ഐസ്‌ക്രീം സന്തോഷം നല്‍കുന്നു

ഐസ്‌‌ക്രീം ഇഷ്ടമില്ലാത്തവരായി ആരെങ്കിലുമുണ്ടാകുമോ. ഐസ്‌ക്രീമിനെന്തെങ്കിലും ഗുണമുണ്ടോ എന്നൊന്നും നോക്കാതെ കിട്ടുമ്പോള്‍ എത്രവേണമെങ്കിലും കഴിയ്‌ക്കുന്നവരാണ്‌ നമ്മളില്‍ പലരും.

ഐസ്‌ക്രീം കിട്ടിയാല്‍ കഴിയ്‌ക്കാമെന്നാണ്‌ സ്വന്തം മനോഭാവമെങ്കിലും കുട്ടികള്‍ ഐസ്‌ക്രീമിന്‌ വേണ്ടി കരയുമ്പോള്‍ കണ്ണുരുട്ടുന്ന മാതാപിതാക്കളുടെ എണ്ണവും കുറവല്ല. എന്നാല്‍ ഐസ്‌ക്രീമിനോട്‌ ഇങ്ങനെ ശത്രുത കാണിക്കേണ്ടതില്ലെന്നാണ്‌ ഗവേഷകര്‍ പറയുന്നത്‌.

ഐസ്‌ക്രീമിന്‌ ആളുകളെ സന്തോഷവാന്മാരും സന്തോഷവതികളുമാക്കാന്‍ കഴിവുണ്ടത്രേ. ഓഹിയോയിലെ ആഷ്‌ലാന്റ്‌ യൂണിവേഴ്‌സിറ്റിയിലെ ഗവേഷകരാണ്‌ ഇതുസംബന്ധിച്ച പഠനം നടത്തിയത്‌. 240 യുവാക്കളിലാണ്‌ ഗവേഷകര്‍ ഇതുസംബന്ധിച്ച പഠനം നടത്തിയത്‌.

വിവിധ തരം ഭക്ഷ്യവസ്‌തുക്കള്‍ നല്‍കി അവ അവരില്‍ ഉണ്ടാക്കുന്ന വ്യത്യസ്ഥ മാനസികാവസ്ഥകള്‍ രേഖപ്പെടുത്താനും അവയുടെ ഗുണഫലങ്ങള്‍ രേഖപ്പെടുത്താനുമാണ്‌ ഗവേഷകര്‍ നിര്‍ദ്ദേശിച്ചത്‌.

ഐസ്‌ക്രീം കഴിയ്‌ക്കുമ്പോള്‍ തങ്ങള്‍ക്ക്‌ സന്തോഷമുണ്ടാകുന്നുവെന്നാണത്രേ ഭൂരിഭാഗം ആളുകളും രേഖപ്പെടുത്തിയത്‌. ഐസ്‌ക്രീം കഴിഞ്ഞാല്‍പ്പിന്നെ പച്ചക്കറികള്‍, പഴങ്ങള്‍എന്നിവയ്‌ക്കാണ്‌ കൂടുതല്‍ റേറ്റിങ്‌ കിട്ടിയത്‌.

ഇതിന്‌ ശേഷം അഭിപ്രായം രേഖപ്പെടുത്താന്‍ നല്‍കിയ ഭക്ഷ്യവിഭവങ്ങളുടെ പട്ടിക ഓര്‍ത്തെഴുതാനും ഗവേഷകര്‍ ഇവരോട്‌ ആവശ്യപ്പെട്ടു. മിക്കവരും ആരോഗ്യദായകമായ ഭക്ഷണസാധനങ്ങളുടെ പേരുകള്‍ ഓര്‍ത്തുവച്ചിട്ടുണ്ടായിരുന്നത്രേ. ഇക്കൂട്ടത്തില്‍ ഐസ്‌ക്രീമും ഉണ്ടായിരുന്നു.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.