ചര്‍മത്തിന് ആന്റി ഓക്‌സിഡന്റുകള്‍

വൈറ്റമിന്‍ സി, ഇ തുടങ്ങിയവ ശരീരത്തിന് ആവശ്യമായ പോഷകങ്ങള്‍ നല്‍കുക മാത്രമല്ലാ, ചര്‍മത്തിന്റെ യുവത്വവും തിളക്കവും നിലനിര്‍ത്തുകയും ചെയ്യുന്നു. ഇവയില്‍ നിറയെ ആന്റി ഓക്‌സിഡന്റുകള്‍ അടങ്ങിയിട്ടുണ്ട് എന്നതു തന്നെ കാരണം. ചര്‍മത്തിലെ ചുളികവുകളും കറുത്ത പാടുകളും അകറ്റുവാനും സൂര്യാഘാതം ഒഴിവാക്കുവാനും ഇവ സഹായിക്കും. നാരങ്ങാവര്‍ഗത്തില്‍ പെട്ട എല്ലാ പഴവര്‍ഗങ്ങളിലും വൈറ്റമിന്‍ സി അടങ്ങിയിട്ടുണ്ട്. ബദാം, ഉണക്കിയ പ്ലം പഴം എന്നിവയില്‍ വൈറ്റമിന്‍ ഇയും അടങ്ങിയിട്ടുണ്ട്.

ബീന്‍സ് ആന്റി ഓക്‌സിഡന്റുകളുടേയും പ്രോട്ടീനുകളുടേയും കലവറയാണെന്ന് പറയാം. പച്ചബീന്‍സും ചുവപ്പ്, കറുപ്പ് നിറങ്ങളിലുള്ള എല്ലാ തരം ബീന്‍സുകളും നല്ലതാണ്. പ്രതിരോധ ശേഷി നല്‍കുന്നു എന്ന മറ്റൊരു ഗുണു കൂടി ഇവയ്ക്കുണ്ട്.

കറികളിലെ രുചിയ്ക്കും മണത്തിനും ഉപയോഗിക്കുന്ന ഗ്രാമ്പൂ നല്ലൊന്നാന്തരം ആന്റി ഓക്‌സിഡന്റാണ്. കൊളസ്‌ട്രോള്‍ കുറയ്ക്കുവാന്‍ സഹായിക്കുന്നത് കൊണ്ടു കൂടിയാണ് മിക്കവാറും മസാലകളില്‍, പ്രത്യേകിച്ച് ഇറച്ചിമസാലകളില്‍ ഇവ ചേര്‍ക്കുന്നത്.

ചുവപ്പ്, മഞ്ഞ നിറങ്ങളിലുള്ള കാപ്‌സിക്കത്തില്‍ ധാരാളം ആന്റിഓക്‌സിഡന്റുകള്‍ അടങ്ങിയിട്ടുണ്ട്. ചര്‍മ, ആരോഗ്യ സംരക്ഷണത്തിന് ഇത് സഹായിക്കുന്നു.ക്യാന്‍സര്‍ പ്രതിരോധിക്കാന്‍ ഇവ സഹായകമാണെന്ന് പഠനങ്ങള്‍ തെളിയിച്ചിട്ടുണ്ട്.

കട്ടന്‍ ചായ, ഗ്രീന്‍ ടീ, ഹെര്‍ബല്‍ ടീ തുടങ്ങിയവയില്‍ ആന്റി ഓക്‌സിഡന്റുകള്‍ അടങ്ങിയിട്ടുണ്ട്. തണുപ്പുകാലത്ത് ഇവ കുടിയ്ക്കുന്നത് ചര്‍മത്തിനും ആരോഗ്യത്തിനും നല്ലതാണ്.

പച്ചക്കറി സൂപ്പുകള്‍ തണുപ്പുകാലത്ത് പോഷകം നല്‍കാനും ചര്‍മത്തിനും നല്ലതാണ്.

ആരോഗ്യത്തോടൊപ്പം ചെറുപ്പമായിരിക്കുവാന്‍ താല്‍പര്യമുണ്ടെങ്കില്‍ ആന്റി ഓക്‌സിഡന്റുകള്‍ കലര്‍ന്ന ഭക്ഷണം ഈ മഞ്ഞുകാലത്ത് ഉപയോഗിക്കൂ

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.