മുഖക്കുരു വരുന്നതു തടയൂ

Published: Saturday, August 2, 2014, 16:08 [IST]

സൗന്ദര്യസംരക്ഷണത്തില്‍ ശ്രദ്ധിയ്‌്‌ക്കുന്നവരെ അലട്ടുന്ന ഒരു പ്രധാന പ്രശ്‌നമാണ്‌ മുഖക്കുരു. കൗമാരപ്രായത്തില്‍ ആണ്‍,പെണ്‍ ഭേദമില്ലാതെ വരുന്ന ഇത്‌ അവശേഷിപ്പിയ്‌ക്കുന്ന കലകള്‍ ജീവിതകാലം മുഴുവന്‍ നില നില്‍ക്കുയും ചെയ്യും.

പ്രധാനമായും എണ്ണമയമുള്ള ചര്‍മത്തിലാണ്‌ മുഖക്കുരു വരിക. ചര്‍മസുഷിരത്തില്‍ അഴുക്കും ചെളിയുമാകുന്നതാണ്‌ കാരണം.

മുഖക്കുരു തടയാനുള്ള ചില വഴികളുണ്ട്‌. ഇവയെക്കുറിച്ച്‌ കൂടുതലറിയൂ,

എണ്ണമയം

എണ്ണമയം മുഖക്കുരുവിനുള്ള പ്രധാന കാരണങ്ങളിലൊന്നാണ്. എണ്ണമയം കലര്‍ന്ന ഭക്ഷണങ്ങള്‍ മുഖക്കുരുവുണ്ടാക്കും. ഇവ ഒഴിവാക്കി പകരം പച്ചക്കറികളും പഴവര്‍ഗങ്ങളും കൂടുതല്‍ കഴിയ്ക്കുക. അന്നജം കൂടുതല്‍ അടങ്ങിയ ഭക്ഷണങ്ങളും മുഖക്കുരുവിന് കാരണമാകും. ഇത് കുറയ്ക്കുക.

വെള്ളം

ശരീരത്തിലെ വിഷവസ്തുക്കള്‍ നീക്കം ചെയ്യുന്നത് മുഖക്കുരു വരാതിരിക്കാനുള്ള മറ്റൊരു പ്രധാന മുന്‍കരുതലാണ്. ഇതിനു ചെയ്യാനുള്ള മാര്‍ഗവും വളരെ എളുപ്പം. ധാരാളം വെള്ളം കുടിയ്ക്കുക. വെള്ളം ശരീരത്തിലെ വിഷവസ്തുക്കളെ പുറന്തള്ളുന്നു. ദിവസവും എട്ടു ഗ്ലാസെങ്കിലും വെള്ളം കുടിയ്ക്കുക.

മുഖം കഴുകുക

പൊടിയും എണ്ണമയവുമാണ് പലപ്പോഴും മുഖക്കുരു വരാനുള്ള പ്രധാന കാരണങ്ങളിലൊന്ന്. ചര്‍മം എപ്പോഴും വൃത്തിയായി സൂക്ഷിക്കുക. പുറത്തു പോയി വന്നാലുടന്‍ മുഖം വൃത്തിയായി കഴുകുക.

മേക്കപ്പ്

കൃത്രിമവസ്തുക്കള്‍ അടങ്ങിയ മേക്കപ്പ് സാധനങ്ങളും എണ്ണയുടെ അംശം കൂടുതലുള്ള ക്രീമുകളും ഉപേക്ഷിക്കുക. കഴിവതും പ്രകൃതിദത്ത ഉല്‍പന്നങ്ങള്‍ മാത്രം ഉപയോഗിക്കുക.