ്.ഡി.എ നടത്തിയ പരിശോധനയിലും ഗോറി ക്രീമിൽ അപകടകരമായ അളവിൽ മെർക്കുറി കണ്ടെത്തിയിരുന്നു.

പാക്കറ്റ് നോക്കി വ്യാജ ക്രീമുകൾ എങ്ങനെ തിരിച്ചറിയാം?

ക്രീം വാങ്ങുമ്പോൾ അതിന്റെ പാക്കറ്റിലെ ലേബലിൽ വാലിഡായ ഇമ്പോർട്ട് രജിസ്ട്രേഷൻ സർട്ടിഫിക്കറ്റ് (IRC) നമ്പറും ഇന്ത്യൻ ഇറക്കുമതിക്കാരന്റെ പൂർണ്ണ വിലാസവും ഉണ്ടോയെന്ന് ഉറപ്പുവരുത്തുക. 2020-ലെ കോസ്മെറ്റിക്സ് റൂൾസ് പ്രകാരം ഈ വിവരങ്ങൾ രേഖപ്പെടുത്തേണ്ടത് നിർബന്ധമാണ്. കൂടാതെ ബാച്ച് നമ്പർ, നിർമ്മാണ തീയതി, കാലാവധി അവസാനിക്കുന്ന തീയതി, നെറ്റ് ക്വാണ്ടിറ്റി, എം.ആർ.പി എന്നിവയും പരിശോധിക്കണം. പെട്ടെന്ന് വെളുപ്പ് നിറം തരുമെന്ന വാഗ്ദാനം, ചേരുവകളുടെ വിവരമില്ലായ്മ, ഇന്ത്യൻ ഇറക്കുമതിക്കാരന്റെ വിലാസമില്ലാതെ 'മേഡ് ഇൻ പാകിസ്താൻ' എന്ന് മാത്രം നൽകിയിരിക്കൽ, മെർക്കുറി അല്ലെങ്കിൽ സ്റ്റീറോയിഡുകളുടെ സാന്നിധ്യം എന്നിവയെല്ലാം വ്യാജ ഉൽപ്പന്നങ്ങളുടെ ലക്ഷണങ്ങളാണ്.

ഗോറി അല്ലെങ്കിൽ ചാന്ദ്നി ക്രീമുകൾ ഉപയോഗിച്ചവരാണോ നിങ്ങൾ? എങ്കിൽ ഉടൻ ചെയ്യേണ്ട കാര്യങ്ങൾ

ഇത്തരം ക്രീമുകൾ ഉപയോഗിക്കുന്നത് ഉടൻ നിർത്തുക. ഇതിന്റെ പാക്കറ്റ്, ലേബൽ, ബാച്ച് നമ്പർ, ബിൽ എന്നിവയുടെ ചിത്രം എടുത്തു സൂക്ഷിക്കുക. ചർമ്മത്തിൽ ചൊറിച്ചിലോ എരിച്ചിലോ കറുത്ത പാടുകളോ കണ്ടാൽ ഉടൻ ഒരു ഡെർമറ്റോളജിസ്റ്റിന്റെ സഹായം തേടണം. മഹാരാഷ്ട്ര എഫ്.ഡി.എയുടെ പരാതി പരിഹാര പോർട്ടലിലോ, കേരള ഡ്രഗ്സ് കൺട്രോളിന്റെ ഓൺലൈൻ പോർട്ടൽ / K-DRUGS വഴിയോ പരാതി നൽകാം. മെർക്കുറിയുടെ ഉപയോഗം വൃക്കകളെയും നാഡീവ്യവസ്ഥയെയും ഗുരുതരമായി ബാധിക്കുമെന്ന് വിദഗ്ദ്ധർ മുന്നറിയിപ്പ് നൽകുന്നു. അതിനാൽ കൃത്യസമയത്ത് വൈദ്യസഹായം ഉറപ്പാക്കുക.

ഉത്സവ സീസണിൽ മെർക്കുറി ഭയമില്ലാതെ തിരഞ്ഞെടുക്കാവുന്ന സുരക്ഷിതമായ സ്‌കിൻകെയറുകൾ

പകൽ സമയങ്ങളിൽ ഉപയോഗിക്കാൻ ബ്രോഡ് സ്പെക്ട്രം SPF50 PA++++ അടങ്ങിയ നല്ലൊരു സൺസ്ക്രീൻ തിരഞ്ഞെടുക്കുക, നിർദ്ദേശാനുസരണം ഇത് കൃത്യമായ ഇടവേളകളിൽ വീണ്ടും പുരട്ടുക. ചർമ്മത്തിന്റെ നിറം വരുന്നത് മെച്ചപ്പെടുത്താൻ അംഗീകൃത ഇന്ത്യൻ വിൽപനക്കാരിൽ നിന്ന് 2% നിയാസിനാമൈഡ് (niacinamide) സിറം ഉപയോഗിക്കാം. ആദ്യമായി ഉപയോഗിക്കുന്നവർക്ക് രാത്രിയിൽ നേരിയ തോതിൽ റെറ്റിനോൾ (retinol) ഉപയോഗിച്ചു തുടങ്ങാം. ആദ്യം ഒരു പാച്ച് ടെസ്റ്റ് നടത്താൻ മറക്കരുത്. ഉൽപ്പന്നങ്ങൾ വാങ്ങുമ്പോൾ എപ്പോഴും എം.ആർ.പി, ഇറക്കുമതിക്കാർ / നിർമ്മാതാക്കളുടെ വിവരങ്ങൾ, കാലാവധി തീയതി എന്നിവ പരിശോധിക്കുക. ദിവസങ്ങൾക്കുള്ളിൽ അതിവേഗം വെളുപ്പിക്കാം എന്ന് വാഗ്ദാനം ചെയ്യുന്ന ഉൽപ്പന്നങ്ങളിൽ വീഴാതിരിക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.