കണ്ണിനെ കാക്കും ഭക്ഷണങ്ങള്‍

Published: Tuesday, October 30, 2012, 12:59 [IST]

കണ്ണുള്ളപ്പോള്‍ കണ്ണിന്റെ വിലയറിയില്ലെന്നൊരു ചൊല്ലുണ്ട്. ഇത ്‌വാസ്തവവുമാണ്. കമ്പ്യൂട്ടര്‍ ഉപയോഗവും ഇപ്പോഴത്തെ ജീവിതരീതികളും കുട്ടികളില്‍ പോലും കാഴ്ച വൈകല്യങ്ങളും കണ്ണിന് പ്രശ്‌നങ്ങളും ഉണ്ടാക്കുന്നു.

കണ്ണിന്റെ ആരോഗ്യത്തിന് പല ഘടകങ്ങളുണ്ട്. ഭക്ഷണം ഇതില്‍ പ്രധാനപ്പെട്ട ഒന്നു തന്നെയാണ്. കണ്ണിന്റെ ആരോഗ്യത്തിന് സഹായിക്കുന്ന ചില ഭക്ഷണങ്ങളുണ്ട്. ഇവ ആഹാരശീലങ്ങളില്‍ ഉള്‍പ്പെടുത്തിയാല്‍ ഒരു പരിധി വരെ കണ്ണുകളുടെ ആരോഗ്യം സംരക്ഷിക്കാവുന്നതേയുള്ളൂ.

ഇത്തരം ഭക്ഷണങ്ങളെക്കുറിച്ച് കൂടുതലറിയുന്നത് കണ്ണിന്റെ ആരോഗ്യം സംരക്ഷിക്കാന്‍ സഹായിക്കും. ചികിത്സ തേടുന്നതിലും ഭേദമല്ലേ, തികച്ചും ആരോഗ്യകരമായ വഴിയിലൂടെ കണ്ണിന്റെ ആരോഗ്യം സംരക്ഷിക്കുന്നത്.

കണ്ണിന്റെ ആരോഗ്യത്തിന് പ്രധാനപ്പെട്ട ഒരു ഭക്ഷണമാണ് ക്യാരറ്റ്. ഇതിലെ വൈറ്റമിന്‍ സി തന്നെയാണ് ഈ ഗുണം നല്‍കുന്നത്.

വെളുത്തുള്ളി, ഉള്ളി എന്നിവയിലെ സള്‍ഫര്‍ ഗ്ലൂട്ടാതയോണ്‍ എന്ന ആന്റി ഓക്‌സിഡന്റിന്റെ ഉല്‍പാദനത്തിന് സഹായിക്കുന്നു. ഇത് കണ്ണിന്റെ ആരോഗ്യത്തിന് സഹായകമായ ഒരു ആന്റി ഓക്‌സിഡന്റാണ്.

ഇലക്കറികള്‍, പച്ചക്കറികള്‍ എന്നിവയും കണ്ണിന്റെ ആരോഗ്യത്തിന് വളരെ പ്രധാനമാണ്. വൈററമിനുകള്‍, കരാറ്റനോയ്ഡുകള്‍, ലുട്ടീന്‍ , ബീറ്റാ കരോട്ടിന്‍ എന്നിവ കണ്ണിന് കാഴ്ച നല്‍കുന്ന ഘടകങ്ങളാണ്.

മുട്ടയും കാഴ്ച ശക്തിപ്പെടുത്തുന്ന ഒരു ഘടകമാണ്. മുട്ടയിലെ സിസ്റ്റൈന്‍, സള്‍ഫര്‍, ലെസിത്തിന്‍, അമിനോ ആസിഡുകള്‍ എന്നിവ തിമിരമുണ്ടാകുന്നത് തടയുന്നു.

മത്സ്യം, പ്രത്യേകിച്ച് കടല്‍ മത്സ്യങ്ങള്‍ ഒമേഗ ത്രീയുടെ കേന്ദ്രമാണ്. കണ്ണിന്റെ കാഴ്ച കൂടുതല്‍ സൂക്ഷ്മമാക്കാന്‍ ഇവ സഹായിക്കും.

സോയയിലെ പ്രോട്ടീന്‍, ഫാറ്റി ആസിഡുകള്‍, വൈറ്റമിന്‍ ഇ എന്നിവയും കണ്ണിന്റെ കാഴ്ചയ്ക്ക് സഹായകമാണ്.

നട്‌സും കാഴ്ച വര്‍ദ്ധിപ്പിക്കാന്‍ സഹായിക്കുന്ന ഘടകങ്ങള്‍ തന്നെ. ഇവയിലെ ഒമേഗ ത്രീ ഫാറ്റി ആസിഡുകള്‍, സിങ്ക് എന്നിവ വൈറ്റമിന്‍ എ കൂടുതല്‍ ഉപയോഗിക്കാനും ഇതു വഴി കാഴ്ച വര്‍ദ്ധിപ്പിക്കാനും സഹായിക്കും.