പാദം വിയര്‍ക്കുന്നത് ഒഴിവാക്കാനുളള വഴികള്‍

Health

oi-Saritha

By Veena

Published: Saturday, November 5, 2011, 11:30 [IST]

കൈകളെപ്പോലെ ചിലരുടെ കാലുകളും അമിതമായി വിയര്‍ക്കുന്നത് കാണാം. ഇത് പ്ലാന്റര്‍ ഹൈപ്പര്‍ഹൈഡ്രോയ്ഡ്‌സ് എന്നറിയപ്പെടുന്ന ഒരു രോഗമാണ്. നിസാരമെന്ന് തോന്നാമെങ്കിലും അണുബാധ അടക്കമുള്ള നിരവധി പ്രശ്‌നങ്ങള്‍ വരുത്തിവയ്ക്കുന്ന രോഗമാണിത്. അമിതമായ വിയര്‍പ്പ് യാത്ര ചെയ്യുമ്പോഴും എന്തെങ്കിലും ചടങ്ങുകളില്‍ പങ്കെടുക്കുമ്പോഴും ബുദ്ധിമുട്ടുണ്ടാക്കും. മാത്രമല്ലാ, ഷൂസും ചെരിപ്പുകളും കേടുവരികയും ചെയ്യും.

ശരീരത്തിലെ മറ്റു ഭാഗങ്ങളെപ്പോലെ പാദങ്ങളിലും നിരവധി വിയര്‍പ്പ് ഗ്രന്ഥികളുണ്ട്. ഇവയുടെ പ്രവര്‍ത്തനം അധികമാകുമ്പോഴാണ് ഈ പ്രശ്‌നമുണ്ടാകുന്നത്. പ്രധാനമായും ഇത് ഒരു പാരമ്പര്യരോഗമാണെങ്കിലും ഉത്കണ്ഠ, അമിതവണ്ണം, തൈറോയ്ഡ് പ്രശ്‌നങ്ങള്‍, പിരമുറുക്കം, ശരിയല്ലാത്ത ഭക്ഷണരീതി എന്നിവയും ഹൈപ്പര്‍ ഹൈഡ്രോയ്ഡിന് കാരണമാണ്. കുറേ സമയം അടുപ്പിച്ച് നില്‍ക്കേണ്ടി വരുന്നതും ഹോണ്‍മോണ്‍ മാറ്റങ്ങളും ചൂടുള്ള കാലാവസ്ഥയും ഇതിനുള്ള മറ്റു ചില കാരണങ്ങളാണ്.

ഈ പ്രശ്‌നത്തിനുള്ള പ്രധാന പ്രതിവിധി കാലുകള്‍ വൃത്തിയാക്കി സൂക്ഷിക്കുകയെന്നതാണ്. പുറത്തുപോയി വന്നാല്‍ ഉടനെ ഏതെങ്കിലും ആന്റി ബാക്ടീരിയല്‍ സോപ്പോ ലോഷനോ ഉപയോഗിച്ച് പാദം കഴുകണം.

പാദത്തിലെ കട്ടികൂടിയ ചര്‍മം മാറ്റുന്നത് നല്ലതാണ്. ഇതിന് പ്യൂമിക് സ്റ്റോണ്‍ ഉപയോഗിക്കാം. ആഴ്ചയില്‍ ഒന്നോ രണ്ടോ തവണ മാനിക്യൂര്‍ ചെയ്യാം. ഇത് വീട്ടില്‍ തന്നെ ചെയ്യാം. ചൂടുവെള്ളത്തില്‍ ടീ ട്രീ ഒായില്‍ ഒഴിച്ച് കാലുകള്‍ അതില്‍ ഇറക്കി വയ്ക്കുന്നത് നല്ലതാണ്. പാദങ്ങള്‍ വിയര്‍ക്കുന്നത് കുറയും. ചൂടുവെള്ളത്തില്‍ നാരങ്ങാനീരും ഉപ്പും ഇട്ട് കാലുകള്‍ ഇറക്കി വയ്ക്കുന്നതും നല്ലതാണ്.

ചികിത്സാ ആവശ്യങ്ങള്‍ക്കുപയോഗിക്കുന്ന സ്പിരിറ്റ് പഞ്ഞിയില്‍ മുക്കി തുടയ്ക്കുന്നത് പാദം വിയര്‍ക്കുന്നത് ഒഴിവാക്കും. സ്പിരിറ്റ് ഉപയോഗിക്കുന്നതിന് മുന്‍പ് അത് പാദത്തില്‍ ചെറുയൊരു ഭാഗത്തു പുരട്ടി അലര്‍ജി ഉണ്ടാക്കുന്നുണ്ടോയെന്ന് നോക്കണം.

പ്ലാസ്റ്റിക്, സിന്തറ്റിക് ചെരിപ്പുകള്‍ ഉപയോഗിക്കുന്നത് പാദം കൂടുതല്‍ വിയര്‍ക്കാന്‍ ഇടയാക്കും. അതുകൊണ്ട് ഇത്തരം ചെരിപ്പുകളും ഷൂസുകളും ഒഴിവാക്കുക. ഷൂസ് ധരിക്കുന്നത് ചെരിപ്പിടുന്നതിനേക്കാള്‍ കൂടുതല്‍ വിയര്‍പ്പുണ്ടാക്കും. ഷൂസിന് പകരം ചെരിപ്പ് ഉപയോഗിക്കുവാന്‍ പറ്റിയ സാഹചര്യമുണ്ടെങ്കില്‍ അതാണ് നല്ലത്.

നനഞ്ഞ ചെരിപ്പ്, പ്രത്യേകിച്ച് ഷൂസ് കഴിവതും ഒഴിവാക്കുക. ഇത് ദുര്‍ഗന്ധവും പാദത്തില്‍ അണുബാധയും ഉണ്ടാക്കും. ചെരിപ്പും ഷൂസും ഇടയ്ക്ക് നല്ല വെയിലില്‍ വയ്ക്കുന്നത് നല്ലതാണ്.

എപ്പോഴും കോട്ടന്‍ സോക്‌സ് മാത്രം ഉപയോഗിക്കുക. ദിവസവും സോക്‌സ് മാറുകയും വേണം. സോക്‌സ് ഉപയോഗിക്കാതിരികുന്നാല്‍ പാദം വിയര്‍ക്കുന്നത് അല്‍പം കൂടി കുറയും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.