സിക്‌സ്പാക്ക് വേണമെങ്കില്‍ പിസയും ബര്‍ഗറും വേണ്ട

വലിച്ചുവാരി കഴിച്ച് വ്യായാമം ചെയ്താലൊന്നും സിക്‌സ് പാക്ക് ലഭിക്കില്ല. കഴിക്കേണ്ടാത്തതും കഴിക്കേണ്ടതുമായ ഭക്ഷണങ്ങള്‍ നിരവധിയുണ്ട്. ചില ഭക്ഷണങ്ങള്‍ ഇഷ്ടമാണെങ്കിലും ഉപേക്ഷിച്ചേ മതിയാകൂ.

കഴിക്കുവാന്‍ നല്ല രുചിയുണ്ടെങ്കിലും ഉരുളക്കിഴങ്ങ് വറുത്തത് ഉപേക്ഷിക്കുക തന്നെ വേണം. ഫ്രഞ്ച് ഫ്രൈസും ഫിംഗര്‍ ചിപ്‌സുമെല്ലാം എണ്ണ കുടിച്ചാണ് ജീവിക്കുന്നത്. ഇവ ട്രാന്‍സ്ഫാറ്റുണ്ടാക്കും. പോരാത്തതിന് ഇവയിലെ ഉപ്പും മസാലകളും കൊഴുപ്പും ബിപിയും കൂട്ടാനേ ഉതകൂ.

മധുരം കഴിവതും കുറയ്ക്കുക. പഞ്ചസാരയ്ക്കു പകരം ശര്‍ക്കരയോ ചോളത്തില്‍ നിന്നെടുക്കുന്ന കോണ്‍ ഷുഗറോ ഉപയോഗിച്ചാലും പ്രയോജനമില്ല. ഇവയില്‍ ഗ്ലൂക്കോസും കാര്‍ബോഹൈഡ്രേറ്റുകളും അധികം തന്നെയാണ്. സാധാരണ പഞ്ചസാരയേക്കാള്‍ അപകടം പിടിച്ചതാണ് കോണ്‍ ഷുഗര്‍ എന്നു പറയാം. മധുരം വേണമെന്നുണ്ടെങ്കില്‍ തേന്‍ ഉപയോഗിക്കാം. ഇതില്‍ കാര്‍ബോഹൈഡ്രേറ്റുകള്‍ താരതമ്യേന ഇല്ലെന്നു തന്നെ പറയാം.

മാര്‍ക്കറ്റില്‍ ലഭിയ്ക്കുന്ന ഫ്രോസന്‍ ഭക്ഷണങ്ങളും ഒഴിവാക്കണം. ഇതില്‍ കൊഴുപ്പ് കുറവാണെന്ന് ലേബലുണ്ടെങ്കിലും ഉള്ള കൊഴുപ്പ് ദോഷമുള്ള കൊഴുപ്പായി മാറുകയാണ്. ലോ ഫാറ്റ് എന്ന് ലേബലുണ്ടെങ്കിലും ഇതിലും നല്ലത് ഗ്രില്‍ ചെയ്‌തോ ബേക്ക് ചെയ്‌തോ കഴിയ്ക്കുന്ന സാധാരണ ചിക്കനാണ്.

മൈദ, തവിടു കളഞ്ഞ അരി തുടങ്ങിയവയും കൊഴുപ്പു കൂട്ടുന്നവയും പൊണ്ണത്തടി വരുത്തുന്നവയുമാണ്. ഇവയില്‍ കൂടുതലും സ്റ്റാര്‍ച്ചാണ് അടങ്ങിയിട്ടുള്ളത്.

സിക്‌സ് പാക്ക് വേണമെങ്കില്‍ പിസ, ബര്‍ഗര്‍, ഹോട്ട് ഡോഗ് തുടങ്ങിയവയോടും ഗുഡ്‌ബൈ പറയുകയാണ് നല്ലത്. ഇവയിലെ കൊഴുപ്പ് ഹൃദയാഘാതത്തിന് വരെ വഴി വയ്ക്കാവുന്നവയാണ്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.