അവധിദിവസം ഉറങ്ങിത്തീര്‍ക്കല്ലേ...

Published: Saturday, December 3, 2011, 12:33 [IST]

ആഴ്ചക്കവസാനം കിട്ടിയ അവധിദിനം. നല്ലപോെല കിടന്നുറങ്ങി റിലാക്‌സ് ചെയ്യാം എന്നും കരുതുന്നവരുണ്ട്. ദിവസം മുഴുവന്‍ കിടക്കയില്‍ നിന്നെഴുന്നേല്‍ക്കാതിരുന്നാല്‍ ശരീരത്തിനും മനസിനും വിശ്രമമല്ല കിട്ടുക, ക്ഷീണവും തളര്‍ച്ചയുമാണ്.

ഉറങ്ങുക മാത്രമല്ലാ റിലാക്‌സ് ചെയ്യാനുള്ള മാര്‍ഗമെന്ന് ആദ്യം മനസിലാക്കുക. നേരത്തെ എഴുന്നേല്‍ക്കാന്‍ മടി തോന്നുമെങ്കിലും അത് നല്‍കുന്ന ഊര്‍ജം വലുതാണ്. രാവിലെ ഉണര്‍ന്ന് യോഗ ചെയ്യുകയോ നടക്കുകയോ ചെയ്യാം. സമയത്തിന് അതിരു കല്‍പിക്കാതെ, ജോലിയെപ്പറ്റിയും ഓഫീസിനെപ്പറ്റിയും ചിന്തിക്കാതെ നടക്കുന്നത് സുഖമുള്ള ഒരു കാര്യം തന്നെയാണ്. ആവശ്യത്തിന് ഉറക്കം ലഭിക്കുകയും പ്രധാനം. നേരത്തെ കിടന്ന് നേരത്തെ എഴുന്നേല്‍ക്കുകയാണ് നല്ല മാര്‍ഗം.

നടന്നു വന്ന ശേഷം നല്ലൊരു ബ്രേക് ഫാസ്റ്റാകാം. പോഷകസമൃദ്ധമായ സാധനങ്ങളുള്‍പ്പെട്ട ബ്രേക് ഫാസ്റ്റാണ് നല്ലത്. ഫ്രഷായ ജ്യൂസും പഴവര്‍ഗങ്ങളും ധാന്യങ്ങളും പാല്‍, മുട്ട എന്നിവയും നല്ലൊരു പ്രഭാതഭക്ഷണമാകും. ഇത് മുഴുവന്‍ ദിവസത്തേക്കു വേണ്ട ഊര്‍ജവും നല്‍കും.

സാധാരണ ദിവസങ്ങളിലെ കാക്കക്കുളി ഒഴിവാക്കി എണ്ണ തേച്ച് വിശാലമായ ഒരു കുളി തന്നെയാകട്ടെ. വേണമെങ്കില്‍ ചൂടുവെള്ളത്തിലാകാം കുളി. നല്ലൊരു കുളി നല്‍കുന്ന ശാരീരിക, മാനസികോല്ലാസം അനുഭവിച്ചു തന്നെ അറിയണം.

വായന, പാട്ടുകേള്‍ക്കല്‍, ടിവി തുടങ്ങിയവയ്ക്ക് അവധിദിവസം സമയം മാറ്റിവയ്ക്കാം. മറ്റു ഹോബികളില്‍ താല്‍പര്യമുള്ളവര്‍ക്ക് അതാവാം. മനസിന് സന്തോഷം നല്‍കുന്ന കാര്യങ്ങള്‍ ചെയ്യുക എന്നതാണ് പ്രധാനം.

വേണമെങ്കില്‍ അല്‍പനേരം ഉച്ചയുറക്കമാകാം. അധികസമയം ഉറങ്ങരുത്. ശരീരത്തിനും മനസിലും തളര്‍ച്ച തോന്നും. രാത്രി ഉറങ്ങാന്‍ വൈകുകയും ചെയ്യും. ടെന്‍ഷനുള്ള കാര്യങ്ങളെക്കുറിച്ച് ചിന്തിക്കാതെ സുഖമായ ഉറക്കത്തിന് വഴി വയ്ക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.