ആന്റി ഓക്‌സിഡന്റുകള്‍ കഴിച്ചാല്‍...

ആരോഗ്യമുള്ള ശരീരത്തിന് നല്ല ഭക്ഷണം വളരെ പ്രധാനം. നല്ല ഭക്ഷണമെന്നാല്‍ പലവിധ പോഷകങ്ങള്‍ അടങ്ങിയവ. ചില ഭക്ഷണങ്ങളുണ്ട്, ആന്റി ഓക്‌സിഡന്റുകള്‍ അടങ്ങിയവ.

ആരോഗ്യത്തിനു മാത്രമല്ലാ, ചര്‍മത്തിനും ഇവ വളരെ പ്രധാനമാണ്. ശരീരത്തിലെ വിഷാംശം നീക്കം ചെയ്യുകയെന്ന കടമയും ആന്റി ഓക്‌സിഡന്റുകള്‍ ചെയ്യുന്നുണ്ട്. ആന്റി ഓക്‌സിഡന്റുകള്‍ അടങ്ങിയ ചില ഭക്ഷണങ്ങളെക്കുറിച്ച് അറിയൂ.

മസാലയായി ഉപയോഗിക്കുന്ന ഗ്രാമ്പൂ നല്ലൊന്നാന്തരം ആന്റി ഓക്‌സിഡന്റാണ്. കൊളസ്‌ട്രോള്‍ കുറയ്ക്കുവാന്‍ സഹായിക്കുന്നത് കൊണ്ടു കൂടിയാണ് മിക്കവാറും മസാലകളില്‍, പ്രത്യേകിച്ച് ഇറച്ചിമസാലകളില്‍ ഇവ ചേര്‍ക്കുന്നത്.

രാജ്മ എന്ന പേരിലറിപ്പെടുന്ന കിഡ്‌നി ബീന്‍സ് ആന്റി ഓക്‌സിഡന്റുകളുടേയും പ്രോട്ടീനുകളുടേയും കലവറയാണെന്ന് പറയാം. ചുവപ്പ്, കറുപ്പ് നിറങ്ങളിലുള്ള എല്ലാ തരം ബീന്‍സുകളും നല്ലതാണ്. പ്രതിരോധ ശേഷി നല്‍കുന്നു എന്ന മറ്റൊരു ഗുണു കൂടി ഇവയ്ക്കുണ്ട്.

കാപ്‌സിക്കത്തില്‍ ധാരാളം ആന്റിഓക്‌സിഡന്റുകള്‍ അടങ്ങിയിട്ടുണ്ട്. ക്യാന്‍സര്‍ പ്രതിരോധിക്കാന്‍ ഇവ സഹായകമാണെന്ന് പഠനങ്ങള്‍ തെളിയിച്ചിട്ടുണ്ട്. അതുകൊണ്ട് ക്യാന്‍സര്‍ രോഗികള്‍ക്കുള്ള ഭക്ഷണക്രമത്തില്‍ കാപ്‌സിക്കം ഉള്‍പ്പെടുത്തുവാന്‍ ഡോക്ടര്‍മാര്‍ നിര്‍ദേശിക്കാറുണ്ട്.

വൈറ്റമിന്‍ സി, ഇ തുടങ്ങിയവ അടങ്ങിയ ഭക്ഷണങ്ങള്‍ ശരീരത്തിന് ആവശ്യമായ പോഷകങ്ങള്‍ നല്‍കുക മാത്രമല്ലാ, ചര്‍മത്തിന്റെ യുവത്വവും തിളക്കവും നിലനിര്‍ത്തുകയും ചെയ്യുന്നു. നാരങ്ങാവര്‍ഗത്തില്‍ പെട്ട എല്ലാ പഴവര്‍ഗങ്ങളിലും വൈറ്റമിന്‍ സി അടങ്ങിയിട്ടുണ്ട്. ബദാം, ഉണക്കിയ പ്ലം പഴം എന്നിവയില്‍ വൈറ്റമിന്‍ ഇയും അടങ്ങിയിട്ടുണ്ട്.

ചായയും നല്ലൊന്നാന്തരം ആന്റി ഓക്‌സിഡന്റാണ്. ഗ്രീന്‍ ടീ, കട്ടന്‍ ചായ തുടങ്ങിയവയാണ് കൂടുതല്‍ നല്ലത്. ചായയില്‍ പാല്‍ ചേര്‍ത്താല്‍ ഇത്തരം ഗുണങ്ങള്‍ ഇല്ലാതെയാകുകയും ചെയ്യും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.