ശീതളപാനീയം വൃക്കകള്‍ക്ക് ദോഷം

Health

oi-Saritha

By Veena

Published: Saturday, October 22, 2011, 10:26 [IST]

പാര്‍ട്ടികളിലും ആഘോഷങ്ങളിലും ഇപ്പോള്‍ ജ്യൂസുകളുടെ സ്ഥാനം ശീതളപാനീയങ്ങള്‍ കയ്യടക്കിക്കഴിഞ്ഞു. പല നിറങ്ങളിലും പേരുകളിലുമുള്ള ഇവ കുട്ടികള്‍ക്കും ഏറെ പ്രിയമാണ്. എന്നാല്‍ ഇത്തരം ശീതളപാനീയങ്ങള്‍ ആരോഗ്യത്തിന് നല്ലതല്ലെന്നതാണ് വാസ്തവം.

സോഡയും ശീതളപാനീയങ്ങളും ഒരുപരിധി വരെ കൊളസ്‌ട്രോളും കൊഴുപ്പും കുറയ്ക്കുവാന്‍ സഹായിക്കുന്നുണ്ട്. എന്നാല്‍ ഇവയുടെ അളവ് ഒരു നിശ്ചിത പരിധിയില്‍ കവിഞ്ഞാല്‍ ഇവ വൃക്കകള്‍ക്ക് ദോഷം ചെയ്യും. കോള വൃക്കയില്‍ കല്ലുണ്ടാക്കാന്‍ കാരണമാകുകയും വൃക്കയുടെ പ്രവര്‍ത്തനം തകരാറിലാക്കുകയും ചെയ്യും. ശീതളപാനീയങ്ങളില്‍ ഫോസ്‌ഫോറിക് ആസിഡ് ഉണ്ട്. ഇവ എല്ലുകളിലെ കാല്‍സ്യം വലിച്ചെടുക്കും. മൂത്രത്തിലൂടെയാണ് ഈ കാല്‍സ്യം കല്ലുകളുടെ രൂപത്തില്‍ പുറത്തു കളയുന്നത്. കിഡ്‌നി പ്രശ്‌നങ്ങളുള്ളവരോട് സാധാരണ ഇത്തരം പാനീയങ്ങള്‍ കുടിയ്ക്കരുതെന്ന് പറയാറുണ്ട്.

ശീതളപാനീയങ്ങളില്‍ കഫീനും പഞ്ചസാരയും അടങ്ങിയിട്ടുണ്ട്. ഇവ ശരീരത്തിലെ ജലാംശം വലിച്ചെടുക്കും. ആവശ്യത്തിന് വെള്ളം ലഭിക്കാത്തത് വൃക്കകളുടെ പ്രവര്‍ത്തനത്തെ ബാധിക്കും.

അമിതവണ്ണത്തിനും ശീതളപാനീയങ്ങള്‍ കാരണമാകുന്നുണ്ട്. ഇവയിലെ ഫ്രക്ടോസ് രക്തസമ്മര്‍ദം കൂട്ടുകളും ഹൃദയപ്രവര്‍ത്തനങ്ങളെ ബാധിക്കുകയും ചെയ്യും. ഇതില്‍ അടങ്ങിയിരിക്കുന്ന ആസിഡുകളും പഞ്ചസാരയും പല്ലു കേടുവരുത്തും. ലിവര്‍ സിറോസിസ് തുടങ്ങിയ രോഗങ്ങള്‍ വരുത്തുവാനും ശീതളപാനീയങ്ങള്‍ കാരണമാകും.

ശീതളപാനീയങ്ങള്‍ കുടിയ്ക്കുന്നതിന് പകരം ജ്യൂസുകളോ വെള്ളമോ ശീലമാക്കുക. സോഡയും ശീതളപാനീയങ്ങളും വാങ്ങുമ്പോള്‍ ഫോസ്ഫറസിന്റെ അളവ് ഏറ്റവും കുറഞ്ഞത് നോക്കി വാങ്ങുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.