ഡൽഹിയിൽ 44 ഡിഗ്രി ചൂട്; വ്യായാമം ചെയ്യുന്നവർക്ക് എട്ടിന്റെ പണി കിട്ടാതിരിക്കാൻ ഈ മുൻകരുതലുകൾ വേണം!

ഡൽഹിയിലും പരിസര പ്രദേശങ്ങളിലും ചൂട് കടുക്കുന്നു. ഏപ്രിൽ 24 വരെ താപനില 44 ഡിഗ്രി സെൽഷ്യസ് വരെ ഉയർന്നേക്കാമെന്നതിനാൽ കാലാവസ്ഥാ നിരീക്ഷണ കേന്ദ്രം (IMD) ഇവിടെ യെല്ലോ അലർട്ട് പ്രഖ്യാപിച്ചു. ഈ സാഹചര്യത്തിൽ വ്യായാമം ചെയ്യുന്നവർ പ്രത്യേകം ശ്രദ്ധിക്കണമെന്ന് വിദഗ്ധർ മുന്നറിയിപ്പ് നൽകുന്നു. നിർജ്ജലീകരണം ഒഴിവാക്കാൻ ഫിറ്റ്‌നസ് ദിനചര്യയിൽ ആവശ്യമായ മാറ്റങ്ങൾ വരുത്തണം. ഈ ആഴ്ച വെയിൽ കടുക്കുന്നതിനാൽ ശാരീരിക അധ്വാനങ്ങളിൽ ഏർപ്പെടുമ്പോൾ അതീവ ജാഗ്രത പാലിക്കുക.

കഠിനമായ ചൂടിൽ തീവ്രമായ വ്യായാമമുറകളിൽ ഏർപ്പെടുന്നത് വലിയ ആരോഗ്യപ്രശ്നങ്ങൾക്ക് കാരണമാകും. കത്തുന്ന വെയിലത്ത് വർക്കൗട്ട് ചെയ്യുന്നത് പേശിവലിവിലേക്കും കടുത്ത തളർച്ചയിലേക്കും നയിച്ചേക്കാം. അതുകൊണ്ട് തന്നെ ഔട്ട്‌ഡോർ ജിം സെഷനുകൾ തണുപ്പുള്ള സമയത്തേക്ക് മാറ്റുന്നതാണ് ഉചിതം. ഇത് ഹൃദയാരോഗ്യം സംരക്ഷിക്കാനും ശരീരതാപനില കൃത്യമായി നിലനിർത്താനും സഹായിക്കും. ആരോഗ്യപ്രശ്നങ്ങൾ ഒഴിവാക്കി ഫിറ്റ്‌നസ് നിലനിർത്താൻ സമയക്രമത്തിലെ ഈ മാറ്റം അനിവാര്യമാണ്.

ഡൽഹി-എൻസിആർ യെല്ലോ അലർട്ട്: വ്യായാമം ചെയ്യുമ്പോൾ ശ്രദ്ധിക്കാൻ

രാവിലെ ഓടാൻ പോകുന്നവർ എട്ടു മണിക്ക് മുൻപായി അത് അവസാനിപ്പിക്കാൻ ശ്രദ്ധിക്കുക. വൈകുന്നേരമാണ് വ്യായാമം ചെയ്യുന്നതെങ്കിൽ ഏഴു മണിക്ക് ശേഷം മാത്രം പുറത്തിറങ്ങുക. ഈ സമയക്രമം പാലിക്കുന്നത് ചൂട് മൂലമുള്ള ആരോഗ്യപ്രശ്നങ്ങൾ കുറയ്ക്കാൻ സഹായിക്കും. വ്യായാമത്തിനിടെ തലകറക്കം തോന്നിയാൽ ഉടൻ തന്നെ അത് നിർത്തണം. ചെറിയൊരു അശ്രദ്ധ പോലും നിങ്ങളെ ആശുപത്രിയിൽ എത്തിച്ചേക്കാം എന്ന കാര്യം മറക്കരുത്.

ഉഷ്ണതരംഗ സമയത്ത് ഭക്ഷണത്തിലും വെള്ളത്തിലും ശ്രദ്ധിക്കാം

അമിതമായി വിയർക്കുമ്പോൾ ശരീരത്തിൽ നിന്ന് നഷ്ടപ്പെടുന്ന ലവണങ്ങൾ വീണ്ടെടുക്കാൻ ഇലക്ട്രോലൈറ്റുകൾ അടങ്ങിയ പാനീയങ്ങൾ കുടിക്കേണ്ടത് അത്യാവശ്യമാണ്. കരിക്കിൻ വെള്ളം, നേർപ്പിച്ച ജ്യൂസുകൾ എന്നിവ ശരീരത്തിലെ മിനറൽ ബാലൻസ് നിലനിർത്താൻ സഹായിക്കും. ശരീരതാപനില കുറയ്ക്കാൻ പരിപ്പ് വർഗ്ഗങ്ങൾ പോലുള്ള ലഘുവായ പ്രോട്ടീൻ ഭക്ഷണങ്ങൾ ശീലമാക്കുക. ദഹനത്തിന് പ്രയാസമുണ്ടാക്കുന്ന എണ്ണമയമുള്ള ഭക്ഷണങ്ങൾ ഈ സമയത്ത് ഒഴിവാക്കുന്നതാണ് നല്ലത്. ഇത്തരം മാറ്റങ്ങൾ ഉഷ്ണതരംഗത്തെ പ്രതിരോധിക്കാൻ നിങ്ങളെ സഹായിക്കും.

കഠിനമായ ചൂടിനെ നേരിടാൻ ജീവിതശൈലിയിൽ കൃത്യമായ പ്ലാനിംഗ് ആവശ്യമാണ്. വ്യായാമം അതിരാവിലെയാക്കുക, ലഘുഭക്ഷണം ശീലമാക്കുക എന്നിവ പ്രധാനമാണ്. കൃത്യമായ ഇടവേളകളിൽ കാലാവസ്ഥാ റിപ്പോർട്ടുകൾ ശ്രദ്ധിക്കുകയും വെയിൽ കടുക്കുന്ന സമയത്ത് പുറത്തിറങ്ങുന്നത് ഒഴിവാക്കുകയും വേണം. മുൻകരുതലുകൾ എടുക്കുന്നതിലൂടെ ഈ കടുത്ത വേനലിനെ സുരക്ഷിതമായി മറികടക്കാൻ നമുക്ക് സാധിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.