പനീര്‍ ബുര്‍ജി തയ്യാറാക്കാം

ആരോഗ്യഗുണങ്ങളടങ്ങിയ ഭക്ഷണവസ്തുവാണ് പനീര്‍. പാലില്‍ നിന്നുണ്ടാക്കുന്നതു കൊണ്ട് കാല്‍സ്യം സമ്പുഷ്ടം.

പനീര്‍ കൊണ്ട് പല വിഭവങ്ങളുമുണ്ടാക്കാം. ഇത്തരം വിഭവങ്ങളില്‍ പനീര്‍ ബുര്‍ജിയും പെടുന്നു.

പനീര്‍ ബുര്‍ജി എങ്ങനെയുണ്ടാക്കാമെന്നു നോക്കൂ,

പനീര്‍-2 കപ്പ്
സവാള-2
തക്കാളി-1
ജീരകം-2 ടീസ്പൂണ്‍
ഗരം മസാല-1 ടീസ്പൂണ്‍
മഞ്ഞള്‍പ്പൊടി-1 ടീസ്പൂണ്‍
മുളകുപൊടി-1 ടീസ്പൂണ്‍
പച്ചമുളക്-2
മല്ലിപ്പൊടി-2 ടീസ്പൂണ്‍
എണ്ണ
ഉപ്പ്

ഒരു പാന്‍ ചൂടാക്കി എണ്ണയൊഴിയ്ക്കുക. ഇതില്‍ സവാളയിട്ടു നല്ലപോലെ വഴറ്റണം. ഇത് ഇളം ബ്രൗണ്‍ നിറമാകുന്നതു വരെ ഇളക്കുക.

ഇതിലേയ്ക്ക് പച്ചമുളകു ചേര്‍ക്കുക. ഇതിലേക്ക് ജീരകം, മസാലപ്പൊടികള്‍, ഉപ്പ് എന്നിവ ചേര്‍ത്തിളക്കണം.

മസാലപ്പൊടികള്‍ മൂത്തു കഴിയുമ്പോള്‍ തക്കാളി അരിഞ്ഞു ചേര്‍ക്കുക.

തക്കാളി നല്ലപോലെ വഴന്നു കഴിയുമ്പോള്‍ പനീര്‍ ഉടച്ചതു ചേര്‍ത്തിളക്കണം.

10 മിനിറ്റ് നല്ലപോലെ ഇളക്കി വേവിയ്ക്കണം.

വെന്തു കഴിയുമ്പോള്‍ വാങ്ങി വച്ച് ചൂടോടെ ഉപയോഗിക്കാം.