വണ്ണം കുറയണോ, ചൂടുവെള്ളം കുടിക്കൂ

രോഗാണുക്കളെ ഒഴിവാക്കാനായി മിക്കവാറും ആളുകള്‍ തിളപ്പിച്ച വെളളമോ തിളപ്പിച്ചാറ്റിയ വെള്ളമോ ആണ് കുടിക്കാണ്. എന്നാല്‍ ചൂടോടെ വെളളം കുടിച്ചാല്‍ ഗുണങ്ങള്‍ ഏറെയാണ്. രക്തപ്രവാഹം വര്‍ദ്ധിപ്പിക്കാനും ശ്വസനം സുഗമമാക്കാനും ചൂടുവെള്ളം നല്ലതാണ്. മാത്രമല്ലാ, ചൂടുവെളളത്തില്‍ നാരങ്ങാനീരും തേനും ചേര്‍ത്തുകഴിച്ചാല്‍ ഭാരം കുറയുകയും ചെയ്യും.

ചൂടുവെള്ളം കുടിക്കുമ്പോള്‍ ശരീരോഷ്മാവ് കൂടുകയും വിയര്‍ക്കുകയും ചെയ്യും. ശരീരത്തെ തണുപ്പിക്കാന്‍ മാത്രമല്ലാ, ശരീരത്തിലെ വിഷപദാര്‍ത്ഥങ്ങള്‍ പുറന്തള്ളുന്നതിനും വിയര്‍ക്കുന്നത് നല്ലതാണ്. ഇതോടെ രക്തം ശുദ്ധിയാവുകയും ചെയ്യും.

നാഡീവ്യവസ്ഥയെ ശുദ്ധീകരിക്കാനും ശരീരവും മനസും ഉന്മേഷത്തോടെയിരിക്കാനും ചൂടുവെളളം നല്ലതാണ്. തൊണ്ടവേദന, ചുമ, ജലദോഷം എന്നിവയ്ക്കുള്ള നല്ലൊരു മരുന്നാണ് ചൂടുവെളളം കുടിക്കുന്നത്.

വണ്ണം കുറയണമെങ്കില്‍ ഒരോ തവണയും ഭക്ഷണം കഴിച്ച ശേഷം ചൂടുവെളളത്തില്‍ തേനും നാരങ്ങാനീരും ചേര്‍ത്ത് കുടിക്കുന്നത് നല്ലതാണ്. ഭക്ഷണം കഴിച്ച ശേഷം ഒരു ഗ്ലാസ് ചൂടുവെളളം കുടിക്കുന്നത് ആരോഗ്യകരമായ ശീലമാണ്.

ചെറുചൂടുള്ള വെള്ളം രാവിലെ വെറുംവയറ്റില്‍ കുടിയ്ക്കുന്നത് ശരീരത്തെ ശുദ്ധീകരിക്കും. ഉറങ്ങുന്നതു മൂലം ശരീരത്തിനുണ്ടാകുന്ന ജലനഷ്ടം നികത്തുകയും ചെയ്യും.

മെഷീനുകളില്‍ നിന്നെടുക്കുന്ന ചൂടുവെളളത്തില്‍ ലോഹാംശം കലരാന്‍ സാധ്യതയുള്ളതുകൊണ്ട് വെളളമെടുത്ത് ഗ്യാസിലോ അടുപ്പിലോ വച്ചു തിളപ്പിക്കുന്നതായിരിക്കും കൂടുതല്‍ നല്ലത്

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.