പഴം കഴിച്ചാല്‍ തടിക്കുമോ?

വാസ്തവത്തില്‍ പഴം തടിപ്പിക്കുമോ, ഇല്ലെന്ന് ഒറ്റവാക്കില്‍ പറയാം. എന്നാല്‍ പഴത്തിന് തടിപ്പിക്കുന്ന ഭക്ഷണമെന്ന പേരു വരുത്താന്‍ ചില പ്രത്യേക കാരണങ്ങളുമുണ്ട്.

പഴത്തില്‍ കാര്‍ബോഹൈഡ്രേറ്റുകളും കലോറിയുമുണ്ട്. എന്നാല്‍ ഇതെളുപ്പം ഊര്‍ജമായി മാറുന്നവയാണ്. ഇവയില്‍ കൊഴുപ്പോ ഉപ്പോ മറ്റൊന്നും തന്നെ അടങ്ങിയിട്ടില്ല. കാര്‍ബോഹൈഡ്രേറ്റുകളും കലോറിയുമാണ് ഇത് തടിപ്പിക്കുമെന്ന തോന്നല്‍ നല്‍കുന്നത്. സത്യത്തില്‍ അവ ഊര്‍ജമായി മാറുന്നവയാണ്. സ്‌പോട്‌സുകാരും മറ്റും പഴം കഴിയ്ക്കുന്നതിന്റെ കാരണവും ഇതുതന്നെ.

പഴത്തില്‍ ധാരാളം പോഷാകംശങ്ങള്‍ അടങ്ങിയിട്ടുണ്ട്. ഫൈബര്‍, വൈറ്റമിന്‍, ധാതുക്കള്‍ എന്നിവ ഇതില്‍ ധാരാളമുണ്ട്. വണ്ണം കുറയ്ക്കാന്‍ ഡയറ്റെടുക്കുന്നവര്‍ക്ക് ദിവസവും ഒന്നോ രണ്ടോ പഴം കഴിയ്ക്കാം.ശരീരത്തിന്റെ ഊര്‍ജനില മെച്ചപ്പെടും. എന്നാല്‍ എണ്ണത്തിന്റെ കാര്യത്തില്‍ ശ്രദ്ധ വയ്ക്കണം. രണ്ടിനു പകരം ആറു കഴിച്ചാല്‍ മറ്റൊന്നും കഴിച്ചില്ലെങ്കിലും ശരീരം തടിച്ചെന്നു വരും.

വ്യായാമത്തിന് മുന്‍പ് കഴിയ്ക്കാവുന്ന നല്ലൊന്നാന്തരം ഭക്ഷണമാണിത്. ഇത് ശരീരത്തിന് വ്യായാമം ചെയ്യാനാവശ്യമായ ഊര്‍ജം നല്‍കുന്നു. ഇവയിലെ സുക്രോസ് പോലുള്ള മധുരം പെട്ടെന്ന വിഘടിച്ച് ഊര്‍ജമായി മാറുകയാണ് ചെയ്യുന്നത്.

നല്ലൊരു പ്രഭാതഭക്ഷണമാണ് പഴം. ഒരു ഗ്ലാസ് പാലും പഴവും ആരോഗ്യം നല്‍കും. രാത്രി കിടക്കാന്‍ നേരത്തും ഇതു കഴിയ്ക്കാം. മലബന്ധം അകറ്റുന്നതിനും ഇതിലെ നാരുകള്‍ സഹായിക്കും.

ഒരോരുത്തരുടേയും ശരീരപ്രകൃതിക്കനുസരിച്ച് ദിവസവും ഒന്നോ രണ്ടോ പഴം കഴിയ്ക്കുന്നത് തടി കൂട്ടില്ലെന്ന കാര്യം ഉറപ്പ്. നേരെ മറിച്ച് ഇത് ശരീരത്തിന്റെ പോഷകാഹാര ആവശ്യം പൂര്‍ത്തീകരിക്കുകയും ചെയ്യുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.