ഷേവിംഗിനു ശേഷം മുഖക്കുരു?

ഷേവിംഗ് പുരുഷന് മുഖസൗന്ദര്യം നല്‍കുമെങ്കിലും ഇതിന് ശേഷം പല ചര്‍മപ്രശ്‌നങ്ങളും പലര്‍ക്കും അനുഭവപ്പെടാറുണ്ട്. ഇതിലൊന്നാണ് മുഖക്കുരു.

പല പുരുഷന്മാര്‍ക്കും ഷേവിംഗ് കഴിഞ്ഞാല്‍ മുഖക്കുരു വരികയും ഇത് പൊട്ടുകയും ചെയ്യാറുണ്ട്. ഇവ യഥാര്‍ത്ഥത്തില്‍ മുഖക്കുരുവല്ല. ഷേവിംഗിന് ശേഷം ചര്‍മത്തിലുണ്ടാകുന്ന വളരാത്ത രോമകൂപങ്ങളോ അല്ലെങ്കില്‍ ഷേവിംഗിലുണ്ടായ മുറിവിനോടുള്ള ചര്‍മപ്രതികരണമോ ആണിത്. ഇതിന് ചില പരിഹാരങ്ങളുമുണ്ട്.

ഗുണമേന്മയുള്ള റേസര്‍ ഉപയോഗിയ്ക്കുകയാണ് ഒരു വഴി. ഒരു റേസര്‍ അനേക തവണ ഉപയോഗിയ്ക്കുകയും ചെയ്യരുത്. ഓരോ തവണ ഉപയോഗിച്ചു കഴിയുമ്പോഴും ബ്ലേഡ് നല്ലപോലെ വൃത്തിയാക്കുകയും വെള്ളം കള്ഞ്ഞു സൂക്ഷിയ്ക്കുകയും വേണം.

ഇലക്ട്രിക് റേസര്‍ ഉപയോഗിയ്ക്കുകയാണെങ്കില്‍ രണ്ടു മൂന്നു തവണ ഉപയോഗിച്ച ശേഷം ബ്ലേഡ് മാറ്റണം. ഓരോ തവണയും സിംഗിള്‍ ബ്ലേഡ് റേസര്‍ ഉപയോഗിയ്ക്കുകയാണ് നല്ലത്.

ഷേവിംഗിന് ശേഷം അല്‍പം ആല്‍ക്കഹോള്‍ പുരട്ടുന്നത് ഗുണം ചെയ്യും. ആല്‍ക്കഹോള്‍ അടങ്ങുന്ന ഏതെങ്കിലും ആഫ്റ്റര്‍ ഷേവ് ലോഷന്‍ ഉപയോഗിച്ചാലും മതിയാകും.

ഷേവ് ചെയ്തിടത്ത് ഐസ് ക്യൂബുകള്‍ കൊണ്ട് ഉരസുന്നത് ഗുണം ചെയ്യും.

ഷേവ് ചെയ്യുന്നതിന് മുന്‍പ് മുഖത്തെ മൃതകോശങ്ങള്‍ അകറ്റുന്നതും നല്ലതാണ്.

കഴുത്തില്‍ നിന്നും മുകളിലേയ്ക്കു ഷേവ് ചെയ്യുന്നതിനു പകരം മുഖത്തു നിന്നും താഴേയ്ക്കു ഷേവ് ചെയ്യുക. ഇത് മുറിവിനുള്ള സാധ്യതകള്‍ കുറയ്ക്കും.

ഷേവിംഗിന് ശേഷം മുഖം ഇളം ചൂടുവെള്ളം കൊണ്ടു കഴുകുന്നത് നല്ലതാണ്.