അയ്യേ ഇതൊന്തൊരു ഡിസൈന്‍, 'മൂത്രക്കറ' ഡിസൈനുള്ള ജീന്‍സ് വിറ്റുപോയത് 50,000 രൂപക്ക്

ലോകമെമ്പാടും ആരാധകരുള്ള സാര്‍വ്വലൗകിക വേഷമാണ് ജീന്‍സ്. ജീന്‍സില്‍ പല പല ഫാഷനുകള്‍ വരുന്നതും പോകുന്നതുമെല്ലാം നമ്മള്‍ കണ്ടിട്ടുണ്ട്. നല്ല കട്ടിയും കംഫര്‍ട്ടുമുള്ള ജീന്‍സ് കീറിപ്പോയത് പോലെയും ഇഴ പിഞ്ചിയതും പോലെയും വന്നെത്തി ഫാഷന്‍ ലോകത്ത് ഹിറ്റാകുന്നതും നമ്മള്‍ കണ്ടിട്ടുണ്ട്. ഇങ്ങനെ കീറിയതും നൂല് പോയതുമായ ജീന്‍സുകള്‍ക്കാണ് വില കൂടുതലെന്നതാണ് ബഹുരസം.

അങ്ങനെയൊരു വ്യത്യസ്ത ഡിസൈന്‍ ജീന്‍സാണ് ഇപ്പോള്‍ ഫാഷന്‍ലോകത്തെ സംസാരവിഷയം. പീ സ്റ്റെയിന്‍ ജീന്‍സെന്നാണ് ഇപ്പോള്‍ ഇതറിയപ്പെടുന്നത്. പച്ചമലയാളത്തില്‍ പറഞ്ഞാല്‍ മൂത്രക്കറ ഡിസൈനുള്ള ജീന്‍സ്.

'പീ സ്റ്റെയിന്‍' ജീന്‍സ് അഥവാ 'മൂത്രക്കറ' ഡിസൈനുള്ള ജീന്‍സ്

ജോര്‍ഡാന്‍ലൂക്ക എന്ന ഡിസൈനിംഗ് സ്ഥാപനമാണ് ഇത്തരമൊരു വ്യത്യസ്ത ഡെനിം ജീന്‍സ് സ്റ്റൈല്‍ പുറത്തിറക്കി ഫാഷന്‍ പ്രേമികളുടെ ശ്രദ്ധ പിടിച്ചുപറ്റിയിരിക്കുന്നത്. ഡിസൈനര്‍മാരായ ജോര്‍ഡാന്‍ ബോവന്റെയും ലൂക്ക മര്‍ച്ചെറ്റോയുടെയും സംരംഭമാണിത്. എന്താണീ ഡിസൈന്‍, എന്തുകൊണ്ടാണിത് ഇത്ര വലിയ സംസാരവിഷയമായത് എന്ന് നോക്കാം.

ഈ ജീന്‍സ് നേരില്‍ കണ്ടാല്‍ ഒറ്റനോട്ടത്തില്‍ തന്നെ കാര്യം മനസ്സിലാകും. ജീന്‍സില്‍ അരക്കെട്ടിന്റെ ഭാഗത്തായി കറ പോലെ ഒരു കടുംനിറം നല്‍കിയിട്ടുണ്ട്. കണ്ടാല്‍ മൂത്രമൊഴിച്ചതാണെന്നേ പറയൂ. മിലന്‍ ഫാഷന്‍ വീക്കിലാണ് ഈ ജീന്‍സ് ആദ്യമായി അവതരിപ്പിച്ചത്. പിന്നീട് ഈ ഡിസൈന് തിരിഞ്ഞുനോക്കേണ്ട വന്നിട്ടില്ല. സംഗതി എയറിലായി.

ഇതിന്റെ വിലയാണ് നമ്മളെ അമ്പരിപ്പിക്കുന്ന ഏറ്റവും വലിയ കാര്യം. ഒറിജിനലിന് 811 ഡോളറാണ് വില, അതായത് ഒരു ജീന്‍സിന് ഏകദേശം 67,600 രൂപ. വേണമെങ്കില്‍ വിലക്കുറവില്‍ മറ്റൊരു ബ്രാന്‍ഡിന്റെ പീ സ്റ്റെയിന്‍ ഡെനിം ജീന്‍സ് വാങ്ങിക്കാം. വിലക്കുറവ് എന്നൊക്കെ പറയുമ്പോള്‍ ഒരു ആയിരം, രണ്ടായിരമെന്നൊക്കെ കരുതരുത്. ബ്രിട്ടീഷ്-ഇറ്റാലിയന്‍ പുരുഷ വസ്ത്രബ്രാന്‍ഡ് ഈ ജീന്‍സ് വില്‍ക്കുന്നത് 608 ഡോളറിനാണ്, വെറും അമ്പതിനായിരം രൂപക്ക്!

ഇതാദ്യമായിട്ടൊന്നുമല്ല ഒരു അസാധാരണ ഡിസൈന്‍ ഇന്റെര്‍നെറ്റിന്റെ ശ്രദ്ധ നേടുകയും ചര്‍ച്ചയാകുകയും ചെയ്യുന്നത്. 2021ല്‍ എല്‍ഇജെഇ രണ്ട് വ്യത്യസ്ത ജീന്‍സ് മോഡലുകള്‍ പുറത്തിറക്കിയിരുന്നു. സ്ലാഷ്ഡ്, എല്‍ സ്ലാഷ്ഡ് എന്നീ പേരുകളില്‍ പുറത്തിറങ്ങിയ ജീന്‍സിന്റെ വില യഥാക്രമം 31,000 രൂപയും, 39,000 രൂപയും ആയിരുന്നു.