മൂത്രം ഒഴിച്ചുകഴിഞ്ഞാൽ സ്വകാര്യഭാ​ഗം കഴുകാറുണ്ടോ? സ്ത്രീയും പുരുഷനും അറിഞ്ഞിരിക്കേണ്ട ചില വസ്തുകൾ

ഇന്ന് സ്ത്രീകളിലും പുരുഷന്മാരിലും ഒരുപോലെ കണ്ടുവരുന്ന ഒരു പ്രധാന പ്രശ്നങ്ങളിൽ ഒന്നാണ് സ്വകാര്യഭാ​ഗത്തെ അണുബാധ. കൃത്യമായ രീതിയിൽ, വൃത്തിയിൽ പരിപാലിക്കാത്തതുതന്നെയാണ് പലപ്പോഴും ഇത്തരം ആരോ​ഗ്യ പ്രശ്നങ്ങളിലേയ്ക്ക് നയിക്കുന്നത്. പ്രത്യേകിച്ച്, മൂത്രം ഒഴിച്ചുകഴിഞ്ഞാൽ, സ്വകാര്യഭാ​ഗം വൃത്തിയിൽ ക്ലീൻ ചെയ്തെടുക്കാത്തത് പലവിധത്തിലുള്ള രോ​ഗങ്ങളിലേയ്ക്ക് നിങ്ങളെ നയിച്ചേക്കാം. ശാരീരിക ബന്ധത്തിൽ ഏർപ്പെടുന്നവരാണെങ്കിൽ ലൈം​ഗിക രോ​ഗങ്ങൾ പകരാൻ ഇവ കാരണമായേക്കാം.

നിങ്ങളുടെ സ്വകാര്യഭാ​ഗം എത്രത്തോളം വൃത്തിയിൽ പരിപാലിക്കപ്പെടുന്നുവോ അതിനനുസരിച്ചായിരിക്കും, നിങ്ങളുടെ വ്യക്തി ശുചിത്വവും നിർണ്ണയിക്കപ്പെടുക. ഇത്തരത്തിൽ നല്ല വ്യക്തിശുചിത്വം നിലനിർത്താൻ, ഓരോ വ്യക്തികളും ടോയ്‌ലെറ്റിൽ പോയി വരുമ്പോൾ, അതുപോലെ തന്നെ മൂത്രം ഒഴിച്ചു കഴിയുമ്പോൾ, വൃത്തി പാലിക്കേണ്ടത് അനിവാര്യം. വൃത്തിയില്ലാതിരുന്നാൽ നിങ്ങളെ കാത്തിരിക്കുന്നത് ഈ പ്രശ്നങ്ങൾ.

ദുർ​ഗന്ധം

സ്വകാര്യഭാ​ഗത്ത് അമിതമായി ദുർ​ഗന്ധം ഉണ്ടാകുന്നതിന് ഇത് കാരണമാകുന്നുണ്ട്. കാരണം, മൂത്രം ഒഴിച്ചതിനുശേഷം വെള്ളം ഒഴിച്ച് വൃത്തിയാക്കാതിരുന്നാൽ, മൂത്രത്തിന്റെ അംശം സ്വകാര്യഭാ​ഗത്ത് ഇരിക്കുന്നു. ഇത് അടിവസ്ത്രങ്ങളിൽ പറ്റിപ്പിടിക്കാനും, അതുപോലെ, വിയർപ്പും ചേർന്ന് ദുർ​ഗന്ധം ഉണ്ടാകുന്നതിനും ഇത് കാരണമാകുന്നു. വിവാഹിതരാണെങ്കിൽ, ശാരീരിക ബന്ധത്തിൽ ഏർപ്പെടുമ്പോൾ പങ്കാളിയിൽ അതൃപ്തി ഉണ്ടാക്കുന്നതിന് ഇത് കാരണമായേക്കാം.

ചൊറിച്ചിൽ

സ്വകാര്യഭാ​ഗത്ത് അമിതമായി ചൊറിച്ചിൽ ഉണ്ടാകുന്നതിനു പിന്നിലെ പ്രധാന കാരണങ്ങളിൽ ഒന്ന് വൃത്തിയില്ലായ്മയാണ്. പ്രത്യേകിച്ച്, മൂത്രത്തിന്റെ അംശവും, വിയർപ്പും ആ ഭാ​ഗത്തെ, ചർമ്മത്തിലും, രോമത്തിലും അടിയുന്നത് അണുബാധയ്ക്ക് കാരണമാകുന്നു. ചിലപ്പോൾ, കുരുക്കൾ വരുന്നതിനും, പഴുക്കുന്നതിനും ഇത് കാരണമാകുന്നുണ്ട്. ഇത്തരം അണുബാധകൾ അമിതമായി ചൊറിച്ചിൽ വരുന്നതിന് കാരണമാകുന്നു. ഇത്തരം അണുബാധകൾ ചിലപ്പോൾ പങ്കാളിയിലേയ്ക്കും പകരാൻ സാധ്യത കൂടുതലാണ്.

