ഡയബെറ്റിക് ഫുട്ട്, മുന്‍കരുതലുകള്‍

Diabetes

oi-Saritha

By Veena

Updated: Saturday, July 28, 2012, 12:18 [IST]

പ്രമേഹം പൂര്‍ണപരിഹാരമില്ലാത്ത ഒരു അസുഖമാണെന്നു പറയാം. പ്രമേഹം ഒരു രോഗമാണ്. ഇതോടനുബന്ധിച്ച് മറ്റു രോഗങ്ങളുണ്ടാകുമെന്നതാണ് മറ്റൊരു പ്രത്യേകത.

ഡയബെറ്റിസുണ്ടാക്കുന്ന രോഗങ്ങളില്‍ പെട്ട ഒന്നാണ് ഡയബെറ്റിക് ഫുട്ട്. പ്രമേഹം മൂലം കാലുകള്‍ക്കുണ്ടാകുന്ന അസുഖമാണ് ഇതുകൊണ്ട് ഉദ്ദേശിക്കുന്നത്. കാലുകളില്‍ മുറിവുണ്ടായാല്‍ ഇത് ഉണങ്ങാന്‍ ഏറെക്കാലം വേണ്ടി വരും. ഇതുവഴി അണുബാധയും ഗുരുതരമായ അസുഖങ്ങളും ഉണ്ടാകാന്‍ സാധ്യതയുമുണ്ട്.

ഡയബെറ്റിക് ഫുട്ട് ഗുരുതരമായാല്‍ ശരീരത്തിലെ മറ്റു ഭാഗങ്ങളിലേക്ക് പഴുപ്പും അസുഖങ്ങളും പടരാതിരിക്കാന്‍ ഇത് മുറിച്ചു കളയേണ്ട അവസ്ഥ വരെയുണ്ടാകും.

ഇക്കാരണം കൊണ്ടുതന്നെ കാലുകളില്‍ മുറിവോ ചതവോ വരാതിരിക്കാന്‍ രോഗികള്‍ ശ്രദ്ധിക്കണം. കാലിന്റെ ചര്‍മത്തില്‍ നിറവ്യത്യാസമോ കുമിളകോ വിണ്ടുകീറലോ ഉണ്ടെങ്കില്‍ ഡോക്ടറെ കാണാന്‍ വൈകരുത്.

കാലുകള്‍ ചെറുചൂടുവെള്ളത്തില്‍ അല്‍പം ഉപ്പിട്ട് അതില്‍ ഇറക്കി വയ്ക്കുന്നതു നല്ലതാണ്. പീന്നീട് കാലിലെ ഈര്‍പ്പം മുഴുവന്‍ തുടച്ചു കളഞ്ഞ് പൗഡറിട്ടു സൂക്ഷിക്കാം. ഈര്‍പ്പം മുഴുവനായി പോകുന്നതിനാണ് പൗഡറിടുന്നത്. അണുബാധ തടയാന്‍ സഹായകമായ കാന്‍ഡിഡ് പോലുള്ളവ അടങ്ങിയ പൗഡറുകള്‍ ഉപയോഗിക്കാം.

സോക്‌സിടുന്ന ശീലമുള്ളവരാണെങ്കില്‍ ദിവസവും സോക്‌സ് മാറണം. കോട്ടന്‍ സോക്‌സുകള്‍ ഉപയോഗിക്കുന്നതായിരിക്കും കൂടുതല്‍ നല്ലത്. വീടിനുള്ളിലുള്ളിലും പുറത്തും ചെരിപ്പിട്ടു നടക്കണം.

ദിവസവും അരമണിക്കൂറെങ്കിലും നടക്കുന്നത് നല്ലതാണ്. കാലിലെ രക്തപ്രവാഹം വര്‍ദ്ധിക്കാനും ഞരമ്പുകളുടെ പ്രവര്‍ത്തനം ശക്തിപ്പെടാനും ഇത് നല്ലൊരു വ്യായാമമാണ്.

കാലിന് അധികം തണുപ്പ് എല്‍ക്കാതിരിക്കാന്‍ ശ്രദ്ധിക്കണം. കാലുകള്‍ക്ക് അമിതമായി തണുപ്പേല്‍ക്കുന്നത് രക്തപ്രവാഹത്തെ ബാധിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.