മദ്യപിക്കുമ്പോള്‍ ഇവ ഒഴിവാക്കൂ

മദ്യം അസിഡിറ്റി ഉണ്ടാക്കും. അതുകൊണ്ട് അതിന്റെ കൂടെയോ അതിന് ശേഷമോ എണ്ണമയമുള്ള സാധനങ്ങള്‍ കഴിയ്ക്കുന്നത് നല്ലതല്ല. മദ്യപിച്ചതിന് ശേഷം ലഘുവായ ഭക്ഷണം കഴിയ്ക്കുന്നതാണ് ആരോഗ്യത്തിനും വയറിനും നല്ലത്. ഇനി മുതല്‍ മദ്യപിച്ചതിന് ശേഷം ബിരിയാണിക്കൊതി തീര്‍ക്കരുത്.

അപൂര്‍വമാണെങ്കിലും മദ്യത്തിനൊപ്പം വെണ്ണ, പനീര്‍ എന്നിവയടങ്ങിയ ഭക്ഷണങ്ങള്‍ കഴിയ്ക്കുന്നവരുണ്ട്. ഇത് തികച്ചും അനാരോഗ്യകരമാണ്. ദഹനത്തിന് ബുദ്ധിമുട്ടുണ്ടാക്കുന്നേതോടൊപ്പം നെഞ്ചെരിച്ചിലിനും ഇത് ഇട വരുത്തും. പിസ, പാസ്ത തുടങ്ങിയ ഭക്ഷണം മദ്യപിച്ചതിന് ശേഷം ഒഴിവാക്കുക. ഇവയില്‍ ധാരാളം വെണ്ണയും നെയ്യും അടങ്ങിയിട്ടുണ്ട്. പാലില്‍ നിന്നുണ്ടാക്കുന്ന പനീര്‍ പോലും മദ്യത്തിനൊപ്പം കഴിയ്ക്കുന്നത് ആരോഗ്യകരമല്ല.

നിലക്കടല, കശുവണ്ടിപ്പരിപ്പ് തുടങ്ങിയവ മദ്യത്തിനൊപ്പം കൊറിയ്ക്കുന്ന ശീലം പലര്‍ക്കുമുണ്ട്. ഇവയില്‍ കൊളസ്‌ട്രോള്‍ അടങ്ങിയിട്ടുള്ളതു കൊണ്ട് ഇവ ആരോഗ്യത്തിന് ദോഷമാണ് ചെയ്യുന്നത്. ഇവ മദ്യത്തിനൊപ്പം കഴിയ്ക്കുന്നത് നല്ലതല്ല. മാത്രമല്ലാ, ഇത്തരം ഭക്ഷണം വിശപ്പ് കെടുത്തുകയും ചെയ്യും.

ഉപ്പു കൂടുതലുള്ള ഭക്ഷണം മദ്യത്തിനൊപ്പം കഴിയ്ക്കരുത്. പൊട്ടെറ്റോ ചിപ്‌സ് മദ്യത്തിനൊപ്പം കഴിച്ചാല്‍ വീണ്ടു ദാഹം കൂടും. വെള്ളത്തിനു പകരം പലരും കുടിയ്ക്കുന്നത് കയ്യിലിരിക്കുന്ന മദ്യമായിരിക്കും. കൂടുതല്‍ മദ്യം ഉള്ളില്‍ ചെല്ലാനും ഇത് കാരണമാകും. മദ്യവും ഉപ്പും ശരീരത്തിലെ ജലാംശം കുറയ്ക്കുന്നവയാണെന്ന് ഓര്‍ക്കുക.

മദ്യത്തിന്റെ കൂടെ സോഡയോ കോളകളോ മിക്കവാറും എല്ലാവരും ചേര്‍ക്കും. ഇത് ആരോഗ്യത്തിന് നല്ലതല്ലെന്നതാണ് സത്യം. ഇവ രണ്ടും ശരീരത്തില്‍ നിന്ന് ജലം വലിച്ചെടുക്കുകയാണ് ചെയ്യുന്നത്. സോഡയ്ക്ക് പകരം സാധാരണ വെള്ളം ഉപയോഗിക്കുന്നതാണ് ഏറ്റവും നല്ലത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.