വേനലിനെ ചെറുക്കും ഫേസ് പായ്ക്കുകള്‍

മാങ്ങ മുഖലേപനം

വേനല്‍ക്കാലമായതിനാല്‍ മുഖലേപനം ഉണ്ടാക്കാന്‍ ചില വേനല്‍ക്കാല പഴങ്ങള്‍ തന്നെ തിരഞ്ഞെടുക്കാം. ഒരു പാത്രത്തില്‍ ഒരു ടേബിള്‍ സ്‌പൂണ്‍ മാമ്പഴ ചാറ്‌ എടുക്കുക. ഇതിലേക്ക്‌ ഒരു ടേബിള്‍ സ്‌പൂണ്‍ പാല്‍പ്പാടയും ഒരു ടേബിള്‍ സ്‌പൂണ്‍ തണുത്ത പാലും ചേര്‍ക്കുക. ഈ ചേരുവകള്‍ എല്ലാം കൂടി നന്നായി ഇളക്കി കുഴമ്പ്‌ രൂപത്തിലാക്കി ചര്‍മ്മത്തില്‍ പുരട്ടുക. ഉണങ്ങിയതിന്‌ ശേഷം കഴുകി കളയുക.

തണ്ണിമത്തന്‍ മുഖലേപനം

വേനല്‍ക്കാലത്ത്‌ ചര്‍മ്മത്തെ തണുപ്പിക്കാന്‍ തണ്ണിമത്തന്‍ സഹായിക്കും. തണ്ണിമത്തന്റെ കാമ്പ്‌ അരകപ്പ്‌ എടുത്ത്‌ അതില്‍ ഒരു ടേബിള്‍സ്‌പൂണ്‍ തൈര്‌ ചേര്‍ക്കുക. ഈ മിശ്രിതം നന്നായി ചേര്‍ത്തിളക്കി മുഖത്ത്‌ പുരട്ടുക.

നാരങ്ങ മുഖലേപനം

ചര്‍മ്മത്തിന്‌ ഇണങ്ങുന്ന സുരക്ഷിതമായ ബ്ലീച്ചിങ്‌ ഏജന്റായിട്ടാണ്‌ നാരങ്ങയെ കണക്കാക്കുന്നത്‌. ചൂടേറ്റ്‌ മുഖത്തിന്റെ നിറം മങ്ങുന്നുണ്ടെങ്കില്‍ രണ്ട്‌ ടേബിള്‍സപൂണ്‍ നാരങ്ങ നീരും ഒരു ടേബിള്‍ സ്‌പൂണ്‍ തേനും ചേര്‍ത്തിളക്കിയ മിശ്രിതം പുരട്ടുക.

കിവി മുഖലേപനം

കിവിയില്‍ ചര്‍മ്മത്തിന്റെ ആരോഗ്യം മെച്ചപ്പെടുത്താന്‍ സഹായിക്കുന്ന വിറ്റാമിന്‍ സി ധാരാളം അടങ്ങിയിട്ടുണ്ട്‌. .അരകപ്പ്‌ കിവി നീരില്‍ രണ്ട്‌ ടേബിള്‍ സ്‌പൂണ്‍ ബദാംപാലും ഒരു ടീസ്‌പൂണ്‍ തേനും ചേര്‍ത്തിളക്കി മുഖലേപനം ഉണ്ടാക്കുക.

തൈര്‌ മുഖലേപനം

ചര്‍മ്മത്തിന്റെ നിറം മെച്ചപ്പെടാന്‍ തൈര്‌ സഹായിക്കും. വേനല്‍ക്കാലത്ത്‌ ആഴ്‌ചയില്‍ രണ്ട്‌ തവണ വീതം തണുത്ത തൈര്‌ മുഖത്തും കഴുത്തിലും പുരട്ടുക.

വെള്ളരിക്ക മുഖലേപനം

വേനല്‍ക്കാലത്ത്‌ ചര്‍മ്മത്തിന്‌ ഏറ്റവും ഗുണകരമാകുന്ന പച്ചക്കറികളില്‍ ഒന്നാണ്‌ വെള്ളരിക്ക. ഒരു വെള്ളരിക്ക, മൂന്ന്‌ ടേബിള്‍ സ്‌പൂണ്‍ പഞ്ചസാര, ഒരു ടീസ്‌പൂണ്‍ തൈര്‌ എന്നിവ നന്നായി ചേര്‍ത്തിളക്കിയ മിശ്ചിതം ചര്‍മ്മത്തില്‍ പുരട്ടുക.

പൈനാപ്പിള്‍ മുഖലേപനം

ഒരു പൈനാപ്പിളിന്റെ കാമ്പ്‌ അരച്ച്‌ കുഴമ്പ്‌ രൂപത്തിലാക്കി മുഖത്ത്‌ പുരട്ടുക. ഇത്‌ ഉണങ്ങി പത്ത്‌ മിനുട്ടിന്‌ ശേഷം റോസ്‌ വാട്ടര്‍ ഉപയോഗിച്ച്‌ മുഖം കഴുകി തുടയ്‌ക്ക്‌ക.