അണുബാധ

യൂറിനറി ട്രാക്റ്റ് ഇൻഫക്ഷൻ വരുന്നതിന് ഇതൊരു പ്രധാന കാരണമാണ്. കൃത്യമായി ക്ലീൻ ചെയ്യാത്തതും, ഈ-കോലി ബാക്റ്റീരിയ വർദ്ധിക്കുന്നതും അണുബാധയ്ക്ക് കാരണമാണ്. ഇത് വൃക്കയുടെ ആരോ​ഗ്യത്തിന് നല്ലതല്ല.

സ്ത്രീകൾ ശ്രദ്ധിക്കേണ്ടത്

മൂത്രം ഒഴിച്ചതിനുശേഷം കഴുകി, ആ ഭാ​ഗത്തു നിന്നും വെള്ളം തുണികൊണ്ട് ഒപ്പി കളയേണ്ടതാണ്. ഇത്തരത്തിൽ തുണിയ്ക്കു പകരം, നല്ല ടിഷ്യു ഉപയോ​ഗിക്കാവുന്നതാണ്. അതുപോലെ, സ്വകാര്യഭാ​ഗത്തെ മുടി വെട്ടി കളയുന്നത് നല്ലതായിരിക്കും. ഇത് മൂത്രത്തിന്റെ അംശം പറ്റിപ്പിടിക്കാതിരിക്കാൻ സഹായിക്കും. രണ്ട് നേരം അടിവസ്ത്രം മാറുന്നത് നല്ലതാണ്. ഇത് സ്വകാര്യഭാ​ഗത്ത് ഈർപ്പം നിലനിൽക്കുന്നത് തടയാൻ സഹായിക്കും. യീസ്റ്റ് ഇൻഫക്ഷൻ വരാതിരിക്കാനു സഹായിക്കും.

പുരുഷന്മാർ ശ്രദ്ധിക്കേണ്ടത്

പുരുഷന്മാരും മൂത്രം ഒഴിച്ചതിനുശേഷം നല്ലപോലെ സ്വകാര്യഭാ​ഗം വൃത്തിയാക്കണം. ലിം​ഗത്തിന് മുകളിലുള്ള ചർമ്മം നീക്കി, നല്ലപോലെ കഴുകി, തുടക്കേണ്ടത് അനിവാര്യമാണ്. ഇല്ലാത്തപക്ഷം, അണുബാധ വരാൻ കാരണമാകും. അതുപോലെ, ഇറുകിയ വസ്ത്രങ്ങൾ ധരിക്കാതിരിക്കുക. രണ്ട് നേരം അടിവസ്ത്രങ്ങൾ മാറ്റാൻ ശ്രദ്ധിക്കുക. സ്വകാര്യഭാ​ഗത്തെ രോമം നീക്കം ചെയ്യുക.

ഉപയോ​ഗിക്കാൻ പാടില്ലാത്തവ

കഴുകുമ്പോൾ സോപ്പ് ഉപയോ​ഗിക്കുന്നത് സ്വകാര്യഭാ​ഗത്തെ പിഎച്ച് ലെവൽ ബാലൻസ് ഇല്ലാതാക്കുന്നതിന് കാരണമാകുന്നു. അതിനാൽ, സാധാ വെള്ളത്തിൽ കഴുകിയാൽ മതിയാകും. സ്വകാര്യ ഭാ​ഗത്ത് മണം വരാതിരിക്കാൻ ക്രീം, സ്പ്രേ എന്നിവ ഉപയോ​ഗിക്കരുത്. ഇറുകിയ വസ്ത്രങ്ങൾ ഒഴിവാക്കാം. എന്തെങ്കിലും തരത്തിലുള്ള ബുദ്ധിമുട്ടുകൾ അനുഭവപ്പെട്ടാൽ ഡോക്ടറെ കാണിക്കാൻ മടിക്കരുത്. സ്വയം ചികിത്സകൾ ഒഴിവാക്കുന്നതാണ് നല്ലത്.

Disclaimer : ഇവിടെ നല്‍കിയിരിക്കുന്ന വിവരങ്ങള്‍ ഇന്റര്‍നെറ്റില്‍ നിന്ന് ലഭിച്ച പൊതുവായ അനുമാനങ്ങളുടെയും വിവരങ്ങളുടെയും അടിസ്ഥാനത്തിലാണ്. മലയാളം ബോള്‍ഡ്സ്‌കൈ ഇത് സ്ഥിരീകരിക്കുന്നില്ല. ഇത്തരം കാര്യങ്ങള്‍ ചെയ്യുന്നതിന് മുന്‍പ് വിദഗ്ധന്റെ ഉപദേശം സ്വീകരിക്കേണ്ടതാണ്.