മാനസിക ആരോഗ്യത്തിന് ചില വഴികള്‍

ആരോഗ്യമുള്ള ശരീരത്തിലേ ആരോഗ്യമുള്ള മനസുണ്ടാകൂ എന്നു പറയും. ശാരീരിക ആരോഗ്യത്തിന് മാനസിക ആരോഗ്യവും പ്രധാനമാണ്. ജോലി, കുടുംബപ്രശ്‌നങ്ങളും ആരോഗ്യപ്രശ്‌നങ്ങളും ആരുടേയും മനസമാധാനം കെടുത്തും. ഒരു ജീവിതം മുഴുവനും ടെന്‍ഷനടിച്ച് ജീവിച്ചു തീര്‍ക്കുന്നവരുണ്ട്.

പ്രശ്‌നങ്ങളും വിഷമതകളും ജീവിതത്തിന്റെ ഭാഗമാണെന്ന തിരിച്ചറിവാണ് നല്ലൊരു ജീവിതത്തിന് പ്രധാനം. പ്രശ്‌നങ്ങളില്‍ നിന്ന് ഒളിച്ചോടാതെ അത് നേരിടാനുള്ള മനശക്തി നേടിയെടുക്കണം.

ദേഷ്യം നിയന്ത്രിക്കുന്നത് ശാരീരിക, മാനസിക ആരോഗ്യത്തിന് പ്രധാനമാണ്. ദേഷ്യം സമാധാനമല്ല, പ്രശ്‌നമാണ് എന്നു മനസിലാക്കുക. യോഗ, മെഡിറ്റേഷന്‍ എന്നിവ ദേഷ്യം നിയന്ത്രിക്കുവാന്‍ സഹായിക്കും. ടെന്‍ഷന്‍ കുറയ്ക്കാനായി ചിരിക്ലബുകളില്‍ ചേരുന്നതും നല്ലതാണ്.

മറ്റുള്ളവരുമായി എപ്പോഴും നല്ല ബന്ധം സൂക്ഷിക്കുവാന്‍ സഹായിക്കുക. പ്രശ്‌നങ്ങള്‍ പങ്കു വയ്ക്കുവാന്‍ കഴിയുന്ന സുഹൃത്തുക്കളും ബന്ധുക്കളും എപ്പോഴും സഹായകമായിരിക്കും. നിങ്ങളുടെ പ്രശ്‌നങ്ങള്‍ മറ്റുള്ളവോട് പറയുന്നത് പോലെ മറ്റുള്ളവരുടെ പ്രശ്‌നങ്ങള്‍ക്കും ചെവി കൊടുക്കണം.

പുതിയ കാര്യങ്ങള്‍ പഠിക്കുവാനുള്ള ഒരു മനസുണ്ടാക്കിയെടുക്കുക. പുതിയ കാര്യങ്ങളിലേക്ക് ശ്രദ്ധിക്കുന്നത് ഒരു പരിധി വരെ പ്രശ്‌നങ്ങളും വിഷമങ്ങളും മറക്കുവാന്‍ സഹായിക്കും. ഒഴിവുസമയം വെറുതെയിരിക്കാതെ ഇഷ്ടമുള്ള ഹോബികള്‍ക്കായി നീക്കി വയ്ക്കാം. വെറുതേ ഇരിക്കുന്നത് ഒരുപരിധി വരെ പ്രശ്‌നങ്ങളുണ്ടാകാന്‍ കാരണമാകും.

മറ്റുള്ളവരുടെ തെറ്റുകള്‍ പൊറുക്കാന്‍ പഠിക്കുക. നിസാരകാര്യങ്ങള്‍ക്ക് മറ്റുള്ളവരോട് ദേഷ്യപ്പെടുകയോ അവരോടുള്ള ദേഷ്യം ഉള്ളില്‍ വച്ചു കൊണ്ടിരിക്കുകയോ ചെയ്യരുത്. ഇത് നമ്മുടെ മാനസിക നിലയെത്തന്നെയാണ് പരോക്ഷമായി ബാധിക്കുക.

കഴിക്കുന്ന ഭക്ഷണം നമ്മുടെ മാനസിക നിലയെ ബാധിക്കുന്നുണ്ടെന്നും അഭിപ്രായങ്ങളുണ്ട്. ആയുര്‍വേദത്തില്‍ തമസ് ആഹാര്‍ എന്നൊരു വാക്കു തന്നെയുണ്ട്. തമസ് എന്നത് ഇരുട്ടിനെയും ആഹാര്‍ ആഹാരത്തെയും സൂചിപ്പിക്കുന്നു. ചില തരം ഭക്ഷണം കഴിയ്ക്കുന്നത് വികാരവിക്ഷോഭങ്ങള്‍ ഉണ്ടാക്കുമെന്നാണ് ഇത് സൂചിപ്പിക്കുന്നത്. ഉപ്പ്, പഞ്ചസാര, ഉള്ളി, വെളുത്തുള്ളി, മാംസാഹാരം, മുരിങ്ങ, കോള പോലുള്ള പാനീയങ്ങള്‍ എന്നിവ കഴിയ്ക്കുന്നത് ദേഷ്യം വര്‍ദ്ധിപ്പിക്കുമെന്നും ഇവ കഴിവതും മാറ്റി നിറുത്തണമെന്നുമാണ് ആയുര്‍വേദം പറയുന്നത്.