മുഖം മസാജ്‌ ചെയ്യൂ, രുചി കൊണ്ട്‌ !!

പാല്‍

തണുത്ത പാല്‍ ഉപയോഗിച്ച് രാവിലെ മുഖം കഴുകുക. തണുത്ത പാല്‍ മുഖത്തിന് തിളക്കം നല്കുകയും ചര്‍മ്മം മൃദുവും സൗമ്യവുമാക്കുകയും ചെയ്യും. മുഖത്തെ ഇരുണ്ട പാടുകള്‍ അകറ്റാനും പാല്‍ ഉത്തമമാണ്.

തേന്‍

രണ്ട് സ്പൂണ്‍ തേന്‍ ഇടം കൈവെള്ളയിലെടുത്ത് വിരലുകള്‍ ഇതില്‍ മുക്കി വൃത്താകൃതിയില്‍ മുഖം 15 മിനുട്ട് സമയം മസാജ് ചെയ്യുക. തുടര്‍ന്ന് നാരങ്ങ മുറിച്ച് മുഖത്ത് തേച്ച് ഉണങ്ങാന്‍ അനുവദിക്കുക. ശേഷം ചൂടുവെള്ളം ഉപയോഗിച്ച് മുഖം കഴുകുക. ഇത് മുഖത്തെ രോമങ്ങള്‍ നീക്കാനും ചര്‍മ്മത്തിന്‍റെ നിറം മെച്ചപ്പെടുത്താനും സഹായിക്കും.

സ്ട്രോബെറി

വൈറ്റമിന്‍ സി ധാരാളമായി അടങ്ങിയ സ്ട്രോബെറി കണ്ണുകള്‍ക്ക് ചുറ്റുമുള്ള ചുളിവുകള്‍ അകറ്റാന്‍ സഹായിക്കും. സ്ട്രോബെറിയുടെ നീര് സാവധാനം കറുത്ത വലയങ്ങളെ ഇല്ലാതാക്കാന്‍ സഹായിക്കും.

നാരങ്ങ നീര്

നാരങ്ങ നീര് ഉപയോഗിച്ച് മസാജ് ചെയ്യുന്നത് ചര്‍മ്മ സംരക്ഷണത്തിന് ഏറെ ഫലപ്രദമാണ്. നാരങ്ങ ചര്‍മ്മത്തിന് തിളക്കം നല്കുകയും ചര്‍മ്മത്തിലെ വലിയ സുഷിരങ്ങളെ ഭേദമാക്കുകയും ചെയ്യും.

ഗ്രീന്‍ ടീ

ഗ്രീന്‍ ടീ ആരോഗ്യത്തിന് മാത്രമേ ഉപകരിക്കൂ എന്നാണ് നിങ്ങളുടെ ധാരണയെങ്കില്‍ അത് തെറ്റാണ്. ഇത് ചര്‍മ്മ പരിചരണത്തിനും ഉപയോഗിക്കാം. ദിവസവും രാവിലെ ഗ്രീന്‍ ടീ ഉപയോഗിച്ച് മുഖം കഴുകുന്നത് ചര്‍മ്മത്തിന് ഉന്മേഷം നല്കുകയും മുഖക്കുരു ഭേദമാക്കുകയും ചെയ്യും.

തേങ്ങാവെള്ളം

മുഖം പച്ച വെള്ളം ഉപയോഗിച്ച് കഴുകുന്നതിന് പകരം തേങ്ങാ വെെള്ളം ഉപയോഗിക്കുക. തേങ്ങാവെള്ളത്തിലെ പോഷകങ്ങള്‍ മുഖത്തെ അശുദ്ധികള്‍ അകറ്റും.